Siyasətdə Ulu Öndər Heydər Əliyev üslubu
Azərbaycanın müasir siyasi tarixində özünəməxsus dəst-xətti, idarəçilik və siyasi fəaliyyəti ilə seçilən dövlət xadimlərindən biri Ulu Öndər Heydər Əliyev olmuşdur. Onun siyasi fəaliyyəti yalnız ayrı-ayrı qərar və hadisələrlə deyil, hadisələrə kompleks yanaşması, siyasi proseslərin mahiyyətini dərindən təhlil etməsi və qəbul etdiyi qərarların nəticələrini əvvəlcədən nəzərə alması ilə xarakterizə olunurdu.
Ulu Öndərin daxili siyasətə yanaşması da dövlətçilik prinsipləri ilə sıx bağlı olmuşdur. Azərbaycanın daxili siyasətini istiqamətləndirərkən əsas diqqəti dövlət institutlarının möhkəmləndirilməsinə, ictimai-siyasi sabitliyin təmin edilməsinə və ölkənin davamlı inkişafı üçün zəruri şəraitin yaradılmasına yönəldirdi. Onun siyasi fəaliyyətində dövlətin gücləndirilməsi və milli maraqların qorunması başlıca istiqamətlərdən biri kimi çıxış edirdi.
Ümummilli liderin xarici siyasətə yanaşması da onun siyasi üslubunun mühüm göstəricilərindən biri idi. Azərbaycanın xarici siyasətini beynəlxalq hüquq normalarına uyğun, məqsədyönlü və tarazlaşdırılmış şəkildə aparmağa xüsusi əhəmiyyət verirdi. Müstəqil Azərbaycanın milli maraqlarının beynəlxalq müstəvidə qorunması, ölkənin beynəlxalq əlaqələrinin genişləndirilməsi və müxtəlif dövlətlərlə qarşılıqlı münasibətlərin inkişaf etdirilməsi xarici siyasətin əsas istiqamətlərindən idi.
Ulu Öndərin siyasətində xalq amili də xüsusi əhəmiyyət daşıyırdı. Dövlət siyasətinin həyata keçirilməsində xalqın maraqlarının nəzərə alınması, milli dəyərlərin qorunması və dövlətçilik ideyasının cəmiyyətdə möhkəmləndirilməsi onun fəaliyyətinin əsas istiqamətlərindən biri olmuşdur. Azərbaycançılıq ideyasının siyasi düşüncədə mühüm yer tutması da milli birlik və dövlətçilik anlayışlarının möhkəmləndirilməsinə xidmət edən amillər sırasında idi.
Ulu öndər Heydər Əliyev siyasi fəaliyyətində kadr məsələsinə də xüsusi diqqət yetirirdi. Peşəkar, məsuliyyətli və dövlətə sədaqətli kadrların formalaşdırılmasını dövlət idarəçiliyinin səmərəliliyi baxımından vacib hesab edirdi. Dövlət strukturlarında intizamın, məsuliyyətin və peşəkarlığın gücləndirilməsi onun idarəçilik fəlsəfəsində mühüm yer tuturdu.
Ulu Öndərin siyasi irsinin mühüm cəhətlərindən biri də strateji düşüncə ilə gündəlik problemlərin həllini bir-birindən ayırmaması idi. O, bir tərəfdən qarşıya çıxan konkret problemlərin həllinə diqqət yetirir, digər tərəfdən isə həmin addımların Azərbaycanın uzunmüddətli inkişafına necə təsir göstərəcəyini nəzərə alırdı. Bu xüsusiyyət siyasi idarəçilikdə ardıcıllığın və dövlət siyasətinin perspektivə hesablanmasının nümunəsi kimi təqdim olunur. Siyasətdə Ulu Öndər Heydər Əliyev üslubu dərin siyasi təhlil, hadisələrin səbəb-nəticə əlaqələrinə nüfuz etmək, qətiyyətli qərar qəbul etmək, milli maraqları əsas götürmək, daxili siyasətdə sabitliyə və dövlətçiliyin möhkəmləndirilməsinə, xarici siyasətdə isə beynəlxalq hüquq normalarına uyğun məqsədyönlü və tarazlaşdırılmış siyasətə əsaslanırdı.
Aytac Həşimzadə- Zərdab rayon İsaqbağı kənd körpələr evi-uşaq bağçasının müdiri
