Biz nəinki öz ənənələrimizi, öz həyat tərzimizi qoruyub saxladıq, o cümlədən onları gücləndirdik.
Xalqı xalq edən onun dili, tarixi, milli dəyərləri, adət-ənənələri və həyat tərzidir. Bu dəyərlər nəsildən-nəslə ötürülərək xalqın yaddaşında yaşayır, insanların birliyini və milli kimliyini qoruyur. Azərbaycan xalqı da müxtəlif tarixi dövrlərdə qarşılaşdığı çətinliklərə baxmayaraq, öz mənəvi sərvətlərini yaşatmağı bacarıb. Prezident İlham Əliyev 2026-cı il oktyabrın 27-də Bakıda keçirilən “Ortaq gələcək naminə dialoq” mövzusunda VII Ümumdünya Mədəniyyətlərarası Dialoq Forumunda çıxışı zamanı Azərbaycanın milli dəyərlərinin qorunmasına toxunub. Dövlət başçısının səsləndirdiyi “Biz nəinki öz ənənələrimizi, öz həyat tərzimizi qoruyub saxladıq, o cümlədən onları gücləndirdik” fikri xalqımızın milli kimliyinə bağlılığını ifadə edir.
Azərbaycanın tarixi göstərir ki, xalqımız müxtəlif siyasi və ictimai dəyişikliklərdən keçib. Zaman dəyişib, həyat şəraiti yenilənib, cəmiyyətdə yeni münasibətlər formalaşıb. Lakin bütün bu dəyişikliklərə baxmayaraq, xalqımız öz dilini, mədəniyyətini, adət-ənənələrini və mənəvi dəyərl Milli ənənələrimiz gündəlik həyatımızda özünü aydın şəkildə göstərir. Novruz bayramının qeyd olunması, böyüklərə hörmət, kiçiklərə qayğı, qonaqpərvərlik, ailə bağlarının qorunması və çətin gündə bir-birinə dayaq olmaq xalqımızın əsrlər boyu yaşatdığı dəyərlərdəndir. Bu xüsusiyyətlər Azərbaycan cəmiyyətində insanlar arasında mehribanlığın və qarşılıqlı hörmətin möhkəmlənməsinə kömək edir. Ana dilimiz də milli kimliyimizin əsas dayaqlarından biridir. Azərbaycan dili xalqımızın tarixini, düşüncəsini, ədəbiyyatını və mədəniyyətini özündə yaşadır. Nağıllarımız, dastanlarımız, bayatılarımız, atalar sözlərimiz və xalq mahnılarımız keçmişimizdən bu günümüzə gəlib çatan mənəvi sərvətlərdir. Dilimizi qorumaq və onu gələcək nəsillərə düzgün şəkildə ötürmək hər birimizin borcudur. Ənənələri qorumaq keçmişdə yaşamaq demək deyil. Əksinə, öz köklərini tanıyan xalq müasir dünyada da özünəməxsus yer tuta bilər. Bu gün Azərbaycan gəncləri müasir təhsil alır, yeni texnologiyalardan istifadə edir, dünyanın müxtəlif ölkələri ilə əlaqələr qururlar. Bununla yanaşı, milli musiqimizi dinləmək, tariximizi öyrənmək, adət-ənənələrimizi yaşatmaq və ana dilimizə hörmət etmək milli kimliyimizin qorunmasına xidmət edir.
Milli dəyərlərin gücləndirilməsində ailənin, məktəbin və cəmiyyətin rolu böyükdür. Uşaqlar ilk növbədə ailədə böyüklərə hörməti, mərhəməti, dürüstlüyü və qonaqpərvərliyi öyrənirlər. Məktəblərdə milli tariximizin, ədəbiyyatımızın və mədəniyyətimizin tədrisi isə gənclərin öz köklərini daha yaxşı tanımasına imkan yaradır. Azərbaycanın zəngin mədəniyyəti ölkəmizin beynəlxalq aləmdə tanınmasına da töhfə verir. Muğam sənətimiz, xalçaçılıq ənənələrimiz, milli mətbəximiz və xalq yaradıcılığımız mədəni irsimizin mühüm hissələridir. Bu dəyərlərin dünyada tanıdılması xalqımızın tarixini və həyat tərzini başqa xalqlara çatdırmağa kömək edir. Bu gün qarşımızda duran əsas vəzifələrdən biri milli irsimizi yalnız qorumaq deyil, onu inkişaf etdirərək gələcək nəsillərə çatdırmaqdır. Bunun üçün gənclərimizi milli dəyərlərə bağlı ruhda yetişdirməli, ana dilimizə qayğı göstərməli və mədəni sərvətlərimizi yaşatmalıyıq. Bu dəyərlərin inkişaf etdirilməsi xalqımızın birliyini möhkəmləndirir, milli kimliyimizi qoruyur və gələcəyə inamımızı artırır. Keçmişimizə sahib çıxmaq, bu günümüzü dəyərləndirmək və milli sərvətlərimizi gələcək nəsillərə ötürmək hər birimizin məsuliyyətidir.
Zərdab rayon Əlibəyli kənd tam orta ümumtəhsil məktəbinin müəllimi-Aliyə Rüstəmova
