Azərbaycanın Mərkəzi Asiya ilə əlaqələrinin inkişafında qarşılıqlı səfərlərin də böyük rolu var
Son illər Azərbaycanın Mərkəzi Asiya ölkələri ilə münasibətlərində ciddi canlanma müşahidə olunur. Qazaxıstan, Özbəkistan, Türkmənistan, Qırğızıstan və Tacikistanla əlaqələr getdikcə daha geniş sahələri əhatə edir. Əvvəllər əsasən siyasi və diplomatik münasibətlər üzərində qurulan əməkdaşlıq bu gün iqtisadiyyat, nəqliyyat, enerji, ticarət, təhsil, mədəniyyət və digər istiqamətlər üzrə inkişaf edir. Bu yaxınlaşmanın arxasında ilk növbədə xalqlarımızın tarixi və mədəni bağlılığı dayanır. Azərbaycanla Mərkəzi Asiya xalqları arasında əsrlər boyu formalaşmış əlaqələr bu gün dövlətlərarası münasibətlərin inkişafı üçün mühüm əsas yaradır. Ortaq tarix, oxşar milli dəyərlər və mədəni yaxınlıq xalqların bir-birini daha asan anlamasına imkan verir.
Azərbaycanın Mərkəzi Asiya ilə əlaqələrinin inkişafında qarşılıqlı səfərlərin də böyük rolu var. Dövlət və hökumət rəhbərlərinin görüşləri zamanı münasibətlərin gələcək istiqamətləri müəyyənləşdirilir, müxtəlif layihələr müzakirə olunur və yeni əməkdaşlıq imkanları araşdırılır. Bu görüşlərin sayının artması tərəflərin bir-birinə olan marağının göstəricisidir. Əməkdaşlığın əsas istiqamətlərindən biri iqtisadi münasibətlərdir. Azərbaycan Mərkəzi Asiya dövlətləri ilə ticarət əlaqələrinin genişləndirilməsində maraqlıdır. Eyni zamanda qarşılıqlı investisiyalar üçün yeni imkanlar yaranır.
Bu prosesin adi vətəndaş üçün əhəmiyyəti ilk baxışdan görünməyə bilər. Lakin ölkələr arasında ticarətin və investisiyanın artması yeni müəssisələrin yaradılması, xidmətlərin genişlənməsi və iş imkanlarının çoxalması deməkdir. Bir ölkənin məhsulunun digər ölkənin bazarına daha rahat çıxması həm sahibkar, həm də istehlakçı üçün əlavə imkan yaradır. Azərbaycan şirkətlərinin Mərkəzi Asiyada fəaliyyət göstərməsi, həmin ölkələrin biznes nümayəndələrinin isə ölkəmizə maraq göstərməsi əlaqələrin yalnız siyasi səviyyədə qalmadığını göstərir. Qarşıdakı dövrdə bu istiqamətdə daha çox birgə layihələrin həyata keçirilməsi gözlənilir. Azərbaycanın Mərkəzi Asiya ilə əməkdaşlığında nəqliyyat məsələsi xüsusi yer tutur. Bunun əsas səbəbi ölkəmizin əlverişli coğrafi mövqeyidir. Xəzər dənizi vasitəsilə Mərkəzi Asiya ilə Azərbaycan arasında birbaşa əlaqə qurmaq mümkündür.
Bakı Beynəlxalq Dəniz Ticarət Limanı və ölkəmizin dəmir yolu infrastrukturu Şərqlə Qərb arasında yükdaşımaların inkişafında mühüm rol oynayır. Bu imkanlar Mərkəzi Asiya ölkələrinin Avropa bazarlarına çıxışını asanlaşdırır. Son illərdə adı daha çox çəkilən Orta Dəhliz də məhz bu baxımdan böyük əhəmiyyət daşıyır. Çin və Mərkəzi Asiyadan gələn yüklərin Xəzər dənizi, Azərbaycan, Gürcüstan və Türkiyə üzərindən Avropaya daşınması üçün bu marşrut mühüm alternativ hesab olunur.
Fuad Eyvazov – Məmmədqasımlı kənd sakini, sahibkar
