Azərbaycan uzun illərdir müxtəlif dinlərin və xalqların nümayəndələrinin birgə və qarşılıqlı hörmət şəraitində yaşadığı ölkə kimi tanınır
Prezident İlham Əliyevin Türk Dövlətləri Təşkilatının Müsəlman Dini Rəhbərləri Şurasının üzvlərini, Seyid Yəhya Bakuvi Beynəlxalq Konfransının həmtəşkilatçılarını və Qafqaz Xalqları Ali Dini Şurasının nümayəndələrini qəbul etməsi mühüm hadisə oldu. Görüş zamanı Azərbaycanın tarixi, milli-mənəvi dəyərləri, Türk dünyası ilə əlaqələri, İslam həmrəyliyi, Qarabağda aparılan bərpa işləri və regionda sülh məsələləri ilə bağlı mühüm fikirlər səsləndirildi. Prezidentin çıxışında diqqət çəkən əsas məsələlərdən biri Azərbaycanın Türk dünyası, İslam aləmi və Qafqaz arasında mühüm mövqeyə malik olmasıdır. Azərbaycan tarixən müxtəlif mədəniyyətlərin və sivilizasiyaların qovuşduğu bir məkan olub. Bu gün də ölkəmiz müxtəlif dövlətlər və xalqlar arasında əlaqələrin inkişafına öz töhfəsini verir. Bakıda belə mühüm tədbirin keçirilməsi Azərbaycanın beynəlxalq və regional nüfuzunun göstəricilərindən biri kimi qiymətləndirilə bilər. Türk dünyasının müxtəlif ölkələrindən və Qafqazın ayrı-ayrı bölgələrindən dini liderlərin Bakıda bir araya gəlməsi qarşılıqlı əlaqələrin, hörmətin və dialoqun əhəmiyyətini göstərir. Tədbirin Seyid Yəhya Bakuvi irsinə həsr olunmuş beynəlxalq konfransla eyni vaxtda keçirilməsi də xüsusi əhəmiyyət daşıyır. Seyid Yəhya Bakuvi Azərbaycan tarixində mühüm iz qoymuş böyük alim, mütəfəkkir və sufi şəxsiyyətlərdən biridir. Onun irsi təkcə Azərbaycanın deyil, bütövlükdə İslam dünyasının mənəvi və elmi tarixinin mühüm hissəsidir.
Prezident çıxışında Nizami Gəncəvi, Xaqani Şirvani, İmadəddin Nəsimi, Seyid Yəhya Bakuvi, Şah İsmayıl Xətai və Məhəmməd Füzuli kimi böyük şəxsiyyətlərin adlarını xatırlatmaqla Azərbaycanın zəngin tarixə və böyük mədəni irsə malik olduğunu bir daha diqqətə çatdırdı. Bu şəxsiyyətlərin hər biri Azərbaycan xalqının tarixində mühüm yer tutur. Onların yaradıcılığı Azərbaycan mədəniyyətinin, ədəbiyyatının, fəlsəfi düşüncəsinin və mənəvi dəyərlərinin inkişafına böyük təsir göstərib. Bu baxımdan Seyid Yəhya Bakuvi irsinin dünyaya tanıdılması da Azərbaycanın tarixi və mədəni irsinin təbliği baxımından əhəmiyyətlidir. Prezident İlham Əliyev Azərbaycanın həm Türk dünyasının, həm də Qafqazın ayrılmaz hissəsi olduğunu xüsusi vurğuladı. Bu, ölkəmizin tarixini və coğrafi mövqeyini nəzərə alanda tam aydın görünür. Azərbaycan Türk Dövlətləri Təşkilatının üzvü olan yeganə Qafqaz dövlətidir. Ölkəmiz həm Mərkəzi Asiyanın türk dövlətləri ilə, həm Türkiyə ilə, həm də digər regional ölkələrlə sıx əlaqələr qurur. Azərbaycanın tarixi də bu əlaqələrin dərin köklərə malik olduğunu göstərir. Qafqaz Albaniyası, qədim Qəbələ, Naxçıvan və Atabəylər dövlətinin tarixi kimi nümunələr ölkəmizin çox qədim və zəngin tarixə sahib olduğunu göstərir.
Bu gün Azərbaycan öz coğrafi mövqeyindən və tarixi əlaqələrindən istifadə edərək Türk dünyası ilə Qafqaz arasında əməkdaşlığın inkişafına töhfə verməyə çalışır. Görüşün mühüm istiqamətlərindən biri dini liderlərin cəmiyyətdəki rolu ilə bağlı idi. Dini liderlər yalnız dini məsələlərdə deyil, insanların maariflənməsində, sülh və həmrəyliyin təşviqində də mühüm rol oynaya bilərlər. Dünyada müxtəlif dini və milli zəmində qarşıdurmaların olduğu bir vaxtda dini liderlərin insanları sülhə, qarşılıqlı hörmətə və tolerantlığa çağırması xüsusi əhəmiyyət daşıyır. Azərbaycan uzun illərdir müxtəlif dinlərin və xalqların nümayəndələrinin birgə və qarşılıqlı hörmət şəraitində yaşadığı ölkə kimi tanınır. Bakıda müxtəlif ölkələrdən dini liderlərin bir araya gəlməsi də bu dialoq ənənəsinin davamı kimi qiymətləndirilə bilər.
Gülnaz Məmmədova – Zərdab şəhər sakini, təqaüdçü
