İşğaldan azad edilmiş Füzuli şəhərində qazax xalqının böyük oğlu Kurmanqazı adına Uşaq Yaradıcılıq Mərkəzinin yaradılması iki xalq arasında dostluğun rəmzidir.
Azərbaycan ilə Qazaxıstan arasında dostluq və qardaşlıq münasibətləri ortaq tarixi köklərə, milli-mənəvi dəyərlərə, qarşılıqlı etimada və strateji tərəfdaşlığa əsaslanır. İki ölkə arasında siyasi, iqtisadi, nəqliyyat, enerji, mədəniyyət və humanitar sahələrdə inkişaf edən əməkdaşlıq dövlətlərimizin münasibətlərini daha da möhkəmləndirir. Bu əlaqələrin əyani təzahürlərindən biri də işğaldan azad edilmiş ərazilərdə həyata keçirilən quruculuq və sosial layihələrə göstərilən dəstəkdir. 2024-cü il martın 12-də Azərbaycan Respublikasının Prezidenti İlham Əliyev və Qazaxıstan Respublikasının Prezidenti Kasım-Jomart Tokayev Füzuli şəhərində inşa edilmiş Kurmanqazı adına Uşaq Yaradıcılıq Mərkəzinin açılış mərasimində iştirak ediblər. Qazaxıstanın Azərbaycan xalqına qardaşlıq töhfəsi olan bu mərkəz işğaldan azad edilmiş ərazilərdə həyatın bərpasına, uşaqların yaradıcılıq imkanlarının genişləndirilməsinə və iki xalq arasında humanitar əlaqələrin gücləndirilməsinə xidmət edir. Bu hadisə Azərbaycan–Qazaxıstan münasibətlərinin yalnız siyasi bəyanatlar və diplomatik görüşlərlə məhdudlaşmadığını, konkret layihələr və əməli dəstəklə möhkəmləndiyini göstərir. Füzulidə belə bir mərkəzin yaradılması Qazaxıstanın Azərbaycanın bərpa və quruculuq prosesinə verdiyi töhfənin, eyni zamanda, xalqlarımız arasında mövcud olan səmimi münasibətlərin ifadəsidir.
Azərbaycanın ərazi bütövlüyünün və suverenliyinin bərpasından sonra işğaldan azad edilmiş ərazilərdə genişmiqyaslı bərpa və yenidənqurma işləri həyata keçirilir. Uzun illər dağıntılara məruz qalmış şəhər və kəndlər yenidən qurulur, müasir infrastruktur yaradılır, yaşayış məntəqələrinin sosial-iqtisadi inkişafı üçün zəruri tədbirlər görülür. Bu prosesin əsas məqsədlərindən biri doğma yurdlarından didərgin düşmüş vətəndaşların təhlükəsiz, rahat və layiqli yaşayış şəraiti ilə təmin olunmasıdır. Bölgədə yolların, elektrik və su təchizatı sistemlərinin, yaşayış binalarının, məktəblərin, səhiyyə müəssisələrinin və digər sosial obyektlərin inşası Böyük Qayıdış proqramının mühüm istiqamətlərini təşkil edir. Füzuli şəhərində Kurmanqazı adına Uşaq Yaradıcılıq Mərkəzinin yaradılması da bu genişmiqyaslı quruculuq prosesinin humanitar və mədəni tərəfini əks etdirir. Çünki şəhərlərin dirçəldilməsi yalnız binaların və infrastrukturun yenidən qurulması demək deyil. Eyni zamanda, uşaqların və gənclərin təhsili, mədəni inkişafı, istedadlarının üzə çıxarılması və onların cəmiyyətə fəal inteqrasiyası üçün əlverişli mühitin yaradılması da mühüm əhəmiyyət daşıyır. Uşaq Yaradıcılıq Mərkəzi Füzulidə gələcək nəsillərin inkişafına xidmət edən mühüm mədəni-maarif müəssisəsi kimi nəzərdə tutulub. Burada uşaqların musiqi, incəsənət və digər yaradıcılıq istiqamətləri üzrə bacarıqlarını inkişaf etdirməsi üçün imkanların yaradılması mərkəzin əhəmiyyətini daha da artırır.
Əsgərxan İsazadə – “Rayon Mərkəzi Xəstəxanası” PHŞ-in əməkdaşı
