Cəbrayılın yol infrastrukturu.
Bir şəhərin inkişafını göstərən əsas amillərdən biri onun yollarıdır. Yaxşı yollar insanları bir-birinə, yaşayış məntəqələrini şəhərlərə, şəhərləri isə ölkənin digər bölgələrinə bağlayır. İşğaldan azad olunmuş Cəbrayılda həyata keçirilən yol layihələri də yeni həyatın qurulmasında mühüm rol oynayır. Cəbrayılın işğaldan azad edilməsindən sonra burada genişmiqyaslı bərpa və quruculuq işlərinə başlanılıb. Bu prosesdə yol-nəqliyyat infrastrukturunun yenilənməsi xüsusi yer tutur. Çünki yeni yaşayış məhəllələrinin, sosial obyektlərin və istehsal müəssisələrinin fəaliyyət göstərməsi üçün müasir və rahat yolların olması vacibdir.
İşğal illərində Cəbrayılın yolları da ciddi dağıntılara məruz qalmışdı. Azadlıqdan sonra mövcud yolların yenidən qurulması ilə yanaşı, yeni magistral yolların salınmasına başlanıldı. Cəbrayıl şəhərindən keçən əsas yol layihələrindən biri Horadiz–Cəbrayıl–Zəngilan–Ağbənd istiqamətində inşa edilən müasir avtomobil yoludur. Bu layihə bölgədə nəqliyyat əlaqələrinin daha da yaxşılaşdırılmasına xidmət edir. Yeni yol şəbəkəsi Cəbrayılı digər rayonlarla daha rahat şəkildə əlaqələndirməyə imkan yaradır. Eyni zamanda bu yollar insanların gediş-gəlişini asanlaşdırır, yükdaşımaların sürətlənməsinə və bölgədə iqtisadi fəallığın artmasına şərait yaradır.
Cəbrayıl şəhərinin bərpası çərçivəsində şəhərdaxili yolların və kommunikasiya xətlərinin də yenilənməsi mühüm istiqamətlərdəndir. Yeni yaşayış məhəllələri salındıqca onların nəqliyyat əlaqələri də qurulur. Bu, doğma yurda qayıdan insanların gündəlik həyatının rahat təşkili baxımından böyük əhəmiyyət daşıyır.
Cəbrayılın yol infrastrukturu təkcə rayonun daxilində hərəkətin təmin olunması ilə məhdudlaşmır. Rayonun yerləşdiyi coğrafi mövqe onu daha geniş regional nəqliyyat əlaqələrinin mühüm hissəsinə çevirir. Horadizdən Cəbrayıl və Zəngilan istiqamətində yeni magistral yolların yaradılması Qarabağ və Şərqi Zəngəzur arasında nəqliyyat əlaqələrinin gücləndirilməsinə xidmət edir. Bu yollar həm də Böyük Qayıdış prosesinin mühüm dayaqlarından biridir. İnsanların doğma torpaqlarına qayıtması üçün yalnız evlərin tikilməsi kifayət etmir. Rahat yollar, nəqliyyat əlaqələri, məktəblər, xəstəxanalar, iş yerləri və digər infrastruktur obyektləri də yaradılmalıdır. Cəbrayılda həyata keçirilən quruculuq işləri məhz bu məqsədə xidmət edir.
Son illərdə Cəbrayıl rayonunda yol infrastrukturu ilə bağlı yeni layihələrin həyata keçirilməsi də bu prosesin davam etdiyini göstərir. 2025-ci ildə “Şəfəq” Günəş Elektrik Stansiyasına gedən avtomobil yolunun istifadəyə verilməsi rayonun enerji və nəqliyyat infrastrukturunun paralel şəkildə inkişaf etdirildiyini göstərən nümunələrdəndir. Cəbrayılın yollarında görülən işlər şəhərin gələcəyinə hesablanıb. Yeni yollar yalnız asfalt örtüyü deyil, həm də insanların rahat və təhlükəsiz hərəkəti, iqtisadi fəaliyyətin genişlənməsi və yaşayış məntəqələri arasında əlaqələrin möhkəmləndirilməsi deməkdir.
Bu gün Cəbrayılın yolları şəhərin yeni simasının mühüm hissəsinə çevrilir. Dünən dağıdılmış və baxımsız vəziyyətdə olan yolların yerində müasir nəqliyyat infrastrukturu yaradılır. Bu dəyişiklik Cəbrayılın işğaldan azad olunmasından sonra başlayan böyük bərpa prosesinin mühüm göstəricilərindəndir.
Zərdab rayon Salahlı kənd ümumi orta ümumtəhsil məktəbinin direktoru-Rəşad İsmayılov
