Azərbaycanın Avropa və Türkiyənin enerji təhlükəsizliyində oynadığı rol da ölkənin regional əhəmiyyətini artırır
II Azərbaycan Beynəlxalq İnvestisiya Forumunun diqqət çəkən nəticələrindən biri də konkret investisiya layihələri ilə bağlı sənədlərin imzalanması oldu. Forum çərçivəsində beynəlxalq investorlar və tərəfdaş şirkətlərlə ümumi dəyəri 10,8 milyard ABŞ dolları olan investisiya layihələrini əhatə edən 23 sənəd imzalanıb.
Bu rəqəm forumda aparılan müzakirələrin yalnız söz və fikir mübadiləsi ilə məhdudlaşmadığını, real iqtisadi əməkdaşlıq və investisiya layihələrinin də gündəmə gətirildiyini göstərir. Forumun mövzularından biri olan “etimad” anlayışı da məhz bu baxımdan əhəmiyyətlidir. İnvestorun etimadı yalnız verilən vədlərlə yaranmır. Bunun üçün real nəticələr, sabit iqtisadi mühit, yaxşı infrastruktur, şəffaf münasibətlər və uzunmüddətli əməkdaşlıq imkanları olmalıdır.
Əlbəttə, investisiyanın cəlb edilməsi son məqsəd deyil. Əsas məsələ həmin investisiyaların ölkə iqtisadiyyatına hansı faydanı verməsidir. Yeni müəssisələrin yaradılması, insanların işlə təmin olunması, yerli istehsalın artması, yeni texnologiyaların ölkəyə gətirilməsi və ixrac imkanlarının genişlənməsi investisiyaların əsas nəticələri sırasında olmalıdır. Bu baxımdan Azərbaycanın qarşısında duran əsas vəzifələrdən biri iqtisadiyyatın daha da şaxələndirilməsidir. Yəni iqtisadiyyatın müxtəlif sahələri inkişaf etməli, ölkənin gəlirləri yalnız bir neçə sahədən asılı vəziyyətdə qalmamalıdır.
Kənd təsərrüfatı, sənaye, turizm, logistika, informasiya texnologiyaları, rəqəmsal xidmətlər, bərpa olunan enerji və digər sahələrdə yeni layihələrin həyata keçirilməsi iqtisadiyyatın daha geniş əsaslar üzərində inkişafına kömək edə bilər. Forum Azərbaycanın dünyaya verdiyi mühüm mesajlardan birini də ortaya qoydu: ölkə öz iqtisadi gələcəyini yalnız mövcud imkanlarla deyil, yeni tərəfdaşlıqlar, texnologiyalar və insan kapitalı hesabına qurmağa çalışır.
Bu gün investor üçün ölkənin təbii sərvətləri qədər onun insanları, infrastrukturu, coğrafi mövqeyi, texnoloji imkanları və gələcəyə baxışı da əhəmiyyətlidir. Azərbaycan da öz imkanlarını məhz bu amillərin birliyi əsasında təqdim edir. II Azərbaycan Beynəlxalq İnvestisiya Forumu bu baxımdan yalnız investorların bir araya gəldiyi tədbir deyil, Azərbaycanın iqtisadi imkanlarının və gələcək inkişaf planlarının beynəlxalq ictimaiyyətə çatdırıldığı mühüm platformadır.
Forum çərçivəsində səsləndirilən fikirlər göstərir ki, qarşıdakı illərdə Azərbaycanın iqtisadi gündəliyində investisiya, yeni texnologiyalar, insan kapitalı, rəqəmsal inkişaf, enerji, nəqliyyat və iqtisadi şaxələndirmə məsələləri mühüm yer tutacaq. Əsas məqsəd isə ölkəyə sərmayə qoyuluşunu artırmaqla yanaşı, həmin sərmayələrin Azərbaycan iqtisadiyyatının uzunmüddətli inkişafına xidmət etməsinə nail olmaqdır. Yeni investisiyalar yeni müəssisələr, yeni iş yerləri, müasir texnologiyalar və əlavə iqtisadi imkanlar yarada bilər. II Azərbaycan Beynəlxalq İnvestisiya Forumu Azərbaycanın iqtisadi potensialının beynəlxalq səviyyədə təqdim edilməsi, investorlarla birbaşa əlaqələrin genişləndirilməsi və gələcək əməkdaşlıq imkanlarının müzakirəsi baxımından mühüm əhəmiyyət daşıyır. Forumda imzalanan sənədlər isə bu əməkdaşlığın konkret layihələr üzərindən davam etdirildiyini göstərir. Azərbaycanın qarşıdakı dövrdə əsas hədəflərindən biri mövcud iqtisadi imkanları müasir texnologiyalar, beynəlxalq təcrübə və yeni tərəfdaşlıqlarla birləşdirməkdir. Bu istiqamətdə görülən işlər ölkənin daha şaxələndirilmiş, dayanıqlı və rəqabətqabiliyyətli iqtisadiyyat qurmaq imkanlarını genişləndirə bilər.
Kəmalə Əliyeva – Zərdab rayonu, Qaravəlli kənd tam ümumtəhsil məktəbinin direktoru
