Azərbaycan–Özbəkistan münasibətləri- möhkəm mənəvi və maddi təməl üzərində inkişaf edən tərəfdaşlıq
Azərbaycan ilə Özbəkistan arasında münasibətlər tarixən formalaşmış mənəvi yaxınlıq, qarşılıqlı hörmət və dostluq prinsiplərinə əsaslanır. Son illərdə bu münasibətlər siyasi və iqtisadi sahələrdə əldə olunan mühüm nailiyyətlərlə daha da möhkəmlənərək strateji tərəfdaşlıq səviyyəsinə yüksəlmişdir. İki ölkənin dövlət və hökumətləri arasında mövcud olan qarşılıqlı etimad və sıx əməkdaşlıq xalqlarımızın rifahına xidmət edən birgə layihələrin həyata keçirilməsinə əlverişli şərait yaradır.
Azərbaycan və Özbəkistan hökumətlərinin əsas məqsədlərindən biri iqtisadi inkişafı sürətləndirmək, əhalinin həyat səviyyəsini və sosial rifahını yüksəltmək, mövcud potensialdan səmərəli istifadə etmək və birgə səylər hesabına yeni imkanlar yaratmaqdır. Bu istiqamətdə atılan ardıcıl addımlar iki ölkə arasında əməkdaşlığın yalnız siyasi müstəvidə deyil, konkret layihələr və real nəticələr əsasında inkişaf etdiyini göstərir.
Azərbaycan–Özbəkistan əlaqələrinin mühüm istiqamətlərindən biri Qarabağın və Şərqi Zəngəzurun bərpası və yenidən qurulması prosesində Özbəkistanın fəal iştirakıdır. Prezident Şavkat Mirziyoyevin bu prosesə göstərdiyi xüsusi diqqət və dəstək qardaş ölkənin Azərbaycana münasibətinin bariz nümunəsidir. Özbəkistan tərəfindən Füzuli şəhərində Mirzə Uluqbəy adına 960 şagird yerlik məktəbin inşa edilməsi bu dəstəyin mühüm nümunələrindən biridir.
Xankəndidə tikiş fabrikinin yaradılmasına Özbəkistan tərəfindən investisiya yatırılması işğaldan azad edilmiş ərazilərin iqtisadi potensialının bərpası və burada dayanıqlı məşğulluğun təmin olunması baxımından xüsusi əhəmiyyət daşıyır. Bu cür layihələr yalnız iqtisadi mahiyyət daşımır, eyni zamanda Azərbaycan və Özbəkistan xalqları arasında qardaşlıq münasibətlərinin əməli ifadəsi kimi qiymətləndirilir.
İlk böyük sənaye layihələrindən birinin də Özbəkistanla əlaqəli olması iki ölkə arasında iqtisadi əməkdaşlığın miqyasını və perspektivlərini aydın şəkildə nümayiş etdirir. Qarabağ bölgəsində həyata keçirilən bu layihələr gələcəkdə digər sahələrdə də qarşılıqlı fəaliyyətin genişləndirilməsi üçün möhkəm zəmin yaradır. Hazırda həm Qarabağda, həm də Azərbaycanın digər regionlarında yeni birgə layihələrin həyata keçirilməsi ilə bağlı imkanların mövcudluğu əməkdaşlığın coğrafiyasının genişləndiyini göstərir.
Azərbaycan və Özbəkistan arasında regional layihələrin reallaşdırılması da xüsusi əhəmiyyət kəsb edir. Birgə təşəbbüslərin müxtəlif regionları əhatə etməsi iqtisadi əlaqələrin yalnız paytaxtlarla məhdudlaşmadığını, ölkələrin ayrı-ayrı bölgələrinin də bu əməkdaşlıqdan faydalandığını göstərir. Yeni müəssisələrin yaradılması, investisiya layihələrinin həyata keçirilməsi və istehsal imkanlarının genişləndirilməsi regionların sosial-iqtisadi inkişafına əlavə stimul verir.
Bu gün Azərbaycan–Özbəkistan münasibətləri qarşılıqlı etimad, qardaşlıq və konkret iqtisadi maraqların vəhdəti əsasında inkişaf edir. Qarabağın bərpasında Özbəkistanın göstərdiyi dəstək isə bu münasibətlərin mənəvi və maddi əsaslarının nə qədər möhkəm olduğunu bir daha təsdiqləyir. Azərbaycan və Özbəkistan arasında formalaşmış strateji tərəfdaşlıq bundan sonra da yeni layihələr və təşəbbüslərlə zənginləşəcəkdir. İki qardaş ölkənin birgə səyləri həm milli iqtisadiyyatların inkişafına, həm regionların sosial rifahının yüksəldilməsinə, həm də Azərbaycan ilə Özbəkistan arasında dostluq və qardaşlıq əlaqələrinin daha da möhkəmlənməsinə mühüm töhfə verəcəkdir.
Rəmzi Şirinov-Zərdab rayonu, Dəli Quşçu kənd tam ümumtəhsil orta məktəbinin direktoru
