Azərbaycan təkcə öz enerji ehtiyatlarını deyil, həm də dost və tərəfdaş ölkələrin enerji resurslarını dünya bazarlarına çatdırmaq üçün etibarlı tranzit ölkə kimi çıxış edir
Müasir dövrdə qlobal iqtisadiyyatın inkişafında enerji resurslarının təhlükəsiz və fasiləsiz şəkildə dünya bazarlarına çatdırılması mühüm əhəmiyyət daşıyır. Enerji istehsalçısı olan ölkələrin qarşısında duran əsas məsələlərdən biri yalnız zəngin təbii sərvətlərə malik olmaq deyil, həm də həmin resursların beynəlxalq bazarlara etibarlı marşrutlar vasitəsilə çıxarılmasını təmin etməkdir. Bu baxımdan Azərbaycan son illər ərzində Avrasiya məkanında mühüm nəqliyyat və enerji qovşağına çevrilərək həm özünün, həm də tərəfdaş ölkələrin iqtisadi inkişafına ciddi töhfələr vermişdir.
Azərbaycanın coğrafi mövqeyi ölkəmizə unikal üstünlüklər qazandırır. Şərqlə Qərbin, Şimalla Cənubun kəsişməsində yerləşən Azərbaycan əsrlər boyu mühüm ticarət yollarının üzərində olmuşdur. Müstəqillik dövründə isə bu üstünlük yeni məzmun qazanaraq enerji və nəqliyyat sahələrində beynəlxalq əməkdaşlığın əsas elementlərindən birinə çevrilmişdir. Bu gün Azərbaycan təkcə öz enerji ehtiyatlarını deyil, həm də dost və tərəfdaş ölkələrin enerji resurslarını dünya bazarlarına çatdırmaq üçün etibarlı tranzit ölkə kimi çıxış edir.
Xəzər dənizinin şərq sahillərində yerləşən dövlətlər, xüsusilə Mərkəzi Asiya ölkələri zəngin enerji ehtiyatlarına malikdirlər. Qazaxıstan, Türkmənistan və digər ölkələr böyük həcmdə neft və qaz ehtiyatlarına sahib olsalar da, bu resursların beynəlxalq bazarlara çıxarılması üçün etibarlı və iqtisadi cəhətdən səmərəli marşrutlara ehtiyac duyurlar. Azərbaycan məhz bu baxımdan strateji əhəmiyyət daşıyır. Ölkəmiz öz nəqliyyat və enerji infrastrukturu vasitəsilə Mərkəzi Asiya ölkələrinin dünya bazarlarına inteqrasiyasına mühüm dəstək verir.
Bu gün Qazaxıstanda hasil olunan neftin müəyyən hissəsi Xəzər dənizi vasitəsilə Azərbaycana çatdırılır. Daha sonra həmin neft Bakı-Tbilisi-Ceyhan neft kəməri ilə Aralıq dənizinə, oradan isə dünya bazarlarına nəql olunur. Bu marşrut istehsalçı ölkələr üçün alternativ və təhlükəsiz çıxış yolu yaratmaqla yanaşı, beynəlxalq enerji bazarlarında sabitliyin qorunmasına da xidmət edir.
Bakı-Tbilisi-Ceyhan neft kəməri yalnız Azərbaycan üçün deyil, bütövlükdə region üçün strateji layihə hesab olunur. Uzunluğu 1700 kilometrdən artıq olan bu kəmər Xəzər hövzəsinin enerji ehtiyatlarını Aralıq dənizi vasitəsilə dünya bazarlarına çatdırır. Layihənin həyata keçirilməsi nəticəsində region ölkələri üçün yeni iqtisadi imkanlar yaranmış, enerji resurslarının daşınmasında alternativ marşrut formalaşmışdır.
Fuad Eyvazov – Məmmədqasımlı kənd sakini, sahibkar
