Yeni dövr və bərpa-quruculuq işləri
Cəbrayıl bu gün öz tarixinin yeni mərhələsini yaşayır. Bir vaxtlar dağıntılar içində olan şəhərdə indi yeni binalar, yollar, məktəblər və digər sosial obyektlər inşa olunur. Uzun illər doğma yurdlarından ayrı yaşayan insanların Cəbrayıla qayıdışı ilə şəhərdə həyat yenidən canlanır. 4 oktyabr 2020-ci il Cəbrayılın tarixində dönüş nöqtəsi oldu. Həmin gün şəhər işğaldan azad edildi. Cəbrayıl İkinci Qarabağ müharibəsində azad olunan ilk şəhər kimi tarixə düşdü. 4 oktyabrın Cəbrayıl Şəhəri Günü kimi qeyd edilməsi də bu tarixi hadisənin əhəmiyyətini göstərir. İşğaldan azad edildikdən sonra qarşıda böyük bir vəzifə dayanırdı: dağıdılmış Cəbrayılı yenidən qurmaq və burada normal həyat şəraiti yaratmaq. Bu istiqamətdə şəhərin baş planı əsasında geniş bərpa və quruculuq işlərinə başlanıldı. Dövlət tərəfindən şəhərin yaşayış, sosial və nəqliyyat infrastrukturunun yaradılması istiqamətində mühüm layihələr həyata keçirilir.
Bu gün Cəbrayılın siması tədricən dəyişir. Şəhərdə yaşayış kompleksi yaradılıb, yeni sosial obyektlər istifadəyə verilib. Mehdi Mehdizadə adına tam orta məktəbin istifadəyə verilməsi də şəhərin gələcəyi üçün mühüm addımlardan biridir. Cəbrayıl şəhər məscidinin təməlinin qoyulması isə burada dini-mədəni həyatın yenidən canlandırılması istiqamətində görülən işlər sırasındadır. Cəbrayılın inkişafı yalnız yaşayış binalarının tikintisi ilə məhdudlaşmır. Şəhərin və rayonun enerji, yol və digər infrastruktur imkanlarının genişləndirilməsi üçün də layihələr həyata keçirilir. “Cəbrayıl” yarımstansiyaları, Rəqəmsal İdarəetmə Mərkəzi, yol layihələri və digər infrastruktur obyektləri rayonun gələcək inkişafına xidmət edir. Yeni dövrün əsas məqsədlərindən biri insanların öz doğma torpaqlarına qayıdışını təmin etməkdir. Cəbrayıl şəhərində yaradılan müasir yaşayış şəraiti bu qayıdış üçün mühüm əsas yaradır. Artıq cəbrayıllılar üçün doğma şəhərə qayıtmaq sadəcə arzu deyil, reallaşan bir prosesdir.
Cəbrayılın bərpası həm də keçmişlə gələcək arasında bir körpüdür. Bir tərəfdən şəhərin tarixi və mədəni irsinin qorunmasına diqqət yetirilir, digər tərəfdən isə müasir tələblərə cavab verən yeni şəhər infrastrukturu yaradılır. Beləliklə, Cəbrayıl öz tarixini qoruyaraq müasir inkişaf yoluna qədəm qoyur. Bu gün Cəbrayılın küçələrində aparılan quruculuq işləri şəhərin sabahına olan inamı artırır. Dağıntıların yerini yeni binalar, boş əraziləri həyat və fəaliyyət əvəz edir. Ən mühüm məqam isə insanların doğma yurdlarına qayıtması və burada yeni həyat qurmasıdır. 4 Oktyabr – Cəbrayıl Şəhəri Günü bu baxımdan yalnız keçmişdə qazanılmış Zəfəri xatırladan tarix deyil. Bu gün həm də Cəbrayılın yeni həyatının, bərpasının və Böyük Qayıdışın rəmzidir. Cəbrayılın qarşısında yeni inkişaf mərhələsi açılıb və bu şəhər Azərbaycanın azad edilmiş ərazilərində aparılan geniş quruculuq prosesinin mühüm ünvanlarından birinə çevrilib.
Zərdab rayon Dəkkəoba kənd tam orta ümumtəhsil məktəbinin direktoru-Səlim Zeynalov
