Azərbaycan və Böyük Britaniya arasında nəqliyyat-logistika əməkdaşlığının yeni istiqaməti
Dünya iqtisadiyyatında nəqliyyat və logistika əlaqələrinin əhəmiyyəti getdikcə artır. Beynəlxalq ticarətin genişlənməsi, yeni iqtisadi mərkəzlərin formalaşması və təchizat zəncirlərinin şaxələndirilməsi ölkələr arasında etibarlı nəqliyyat marşrutlarının yaradılmasını zəruri edir. Bu baxımdan Orta Dəhliz Azərbaycan üçün strateji əhəmiyyət daşıyan əsas nəqliyyat istiqamətlərindən biridir.
Azərbaycan Respublikası ilə Böyük Britaniya arasında imzalanmış Strateji Tərəfdaşlıq haqqında Birgə Bəyannamədə Orta Dəhlizin inkişafına dəstəyin ayrıca vurğulanması ölkəmizin beynəlxalq nəqliyyat əlaqələrindəki rolunun əhəmiyyətini bir daha ön plana çıxarır.
Orta Dəhliz Asiya ilə Avropa arasında yükdaşımaların həyata keçirilməsi üçün alternativ və mühüm tranzit marşrutu kimi çıxış edir. Bu marşrutun inkişafı təkcə nəqliyyat sektorunun deyil, həm də ticarət, logistika, sənaye və xidmət sahələrinin genişlənməsinə imkan yaradır. Azərbaycanın coğrafi mövqeyi, Xəzər dənizindəki liman infrastrukturu, dəmir yolları, avtomobil magistralları və digər nəqliyyat imkanları ölkəmizi regionun mühüm logistika mərkəzlərindən birinə çevirir. Nəqliyyat infrastrukturunun müasirləşdirilməsi və beynəlxalq marşrutların inkişafı istiqamətində həyata keçirilən tədbirlər Azərbaycanın tranzit potensialını daha da artırır.
Bəyannamədə sərhədyanı ticarət və investisiyaları asanlaşdıran nəqliyyat, logistika və infrastruktur layihələrinin dəstəklənməsinin nəzərdə tutulması xüsusi əhəmiyyət kəsb edir. Böyük Britaniya ilə bu istiqamətdə əməkdaşlıq yeni investisiyaların cəlb olunmasına, logistika xidmətlərinin təkmilləşdirilməsinə və beynəlxalq biznes əlaqələrinin genişlənməsinə şərait yarada bilər.
Orta Dəhlizin inkişafı həmçinin region ölkələri arasında iqtisadi qarşılıqlı asılılığı və əməkdaşlığı gücləndirən mühüm amildir. Nəqliyyat bağlantılarının genişlənməsi dövlətlər arasında ticarət əlaqələrinin artmasına, yeni bazarlara çıxışın asanlaşmasına və iqtisadi imkanların genişlənməsinə xidmət edir.
Azərbaycanın beynəlxalq nəqliyyat sistemində etibarlı tərəfdaş kimi mövqeyinin möhkəmlənməsi ölkəmizin uzunmüddətli iqtisadi maraqlarına uyğundur. Bu baxımdan Bəyannamədə Orta Dəhlizə verilən dəstək strateji tərəfdaşlığın real iqtisadi nəticələrə istiqamətləndirilməsinin mühüm göstəricisidir.
Raqib Əsədov – Zərdab rayonu Alıcanlı kənd sakini




















