Ağdam bölgəsində Manasın adını daşıyan məktəb qardaşlığımızın daha bir rəmzidir
Azərbaycan və Qırğız xalqları tarixən ortaq dilə, mədəniyyətə və mənəvi dəyərlərə malik qardaş xalqlardır. Bu qardaşlığın təməlində türk dünyasının ortaq irsi, qarşılıqlı hörmət və dostluq dayanır. Ağdam bölgəsində “Manas” adını daşıyan məktəbin fəaliyyət göstərməsi də bu dostluğun və qardaşlığın mühüm rəmzlərindən biridir. “Manas” qırğız xalqının ən möhtəşəm qəhrəmanlıq dastanıdır. Bu dastan təkcə Qırğızıstanın deyil, bütün türk dünyasının zəngin mədəni irsi hesab olunur. Manas obrazı cəsarətin, vətən sevgisinin, birlik və milli dəyərlərə sədaqətin simvoludur. Məktəbə bu adın verilməsi gənc nəslə həmin dəyərlərin aşılanmasına xidmət edir.
Ağdam uzun illər işğalın ağır nəticələrini yaşamış, lakin bu gün yenidən qurulan və dirçələn bölgələrimizdən biridir. Belə bir məkanda Manas adını daşıyan məktəbin mövcudluğu Azərbaycan ilə Qırğızıstan arasında dostluq münasibətlərinin daha da möhkəmlənməsinin göstəricisidir. Bu, iki ölkənin təhsil, mədəniyyət və humanitar sahələrdə əməkdaşlığının inkişafına da töhfə verir. Məktəb yalnız təhsil ocağı deyil, həm də xalqlar arasında dostluq və əməkdaşlıq ideyalarının yaşadıldığı bir məkandır. Burada təhsil alan şagirdlər türk dünyasının ortaq tarixi, mədəniyyəti və mənəvi dəyərləri haqqında daha geniş məlumat əldə edir, qardaş xalqların birliyinin əhəmiyyətini dərk edirlər. Bu cür təşəbbüslər gələcək nəsillərin qarşılıqlı hörmət və həmrəylik ruhunda yetişməsinə şərait yaradır.
Əsgərxan İsazadə – “Rayon Mərkəzi Xəstəxanası” PHŞ-in əməkdaşı
