Azərbaycan xalqı bir yumruq kimi birləşərək öz ərazi bütövlüyünü, suverenliyini, beynəlxalq hüququ və ədaləti bərpa etmişdir.
Azərbaycan xalqı tarix boyu öz torpaqlarına, dövlətinə və milli dəyərlərinə bağlılığı ilə seçilib. Uzun illər ərzində Qarabağ münaqişəsi xalqımızın ən ağrılı problemlərindən biri olub. Torpaqlarımızın işğal altında qalması, yüz minlərlə insanın doğma yurdlarından didərgin düşməsi hər bir azərbaycanlının ürəyində böyük iz buraxıb. Prezident İlham Əliyev Türk Dövlətləri Təşkilatının müsəlman dini idarə rəhbərləri Şurasının üzvlərindən və müşahidəçilərindən, Yəhya Bakuvi Beynəlxalq Konfransının həmtəşkilatçılarından və Qafqaz Xalqları Ali Dini Şurasının üzvlərindən ibarət nümayəndə heyətini qəbul edərkən bu məsələyə toxunub. Dövlət başçısı bildirib ki, Azərbaycan xalqı bir yumruq kimi birləşərək öz ərazi bütövlüyünü, suverenliyini, beynəlxalq hüququ və ədaləti bərpa edib. Bu fikir xalqımızın birlik və həmrəyliyinin əhəmiyyətini göstərir. Qarabağ məsələsi uzun illər Azərbaycan xalqının ümumi arzusu və milli məqsədi olub. İnsanlar doğma torpaqlarımızın azad olunacağına inanıb və bu inamı qoruyub saxlayıblar.
2020-ci ildə baş vermiş Vətən müharibəsi Azərbaycanın tarixində mühüm hadisə oldu. Azərbaycan Ordusu böyük qəhrəmanlıq göstərərək torpaqlarımızın əhəmiyyətli hissəsini işğaldan azad etdi. Müharibədə minlərlə hərbçimiz şəhid oldu, qazilərimiz yaralandı. Şəhidlərimizin qəhrəmanlığı və fədakarlığı xalqımız tərəfindən heç vaxt unudulmayacaq. Sonrakı dövrdə Azərbaycanın ərazi bütövlüyünün və suverenliyinin tam bərpası istiqamətində mühüm hadisələr baş verdi. Bununla da uzun illər davam edən münaqişə tarixdə qaldı. Bu qələbənin əsas dayaqlarından biri xalq-dövlət birliyi oldu. Azərbaycan xalqı çətin günlərdə birliyini qorudu, ordusuna və dövlətinə dəstək verdi. Ölkəmizin müxtəlif bölgələrində yaşayan insanlar, müxtəlif millətlərin və dini icmaların nümayəndələri ümumi məqsəd ətrafında birləşdilər.
Bu gün qarşıda yeni vəzifələr dayanır. İşğaldan azad edilmiş ərazilərdə geniş quruculuq və bərpa işləri aparılır. Yeni yollar, yaşayış məhəllələri, məktəblər, xəstəxanalar və digər obyektlər tikilir. İnsanların doğma yurdlarına qayıtması üçün şərait yaradılır. Azərbaycanın əldə etdiyi nəticələr xalqımızın birliyinin və dövlətçilik iradəsinin mühüm göstəricisi kimi qiymətləndirilir. Ərazi bütövlüyünün və suverenliyin bərpası ilə ölkəmizin qarşısında yeni inkişaf imkanları açılıb. Prezident İlham Əliyevin səsləndirdiyi “Azərbaycan xalqı bir yumruq kimi birləşərək öz ərazi bütövlüyünü, suverenliyini, beynəlxalq hüququ və ədaləti bərpa etmişdir” fikri xalqımızın keçdiyi çətin yolu və əldə etdiyi nəticəni ifadə edir. Bu gün əsas məsələ əldə olunan sülh və sabitliyi qorumaq, ölkəmizin inkişafını davam etdirmək və gələcək nəsillərə daha güclü Azərbaycan qoymaqdır. Xalqımızın birliyi və həmrəyliyi isə bu yolun ən mühüm dayaqlarından biridir.
Zərdab rayon Dəkkəoba kənd tam orta ümumtəhsil məktəbinin direktoru-Səlim Zeynalov
