Aqroparkların yaradılması kənd təsərrüfatının inkişafında çox böyük rol oynamışdır.
Azərbaycanda qeyri-neft sektorunun inkişafı istiqamətində həyata keçirilən dövlət siyasətində kənd təsərrüfatı xüsusi yer tutur. Son illər aqrar sahənin modernləşdirilməsi, müasir texnologiyaların tətbiqi və regionların iqtisadi potensialının gücləndirilməsi məqsədilə mühüm layihələr həyata keçirilib. Bu layihələr arasında aqroparkların yaradılması xüsusi əhəmiyyət daşıyır. Prezident cənab İlham Əliyevin kənd təsərrüfatı məsələlərinə həsr olunmuş müşavirədə qeyd etdiyi kimi, aqroparkların yaradılması kənd təsərrüfatının inkişafında çox böyük rol oynamışdır. Bu fikir ölkəmizdə aqrar islahatların uğurlu nəticələrinin ən mühüm göstəricilərindən biridir.
Aqroparklar kənd təsərrüfatının ənənəvi üsullardan müasir sənaye modelinə keçidini təmin edən mühüm iqtisadi platformadır. Burada torpaq ehtiyatlarından səmərəli istifadə olunur, yüksək məhsuldarlıq əldə edilir və kənd təsərrüfatının bütün mərhələləri vahid sistem şəklində təşkil edilir. Aqroparkların əsas üstünlüyü ondan ibarətdir ki, istehsal, emal, logistika və satış prosesləri bir mərkəzdə cəmləşir. Bu isə həm məhsul itkisini azaldır, həm də fermerlərin gəlirlərinin artmasına şərait yaradır. Dövlət başçısı bildirib ki, aqroparklar yalnız məhsul istehsal edən təsərrüfatlar deyil, həm də regionların sosial-iqtisadi inkişafına xidmət edən mühüm layihələrdir. Bu yanaşma kənd yerlərində məşğulluğun artmasına, əhalinin rifah səviyyəsinin yüksəlməsinə və kənddən şəhərə miqrasiyanın azalmasına mühüm təsir göstərir.
Azərbaycanda fəaliyyət göstərən aqroparklar müasir suvarma sistemləri, innovativ əkin üsulları və yüksək məhsuldarlıq təmin edən texnologiyalarla təchiz olunub. Damcılı suvarma, ağıllı idarəetmə sistemləri, rəqəmsal monitorinq və müasir kənd təsərrüfatı texnikasının tətbiqi məhsul istehsalında keyfiyyət və məhsuldarlığı əhəmiyyətli dərəcədə artırıb. Ənənəvi təsərrüfatlarla müqayisədə aqroparklarda əldə olunan məhsul daha rəqabətqabiliyyətli və ixracyönümlü olur.
Aqroparkların yaradılması ərzaq təhlükəsizliyinin təmin edilməsində də mühüm rol oynayır. Dünyada baş verən iqtisadi böhranlar, iqlim dəyişiklikləri və ərzaq bazarındakı qeyri-sabitlik bir çox ölkələrdə ciddi problemlər yaradır. Belə bir dövrdə Azərbaycanın daxili istehsalı artırması strateji əhəmiyyət daşıyır. Aqroparklar vasitəsilə taxılçılıq, pambıqçılıq, meyvəçilik, heyvandarlıq və digər sahələrdə yüksək istehsal göstəricilərinə nail olunur. Bu isə ölkənin idxaldan asılılığını azaltmaqla yanaşı, ixrac imkanlarını da genişləndirir. Dövlət tərəfindən aqroparklara göstərilən dəstək onların sürətli inkişafını təmin edən əsas amillərdən biridir. Sahibkarlara güzəştli kreditlərin verilməsi, subsidiyaların tətbiqi, vergi və gömrük güzəştləri aqroparkların fəaliyyətini daha da stimullaşdırır. Bununla yanaşı, dövlət tərəfindən elektrik, qaz, su və yol infrastrukturu yaradılır ki, bu da investorların marağını artırır. Prezident İlham Əliyevin rəhbərliyi ilə həyata keçirilən bu siyasət kənd təsərrüfatında yeni inkişaf mərhələsinin formalaşmasına səbəb olub.
Zərdab rayon Əlibəyli kənd tam orta ümumtəhsil məktəbinin direktoru-Kəmalə Əliyeva
