Azərbaycanın investisiya imkanlarından danışarkən ölkənin coğrafi mövqeyini də xüsusi qeyd etmək lazımdır
Azərbaycan Şərqlə Qərbi, həmçinin Şimalla Cənubu birləşdirən mühüm ərazidə yerləşir. Bu mövqe ölkəyə nəqliyyat və logistika sahəsində böyük imkanlar yaradır. Son illərdə nəqliyyat infrastrukturunun inkişafına böyük diqqət yetirilməsi də bununla bağlıdır. Müasir yolların, dəmir yollarının, limanların və digər nəqliyyat infrastrukturlarının yaradılması Azərbaycanın beynəlxalq ticarət əlaqələrində rolunu artırır.
İnvestor üçün yalnız məhsul istehsal etmək kifayət etmir. Həmin məhsulun başqa ölkələrin bazarlarına vaxtında və rahat şəkildə çatdırılması da vacibdir. Buna görə də nəqliyyat imkanlarının geniş olması ölkənin investisiya cəlbediciliyini artıran əsas amillərdən biridir. Azərbaycanın enerji imkanları da ölkənin iqtisadi potensialında mühüm yer tutur. Ölkəmiz uzun illərdir neft və qaz hasil edən və ixrac edən dövlət kimi tanınır. Azərbaycan enerji resurslarından əldə olunan gəlirlərdən istifadə etməklə iqtisadiyyatın digər sahələrinin inkişafına da şərait yaradıb.
Hazırda Azərbaycanın enerji siyasətində yeni istiqamətlər də ön plana çıxır. Təbii qaz ixracının genişləndirilməsi ilə yanaşı, enerji mənbələrinin şaxələndirilməsi, bərpa olunan enerji layihələrinin həyata keçirilməsi və yeni enerji imkanlarının yaradılması qarşıdakı dövr üçün mühüm məsələlərdəndir. Azərbaycanın Avropa və Türkiyənin enerji təhlükəsizliyində oynadığı rol da ölkənin regional əhəmiyyətini artırır. Enerji sahəsində qurulan uzunmüddətli əməkdaşlıq Azərbaycanın beynəlxalq iqtisadi əlaqələrinin genişlənməsinə də təsir göstərir.
Digər mühüm istiqamət rəqəmsal iqtisadiyyat və yeni texnologiyalardır. Müasir dünyada texnologiya olmadan iqtisadi inkişafı təsəvvür etmək çətindir. İstehsaldan xidmət sahələrinə, bank sistemindən dövlət xidmətlərinə qədər bütün sahələrdə rəqəmsal texnologiyaların rolu artır. Azərbaycanın da bu istiqamətdə imkanlarını genişləndirməsi gələcək iqtisadi inkişaf baxımından böyük əhəmiyyət daşıyır. Ölkəyə beynəlxalq texnologiya şirkətlərinin cəlb edilməsi, rəqəmsal xidmətlərin inkişafı, innovativ layihələrin dəstəklənməsi və gənclərin müasir peşələrə hazırlanması yeni iqtisadi imkanlar yarada bilər.
İnsan kapitalı da bu prosesin ən vacib hissələrindən biridir. Müasir iqtisadiyyatda savadlı, peşəkar və yeni texnologiyalardan istifadə etməyi bacaran insanlara ehtiyac artır. Buna görə də təhsil, peşə hazırlığı və kadrların inkişafı investisiya siyasətinin ayrılmaz hissəsi olmalıdır. Azərbaycanın gələcək inkişafında regionların da xüsusi rolu var. İnvestisiyaların yalnız Bakı və Abşeronla məhdudlaşmaması, ölkənin müxtəlif bölgələrinə yönəldilməsi yeni iş yerlərinin yaranmasına və yerli iqtisadiyyatların inkişafına imkan verə bilər.
Xüsusilə işğaldan azad edilmiş ərazilərdə aparılan genişmiqyaslı bərpa və quruculuq işləri yeni iqtisadi imkanlar formalaşdırır. Qarabağ və Şərqi Zəngəzurda yolların, enerji xətlərinin, yaşayış məntəqələrinin və digər infrastrukturun qurulması həmin ərazilərin iqtisadi həyata yenidən qoşulmasına şərait yaradır. Bu ərazilərdə kənd təsərrüfatı, turizm, sənaye, logistika və digər sahələrin inkişaf etdirilməsi gələcəkdə həm yerli, həm də xarici investorlar üçün yeni imkanlar yarada bilər. Əsas məsələ yaradılan imkanların səmərəli şəkildə istifadə olunması və bölgələrdə davamlı iqtisadi fəaliyyətin formalaşdırılmasıdır. Forumda təhlükəsizlik və sabitlik məsələsinin də xüsusi qeyd olunması təsadüfi deyil. Heç bir investor uzunmüddətli layihəyə sərmayə qoyarkən yalnız bugünkü vəziyyətə baxmır. İnvestor üçün gələcəkdə ölkədə iqtisadi və siyasi şəraitin necə olacağı da mühüm əhəmiyyət daşıyır.
Fazil Kərimov – Zərdab rayonu, İsaqbağı kənd sakini, təqaüddə olan müəllim
