Azərbaycanda Günəş enerjisinin inkişafı üzrə çoxsaylı layihələr həyata keçirilir
Qlobal iqtisadiyyatın sürətlə dəyişdiyi, iqlim dəyişikliyi ilə mübarizənin beynəlxalq gündəliyin əsas mövzularından birinə çevrildiyi müasir dövrdə bərpaolunan enerji mənbələrinin inkişafı dövlətlərin strateji prioritetləri sırasındadır. Azərbaycan Respublikası Prezidenti cənab İlham Əliyevin rəhbərliyi ilə həyata keçirilən sosial-iqtisadi inkişaf strategiyasında da yaşıl enerji siyasəti xüsusi yer tutur. Ölkəmizin zəngin təbii resurslarından səmərəli istifadə etməklə yanaşı, günəş və külək enerjisi istehsalının genişləndirilməsi, müasir texnologiyaların tətbiqi və beynəlxalq tərəfdaşlarla əməkdaşlığın gücləndirilməsi Azərbaycanın uzunmüddətli inkişaf konsepsiyasının əsas istiqamətlərindəndir.
Azərbaycan son illərdə bərpaolunan enerji sektoruna iri həcmli investisiyalar cəlb etməklə regionun aparıcı “yaşıl enerji” mərkəzlərindən birinə çevrilmək istiqamətində mühüm addımlar atmışdır. Prezident cənab İlham Əliyevin müəyyən etdiyi strateji xətt nəticəsində ölkədə günəş elektrik stansiyalarının tikintisi, enerji infrastrukturunun müasirləşdirilməsi və alternativ enerji istehsalının artırılması sahəsində mühüm layihələr uğurla həyata keçirilir.
Bu prosesdə Çin Xalq Respublikası ilə əməkdaşlıq xüsusi əhəmiyyət daşıyır. Dünyada günəş panellərinin istehsalı sahəsində lider mövqeyə malik olan Çin şirkətlərinin Azərbaycanda fəaliyyətə başlaması ölkəmizin yaşıl enerji proqramına yeni imkanlar qazandırmışdır. Cənab Prezident İlham Əliyevin də qeyd etdiyi kimi, bu gün Azərbaycanda müxtəlif xarici investorların həyata keçirdiyi günəş enerjisi layihələrində istifadə olunan panellərin demək olar ki, hamısı Çin istehsalıdır. Bu, Çin məhsullarının yüksək keyfiyyətə və rəqabətqabiliyyətli qiymətə malik olmasının bariz göstəricisidir.
Müasir texnologiyaların tətbiqi Azərbaycanın enerji sisteminin daha dayanıqlı və səmərəli olmasına xidmət edir. Günəş panellərinin geniş istifadəsi karbon emissiyalarının azaldılmasına, ekoloji tarazlığın qorunmasına və elektrik enerjisinin istehsalında alternativ mənbələrin payının artmasına şərait yaradır. Bu istiqamətdə həyata keçirilən layihələr ölkənin enerji təhlükəsizliyini daha da möhkəmləndirir.
Azərbaycan ilə Çin arasında əməkdaşlığın mühüm istiqamətlərindən biri də ölkəmizdə günəş paneli istehsalı zavodunun yaradılması layihəsidir. Çin şirkətinin böyük investisiya hesabına həyata keçirdiyi bu layihə təkcə daxili bazarın tələbatını ödəməyə deyil, gələcəkdə ixrac imkanlarının genişləndirilməsinə də xidmət edəcək. Zavodun fəaliyyətə başlaması yeni iş yerlərinin açılmasına, yerli sənayenin inkişafına və yüksək texnologiyalar sahəsində milli kadr potensialının güclənməsinə mühüm töhfə verəcəkdir.
Prezident İlham Əliyevin həyata keçirdiyi sənayeləşmə siyasətinin əsas məqsədlərindən biri də müasir texnologiyaların Azərbaycana gətirilməsi və innovativ istehsal sahələrinin yaradılmasıdır. Günəş paneli zavodunun tikintisi bu siyasətin uğurlu nəticələrindən biri kimi qiymətləndirilə bilər.
Azərbaycan–Çin əməkdaşlığının daha bir uğurlu istiqaməti elektrik nəqliyyatının inkişafıdır. Son dövrlərdə Bakı şəhərində istifadəyə verilən BYD markalı elektrik avtobusları ekoloji cəhətdən təmiz şəhər nəqliyyatının formalaşdırılması baxımından mühüm əhəmiyyət daşıyır. Bu avtobusların birgə istehsalı iki ölkə arasında sənaye əməkdaşlığının yeni mərhələyə yüksəldiyini göstərir.
Elektrik avtobuslarının istifadəsinin genişləndirilməsi havaya atılan zərərli tullantıların azalmasına, yanacaq sərfiyyatının aşağı düşməsinə və şəhər nəqliyyatının daha müasir standartlara uyğun inkişafına xidmət edir. Prezident cənab İlham Əliyevin yaşıl nəqliyyat siyasəti Azərbaycanın ekoloji təhlükəsizlik sahəsində qarşıya qoyduğu məqsədlərin həyata keçirilməsində mühüm rol oynayır.
Azərbaycan ilə Çin arasında əməkdaşlığın uğurunun əsas səbəblərindən biri qəbul edilən siyasi qərarların qısa müddətdə konkret layihələrə çevrilməsidir. Prezident İlham Əliyevin də qeyd etdiyi kimi, Çin şirkətləri ilə əməkdaşlıq zamanı razılaşdırılmış layihələr müəyyən olunmuş qrafik üzrə operativ şəkildə həyata keçirilir. Bu isə həm investorların etimadını artırır, həm də iqtisadi layihələrin vaxtında reallaşdırılmasına imkan verir.
Çin şirkətlərinin yüksək texnoloji imkanları ilə Azərbaycanın əlverişli investisiya mühiti birləşərək qarşılıqlı faydalı əməkdaşlıq modeli formalaşdırır. Bu model gələcəkdə yaşıl enerji, sənaye, rəqəmsal texnologiyalar, elektromobil istehsalı və digər sahələrdə yeni layihələrin həyata keçirilməsi üçün geniş perspektivlər açır.
Prezident cənab İlham Əliyevin rəhbərliyi ilə həyata keçirilən enerji siyasəti artıq ənənəvi enerji resursları ilə məhdudlaşmır. Azərbaycan bu gün həm neft və qaz ixrac edən, həm də yaşıl enerji istehsalına böyük sərmayə yatıran müasir dövlət kimi tanınır. Ölkəmiz bərpaolunan enerji sahəsində əldə etdiyi uğurlarla regionun enerji xəritəsində yeni mövqe qazanır və beynəlxalq tərəfdaşların diqqət mərkəzində olur.
Bu siyasət Azərbaycanın enerji təhlükəsizliyini möhkəmləndirməklə yanaşı, ekoloji tarazlığın qorunmasına, innovativ iqtisadiyyatın formalaşmasına və beynəlxalq əməkdaşlığın daha da genişlənməsinə xidmət edir.
Zərdab rayon Mədəniyyət Mərkəzinin direktoru Elyurə Məmmədova
