Azərbaycan və Ermənistan xalqlarının gələcək nəsillərinin daim münaqişə şəraitində yaşaması heç kəsə fayda verməyəcək
İstənilən ölkədə hakimiyyətin cəmiyyətə verdiyi mesajlar böyük əhəmiyyət daşıyır. Hakimiyyət sülhü, qonşularla əməkdaşlığı və normal münasibətləri təşviq edərsə, cəmiyyətdə də konstruktiv düşüncə güclənər. Əksinə, revanşist və radikal qüvvələrin siyasi və ictimai müstəvidə geniş imkanlar əldə etməsi sülh prosesinə mənfi təsir göstərə bilər.Bu baxımdan Ermənistan hakimiyyətinin revanşist qüvvələrə münasibəti diqqətlə qiymətləndirilməlidir. Əgər hakimiyyət bir tərəfdən sülhdən danışır, digər tərəfdən isə revanşist qüvvələrin fəaliyyətinə göz yumur və ya onların cəmiyyətdə təsir imkanlarının artmasına şərait yaradırsa, bu, sülh prosesinə olan inamı zəiflədə bilər. Sülh yalnız sənədlərin imzalanması ilə əldə olunmur. Sülh həm də insanların düşüncəsində formalaşmalıdır. Bunun üçün cəmiyyətlərdə qarşılıqlı nifrətin azaldılması, düşmən obrazının aradan qaldırılması və gələcəyə yönəlmiş düşüncənin gücləndirilməsi vacibdir. Azərbaycanın mövqeyi ondan ibarətdir ki, regionda yeni reallıq qəbul edilməli və bu reallıq əsasında münasibətlər qurulmalıdır. Azərbaycanın ərazi bütövlüyü və suverenliyi təmin olunub. Artıq keçmiş münaqişənin yaratdığı vəziyyətə qayıtmaq mümkün deyil. Bu gün Azərbaycan azad edilmiş ərazilərdə genişmiqyaslı bərpa və quruculuq işləri həyata keçirir. İşğaldan azad edilmiş şəhər və kəndlər yenidən qurulur, yollar, məktəblər, xəstəxanalar, yaşayış məhəllələri və digər infrastruktur obyektləri yaradılır. Keçmiş məcburi köçkünlərin öz doğma torpaqlarına qayıdışı təmin edilir. Bu proses göstərir ki, Azərbaycanın əsas diqqəti keçmişdə qalmaq deyil, gələcəyi qurmaqdır. Regiondakı digər ölkələrin də belə yanaşmaya üstünlük verməsi Cənubi Qafqazın inkişafına böyük töhfə verə bilər. Revanşist ideologiyanın ən təhlükəli tərəflərindən biri onun gənc nəslə təsir göstərməsidir. Uşaqlar və gənclər müharibə görmədən, düşmənçilik hissləri ilə böyüdülməməlidirlər. Onlara yeni müharibələr deyil, sülhün, təhsilin, elmin, iqtisadi inkişafın və əməkdaşlığın üstünlükləri izah olunmalıdır.
Azərbaycan və Ermənistan xalqlarının gələcək nəsillərinin daim münaqişə şəraitində yaşaması heç kəsə fayda verməyəcək. Əksinə, düşmənçilikdən uzaqlaşmaq və bölgənin imkanlarından birgə istifadə etmək hər iki tərəfin inkişafına xidmət edə bilər. Əgər bir gənc öz gələcəyini yaxşı təhsil almaqda, peşə sahibi olmaqda, işləməkdə və ailəsinin rifahını yüksəltməkdə görürsə, bu, həm həmin gənc, həm də cəmiyyət üçün müsbət nəticədir. Ona davamlı olaraq müharibə və qisas düşüncəsi aşılanması isə gələcəyin təhlükə altına qoyulması deməkdir. Cənubi Qafqaz mühüm coğrafi mövqeyə malikdir. Azərbaycan, Ermənistan və Gürcüstan arasında nəqliyyat, enerji, ticarət və digər sahələrdə əməkdaşlıq region üçün böyük iqtisadi imkanlar yarada bilər. Sülh və sabitlik təmin olunarsa, yeni nəqliyyat marşrutlarının açılması, ticarətin genişlənməsi, investisiyaların artması və insanlar arasında əlaqələrin inkişafı mümkün olar. Ermənistan da bu imkanlardan faydalana bilər. Lakin bunun üçün ilk növbədə keçmişin revanşist yanaşmalarından uzaqlaşmaq lazımdır. Heç bir ölkə daim keçmiş müharibənin psixologiyası ilə gələcəyə doğru inkişaf edə bilməz. Bu gün region xalqlarının qarşısında seçim dayanır: ya keçmiş münaqişələrin yaratdığı düşmənçilik mühitini davam etdirmək, ya da yeni səhifə açmaq.
Azərbaycan öz gələcəyini quruculuq və inkişaf üzərində qurur. İşğaldan azad olunmuş ərazilərdə aparılan böyük layihələr bunun əyani nümunəsidir. Ermənistanın da öz gələcəyini revanşist çağırışlar üzərində deyil, iqtisadi inkişaf, sosial rifah və qonşularla normal münasibətlər üzərində qurması daha məqsədəuyğun olardı.
Kəmalə Əliyeva – Zərdab rayonu, Qaravəlli kənd tam ümumtəhsil məktəbinin direktoru
