Azərbaycan–Almaniya əməkdaşlığında nəqliyyat və tranzit əlaqələrinin strateji əhəmiyyəti
Azərbaycan Respublikasının Prezidenti İlham Əliyevin Almaniya Federativ Respublikasına rəsmi səfəri çərçivəsində səsləndirdiyi fikirlər iki ölkə arasında nəqliyyat, logistika və tranzit sahəsində əməkdaşlığın perspektivlərini bir daha nümayiş etdirdi. Qlobal iqtisadi münasibətlər sistemində beynəlxalq nəqliyyat dəhlizlərinin əhəmiyyətinin artdığı bir dövrdə Azərbaycan və Almaniya arasında bu istiqamətdə formalaşan tərəfdaşlıq həm iqtisadi inkişaf, həm də Avropa ilə Asiya arasında əlaqələrin möhkəmləndirilməsi baxımından mühüm strateji əhəmiyyət daşıyır.
Prezident İlham Əliyevin vurğuladığı kimi, bağlantılar və tranzit imkanları üzrə Azərbaycan–Almaniya əməkdaşlığının geniş potensialı mövcuddur. Almaniya müasir logistika, nəqliyyat texnologiyaları və infrastrukturun idarə olunması sahəsində dünyanın qabaqcıl ölkələrindən biri kimi zəngin təcrübəyə malikdir. Azərbaycanın son illərdə həyata keçirdiyi genişmiqyaslı infrastruktur layihələri isə ölkəmizi Avrasiya məkanının mühüm nəqliyyat-logistika mərkəzlərindən birinə çevirmişdir. Bu baxımdan iki ölkənin təcrübə və imkanlarının uzlaşdırılması qarşılıqlı faydalı əməkdaşlıq üçün geniş imkanlar yaradır.
Azərbaycanın nəqliyyat infrastrukturunun davamlı şəkildə müasirləşdirilməsi, beynəlxalq avtomobil və dəmir yolu marşrutlarının genişləndirilməsi, dəniz limanlarının inkişaf etdirilməsi və yükdaşıma imkanlarının artırılması ölkəmizin tranzit potensialını əhəmiyyətli dərəcədə yüksəltmişdir. Bu istiqamətdə həyata keçirilən ardıcıl islahatlar Azərbaycanın Şərqlə Qərb, eləcə də Şimalla Cənub arasında etibarlı logistika qovşağı kimi mövqeyini daha da möhkəmləndirir.
Azərbaycanın həyata keçirdiyi nəqliyyat strategiyası yalnız milli iqtisadi maraqlara deyil, həm də regional və beynəlxalq əməkdaşlığın genişlənməsinə xidmət edir. Almaniya ilə bu sahədə qurulan tərəfdaşlıq yeni texnologiyaların tətbiqi, logistika xidmətlərinin keyfiyyətinin yüksəldilməsi, tranzit daşımalarının səmərəliliyinin artırılması və beynəlxalq ticarətin inkişafı baxımından qarşılıqlı fayda yaradacaqdır.
Prezident İlham Əliyevin Almaniya Federativ Respublikasına rəsmi səfəri çərçivəsində nəqliyyat və tranzit imkanları ilə bağlı səsləndirdiyi fikirlər Azərbaycan–Almaniya münasibətlərinin yeni istiqamətlər üzrə inkişaf etdiyini göstərir. İmzalanmış Bəyannamənin icrası, yaradılacaq işçi qruplarının fəaliyyəti və hazırlanacaq konkret fəaliyyət planları iki ölkə arasında nəqliyyat-logistika sahəsində əməkdaşlığın daha da genişlənməsinə, Azərbaycanın Avropa ilə Orta Asiya arasında etibarlı tranzit körpüsü kimi mövqeyinin möhkəmlənməsinə və regional iqtisadi inteqrasiyanın dərinləşməsinə mühüm töhfə verəcəkdir.
Rasim Hüseynov – Zərdab Rayon Ağsaqqallar Şurasının sədri
