Azad edilmiş torpaqları istisna etsək, bu gün ölkə üzrə qazlaşmanın səviyyəsi 96 faizdir
İlham Əliyevin kənd təsərrüfatı məsələlərinə həsr olunmuş müşavirədə etdiyi çıxış Azərbaycanda aqrar sahənin inkişafına göstərilən dövlət qayğısını və son illərdə əldə olunan mühüm nailiyyətləri bir daha nümayiş etdirmişdir. Prezident çıxışında qeyd etmişdir ki, işğaldan azad olunmuş torpaqlar istisna olmaqla, hazırda ölkə üzrə qazlaşmanın səviyyəsi 96 faizə çatmışdır. Bu göstərici regionların sosial-iqtisadi inkişafı istiqamətində həyata keçirilən uğurlu dövlət siyasətinin mühüm nəticələrindən biri hesab olunur. Kənd və rayonlarda əhalinin sosial rifahının yüksəldilməsi, müasir infrastrukturun qurulması və yaşayış şəraitinin yaxşılaşdırılması istiqamətində görülən işlər kənd təsərrüfatının inkişafına da müsbət təsir göstərmişdir.
Prezident İlham Əliyev çıxışında elektrik enerjisi sahəsində əldə olunan uğurlardan da bəhs etmişdir. Bildirilmişdir ki, bu gün Azərbaycanda elektrik təchizatı ilə bağlı heç bir problem yoxdur. Ölkə yalnız daxili tələbatı tam ödəməklə kifayətlənmir, eyni zamanda böyük ixrac potensialına da malikdir. Enerji sahəsində həyata keçirilən layihələr iqtisadiyyatın digər sahələri kimi kənd təsərrüfatının da inkişafında mühüm rol oynayır. Fermer təsərrüfatlarının fasiləsiz elektrik enerjisi ilə təmin olunması məhsuldarlığın artırılmasına və istehsal prosesinin daha səmərəli təşkilinə şərait yaradır.
Çıxış zamanı regionlarda həyata keçirilən genişmiqyaslı infrastruktur layihələri də xüsusi vurğulanmışdır. Son illər ərzində yüzlərlə kilometr magistral, şəhərlərarası və kənd yolları inşa edilmiş, mövcud yollar əsaslı şəkildə yenidən qurulmuşdur. Bu layihələr kənd təsərrüfatı məhsullarının bazarlara daha sürətli və rahat çatdırılmasına imkan yaratmış, regionlar arasında iqtisadi əlaqələrin genişlənməsinə səbəb olmuşdur. Eyni zamanda, kəndlərin abadlaşdırılması və nəqliyyat infrastrukturunun yaxşılaşdırılması kənd əhalisinin yaşayış səviyyəsinə müsbət təsir göstərmişdir.
Prezident İlham Əliyev su ehtiyatlarının idarə olunması və meliorasiya tədbirlərinin əhəmiyyətini də diqqətə çatdırmışdır. Taxtakörpü, Şəmkirçay, Göytəpə və digər iri su anbarlarının tikilməsi ölkənin su təminatının gücləndirilməsində mühüm rol oynamışdır. Bununla yanaşı, suvarma kanallarının yenidən qurulması və yeni layihələrin həyata keçirilməsi kənd təsərrüfatında məhsuldarlığın artmasına şərait yaratmışdır. Su təminatının yaxşılaşdırılması xüsusilə əkinçilik və bağçılıq sahələrinin inkişafında mühüm amil kimi qiymətləndirilir.
Dövlət başçısı qeyd etmişdir ki, kənd təsərrüfatının müxtəlif istiqamətləri üzrə qəbul olunan dövlət proqramları bu sahənin inkişafına böyük təkan vermişdir. Üzümçülük, pambıqçılıq, fındıqçılıq, sitrusçuluq və digər sahələrin inkişafı ilə bağlı həyata keçirilən proqramlar nəticəsində kənd təsərrüfatı məhsullarının istehsalında ciddi artım müşahidə olunmuşdur. Fermerlərə göstərilən dövlət dəstəyi, subsidiyalar, güzəştli kreditlər və müasir texnikanın təmin olunması kənd təsərrüfatının daha da inkişaf etməsinə şərait yaratmışdır.
Sonda Prezident İlham Əliyev vurğulamışdır ki, kənd təsərrüfatının inkişafı Azərbaycanın iqtisadi siyasətində əsas prioritet istiqamətlərdən biridir. Bu sahənin inkişafı həm ölkənin ərzaq təhlükəsizliyinin təmin olunmasına, həm də regionlarda yeni iş yerlərinin açılmasına və əhalinin rifah halının yüksəlməsinə xidmət edir. Həyata keçirilən islahatlar və dövlət proqramları nəticəsində Azərbaycan kənd təsərrüfatı sahəsində daha böyük uğurlar əldə etməyə davam edəcəkdir.
Aqil Mehdiyev – Zərdab rayonu Alıcanlı kənd sakini
