Azərbaycan–Ukrayna əlaqələrinin yeni mərhələsi
2026-cı il aprelin 25-də Ukrayna Prezidenti Volodimir Zelenskinin Azərbaycana rəsmi səfəri iki ölkə arasında münasibətlərin inkişafında mühüm mərhələ kimi dəyərləndirilə bilər. Səfər çərçivəsində keçirilən yüksək səviyyəli görüşlər və mətbuata verilən bəyanatlar Azərbaycan–Ukrayna tərəfdaşlığının dinamik və ardıcıl inkişaf etdiyini bir daha nümayiş etdirmişdir.
Azərbaycan Respublikasının Prezidenti İlham Əliyev mətbuata bəyanatında iki ölkə arasında əlaqələrin dərin tarixi köklərə və möhkəm siyasi təmələ əsaslandığını xüsusi vurğulamışdır. Dövlət başçısı qeyd etmişdir ki, Azərbaycan və Ukrayna liderlərinin görüşləri müntəzəm xarakter daşıyır və bu amil ikitərəfli münasibətlərin inkişafında mühüm rol oynayır. Onun sözlərinə görə, əməkdaşlığın güclü siyasi bazası mövcuddur və bu baza konkret hüquqi sənədlərlə daha da möhkəmləndirilmişdir.İmzalanmış strateji sənədlərdə hər iki dövlətin bir-birinin ərazi bütövlüyünə, suverenliyinə və beynəlxalq səviyyədə tanınmış sərhədlərinin toxunulmazlığına verdiyi dəstək açıq şəkildə ifadə olunmuşdur. Bu prinsipial mövqe bu gün də aktuallığını qoruyur və tərəflər tərəfindən qətiyyətlə müdafiə olunur. Azərbaycan və Ukrayna beynəlxalq təşkilatlar çərçivəsində də bu istiqamətdə qarşılıqlı dəstəyi davam etdirir.
İqtisadi əməkdaşlıq münasibətlərin əsas istiqamətlərindən biri olaraq diqqət mərkəzindədir. Bu xüsusda SOCAR-ın Ukraynada uzun illərdir uğurla fəaliyyət göstərməsi xüsusi əhəmiyyət kəsb edir. Şirkətin fəaliyyəti enerji sahəsində əməkdaşlığın genişlənməsinə, eyni zamanda iki ölkə arasında iqtisadi əlaqələrin möhkəmlənməsinə mühüm töhfə verir. Enerji sahəsində həyata keçirilən layihələr tərəfdaşlığın strateji xarakterini daha da gücləndirir.
Səfər çərçivəsində hərbi-texniki əməkdaşlıq məsələləri də müzakirə olunmuşdur. Tərəflər bu sahədə geniş perspektivlərin mövcud olduğunu qeyd etmiş, müdafiə sənayesi və təhlükəsizlik istiqamətində əməkdaşlığın inkişafının əhəmiyyətini vurğulamışlar. Bu əməkdaşlıq yalnız ikitərəfli münasibətlərin dərinləşməsinə deyil, həm də regional təhlükəsizliyin təmin olunmasına xidmət edir.Ukrayna Prezidentinin Azərbaycana səfəri göstərir ki, iki ölkə arasında münasibətlər strateji xarakter daşıyır və çoxşaxəli əməkdaşlıq gündəliyi ilə zəngindir. Siyasi dialoqun intensivliyi, iqtisadi və enerji sahələrində uğurlu əməkdaşlıq, eləcə də təhlükəsizlik istiqamətində mövcud perspektivlər Azərbaycan–Ukrayna tərəfdaşlığının gələcəkdə daha da inkişaf edəcəyinə əsas verir.
Abdulbağı Fazilli – Zərdab şəhər sakini, fəal gənc
