Azərbaycanın sülh təşəbbüsləri və yaşıl enerji siyasəti Avropa İttifaqı ilə əməkdaşlığa yeni məzmun qazandırır
Azərbaycanın həyata keçirdiyi ardıcıl xarici siyasət kursu ölkəmizin beynəlxalq münasibətlər sistemində mövqeyini daha da möhkəmləndirib. Prezident İlham Əliyevin rəhbərliyi ilə regionda davamlı sülhün bərqərar olunması, nəqliyyat-kommunikasiya əlaqələrinin genişləndirilməsi və yaşıl enerji sahəsində irəli sürülən təşəbbüslər beynəlxalq ictimaiyyət tərəfindən yüksək qiymətləndirilir. Avropa Komissiyasının Prezidenti Ursula fon der Lyayenin Azərbaycana səfəri və Prezident İlham Əliyevlə keçirdiyi görüş də bu istiqamətdə əməkdaşlığın yeni mərhələyə qədəm qoyduğunu nümayiş etdirdi.
Görüş zamanı əsas müzakirə mövzularından biri Cənubi Qafqazda dayanıqlı sülhün təmin olunması idi. Azərbaycan 44 günlük Vətən müharibəsindən sonra regionda yaranmış yeni reallıqlar fonunda sülh müqaviləsinin imzalanmasını, kommunikasiyaların bərpasını və qarşılıqlı əməkdaşlığın genişləndirilməsini daim dəstəkləyən tərəf kimi çıxış edir. Prezident İlham Əliyevin irəli sürdüyü təşəbbüslər bölgədə etimad mühitinin formalaşdırılmasına və uzunmüddətli sabitliyin təmin edilməsinə xidmət edir.
Avropa İttifaqının bu proseslərə xüsusi maraq göstərməsi Azərbaycanın regionun aparıcı siyasi aktoru kimi qəbul edildiyini bir daha təsdiqləyir. Bakı ilə Brüssel arasında aparılan siyasi dialoq təkcə ikitərəfli münasibətlərin inkişafına deyil, həm də Cənubi Qafqazda təhlükəsizliyin və iqtisadi əməkdaşlığın möhkəmləndirilməsinə mühüm töhfə verir. Bu baxımdan Ursula fon der Lyayenin Azərbaycana səfəri qarşılıqlı etimada əsaslanan tərəfdaşlığın daha da dərinləşməsinin göstəricisi hesab olunur.
Son illərdə Azərbaycanın yaşıl enerji sahəsində həyata keçirdiyi layihələr də Avropa İttifaqının diqqət mərkəzindədir. Prezident İlham Əliyevin müəyyən etdiyi inkişaf strategiyasına uyğun olaraq ölkəmiz bərpaolunan enerji mənbələrinin geniş tətbiqinə xüsusi önəm verir. Günəş və külək enerjisi üzrə reallaşdırılan layihələr, Xəzər dənizinin zəngin külək potensialından istifadə istiqamətində görülən işlər və “Yaşıl enerji dəhlizi” təşəbbüsü Azərbaycanın gələcəyin enerji təhlükəsizliyinə verdiyi töhfənin bariz nümunəsidir.
Avropa İttifaqının bu sahədə Azərbaycanla əməkdaşlığı genişləndirmək niyyəti ölkəmizin yalnız ənənəvi enerji resursları ilə deyil, alternativ enerji istiqamətində də etibarlı tərəfdaş kimi qəbul olunduğunu göstərir. Yaşıl enerji layihələrinin həyata keçirilməsi həm enerji mənbələrinin şaxələndirilməsinə, həm də iqlim dəyişiklikləri ilə mübarizə sahəsində beynəlxalq öhdəliklərin yerinə yetirilməsinə mühüm töhfə verir.
Bununla yanaşı, Azərbaycanın əlverişli coğrafi mövqeyi, müasir nəqliyyat infrastrukturu və beynəlxalq logistika layihələrində fəal iştirakı ölkəmizin geostrateji əhəmiyyətini daha da artırır. Şərqlə Qərbi birləşdirən Orta Dəhlizin inkişafı istiqamətində görülən işlər Avropa ilə Asiya arasında yükdaşımaların təhlükəsiz və səmərəli təşkilinə geniş imkanlar yaradır. Bu da Azərbaycanı beynəlxalq nəqliyyat sisteminin əsas həlqələrindən birinə çevirir.
Bu gün Azərbaycan beynəlxalq münasibətlər sistemində etibarlı tərəfdaş, təşəbbüskar dövlət və regional sabitliyin təmin olunmasına mühüm töhfə verən ölkə kimi tanınır. Prezident İlham Əliyevin rəhbərliyi ilə həyata keçirilən məqsədyönlü siyasət nəticəsində ölkəmizin Avropa İttifaqı ilə münasibətləri keyfiyyətcə yeni mərhələyə yüksəlib. Qarşılıqlı hörmət, etimad və ortaq maraqlara əsaslanan bu əməkdaşlıq gələcəkdə də siyasi, iqtisadi və enerji sahələrində yeni uğurlara zəmin yaradacaq, Azərbaycanın beynəlxalq nüfuzunun daha da möhkəmlənməsinə xidmət edəcəkdir.
Fuad Eyvazov – Məmmədqasımlı kənd sakini, sahibkar
