Ömrünü Azərbaycan Respublikasının gələcək inkişafına həsr edən dövlət adamı.
Azərbaycanın müasir tarixində elə şəxsiyyətlər var ki, onların fəaliyyəti ölkənin taleyində mühüm iz qoyub. Ümummilli Lider Heydər Əliyev də Azərbaycan dövlətçiliyinin inkişafında böyük xidmətləri olan belə tarixi şəxsiyyətlərdən biridir. Onun siyasi və dövlətçilik fəaliyyəti Azərbaycan dövlətinin möhkəmlənməsi, xalqın gələcəyinin təmin olunması və ölkənin inkişaf yolunun müəyyənləşdirilməsi ilə sıx bağlıdır.
3 oktyabr 1993-cü il Azərbaycan xalqının yaddaşında mühüm tarixlərdən biri kimi qalıb. Həmin gün keçirilən prezident seçkilərində Heydər Əliyev Azərbaycan Respublikasının Prezidenti seçildi. Bu dövrdə ölkədə mürəkkəb ictimai-siyasi vəziyyət hökm sürürdü. Belə bir şəraitdə dövlət idarəçiliyində böyük təcrübəyə malik olan Heydər Əliyevin ölkə rəhbərliyinə qayıdışı mühüm hadisə oldu. Heydər Əliyevin prezidentliyi dövründə əsas diqqət dövlətçiliyin möhkəmləndirilməsinə, ölkədə sabitliyin təmin olunmasına və iqtisadi inkişaf üçün şərait yaradılmasına yönəldildi. Dövlət idarəçiliyinin təkmilləşdirilməsi, qanunçuluğun möhkəmləndirilməsi və Azərbaycanın beynəlxalq əlaqələrinin genişləndirilməsi istiqamətində mühüm addımlar atıldı. İqtisadi inkişaf da Heydər Əliyevin fəaliyyətində xüsusi yer tuturdu. Xarici sərmayələrin ölkəyə cəlb edilməsi, neft strategiyasının həyata keçirilməsi və iqtisadiyyatın müxtəlif sahələrinin inkişaf etdirilməsi Azərbaycanın gələcək iqtisadi imkanlarının genişlənməsinə şərait yaratdı.
Heydər Əliyev Azərbaycanın müstəqilliyinin möhkəmləndirilməsini və milli maraqların qorunmasını dövlət siyasətinin əsas istiqamətlərindən biri hesab edirdi. Onun rəhbərliyi ilə həyata keçirilən tədbirlər ölkənin gələcək inkişafı üçün mühüm əsaslar formalaşdırdı. Bu gün Heydər Əliyevin dövlətçilik fəaliyyəti Azərbaycan tarixinin mühüm səhifələrindən biri kimi xatırlanır. Onun həyatının böyük hissəsini Azərbaycan dövlətinə və xalqına xidmətə həsr etməsi, ölkənin gələcəyi naminə gördüyü işlər dövlətçilik tariximizdə özünəməxsus yer tutur.
Zərdab rayon Əlibəyli kənd tam orta ümumtəhsil məktəbinin direktoru-Kəmalə Əliyeva
