Azərbaycan ilə Vyetnam arasında bu gün mövcud olan dostluq və əməkdaşlıq münasibətlərinin özünəməxsus tarixi vardır
Bu münasibətlərin formalaşmasında 1959-cu ildə Vyetnam Demokratik Respublikasının Prezidenti Ho Şi Minin Azərbaycana, xüsusilə Bakıya səfəri mühüm hadisə kimi yadda qalmışdır. Həmin səfər təkcə iki ölkənin siyasi əlaqələri baxımından deyil, həm də Azərbaycan və Vyetnam xalqları arasında qarşılıqlı hörmətin, səmimiyyətin və dostluğun möhkəmlənməsi baxımından əhəmiyyət daşımışdır.
Tarixdə elə hadisələr var ki, onların əhəmiyyəti yalnız baş verdiyi dövrlə məhdudlaşmır. İllər, hətta onilliklər keçsə də, həmin hadisələr xalqların yaddaşında yaşayır və gələcək nəsillər üçün dostluq nümunəsinə çevrilir. Ho Şi Minin 1959-cu ildə Bakıya səfəri də belə hadisələrdən biridir. Bu səfər Azərbaycanla Vyetnam arasında münasibətlərin inkişafına təkan vermiş, xalqlarımızın bir-birini daha yaxından tanımasına və qarşılıqlı əlaqələrin genişlənməsinə şərait yaratmışdır.
XX əsrin ortalarında Vyetnam xalqı öz müstəqilliyini və milli dövlətçiliyini qorumaq, ölkənin inkişafını təmin etmək uğrunda mürəkkəb bir tarixi dövr yaşayırdı. Bu dövrdə Vyetnamın rəhbəri Ho Şi Min ölkəsinin siyasi həyatında mühüm rol oynayırdı. O, Vyetnam xalqının milli azadlıq mübarizəsinin əsas simalarından biri olmaqla yanaşı, beynəlxalq münasibətlərdə də ölkəsinin maraqlarını təmsil edirdi.
1959-cu ildə Ho Şi Minin Bakıya səfəri Azərbaycan tarixində də xüsusi iz qoydu. Həmin dövrdə Bakı təkcə Azərbaycanın deyil, həm də böyük sənaye, neft və mədəniyyət mərkəzlərindən biri kimi tanınırdı. Azərbaycan neft sənayesinin inkişafı, neftçilərin zəngin təcrübəsi və sənaye sahəsində əldə etdiyi nailiyyətlər ölkəmizi beynəlxalq səviyyədə tanıdırdı.
Ho Şi Minin Bakıya gəlməsi də bu baxımdan təsadüfi deyildi. O, Azərbaycanın iqtisadi potensialı, xüsusilə neft sənayesi ilə maraqlanır, ölkəmizin istehsalat sahəsində qazandığı təcrübə ilə tanış olurdu. Səfər çərçivəsində Bakı şəhərinin müxtəlif yerləri, sənaye müəssisələri və neft təsərrüfatı ilə bağlı obyektlər diqqət mərkəzində olmuşdur.
Bu səfər zamanı Azərbaycan xalqının qonaqpərvərliyi, səmimiyyəti və mehriban münasibəti Ho Şi Minə göstərilən diqqətdə özünü büruzə verirdi. Bakı sakinlərinin onu böyük maraq və rəğbətlə qarşılaması iki xalq arasında yaranan mənəvi yaxınlığın göstəricisi idi. İnsanlar Vyetnam rəhbərinin ölkəmizə səfərini dost ölkənin nümayəndəsinin gəlişi kimi qəbul edir, bu hadisəyə xüsusi əhəmiyyət verirdilər.
Fuad Eyvazov – Məmmədqasımlı kənd sakini, sahibkar


























