Qarabağın bərpasında köməyə görə Türkmənistana, əziz qardaşım Arkadağ Qurbanqulu Məlikquliyeviç Berdiməhəmmədova bir daha təşəkkürümü bildirmək istərdim.
Azərbaycan və Türkmənistan arasında dostluq, qardaşlıq və qarşılıqlı hörmət prinsiplərinə əsaslanan münasibətlər son illərdə dinamik inkişaf edir. Ortaq tarixi, mədəni və mənəvi dəyərləri bölüşən iki ölkə siyasi, iqtisadi, nəqliyyat, enerji və humanitar sahələrdə əməkdaşlığın genişləndirilməsinə xüsusi önəm verir. Dövlət başçıları arasında formalaşmış səmimi münasibətlər və yüksək səviyyəli qarşılıqlı səfərlər ikitərəfli əlaqələrin daha da möhkəmlənməsinə, regional əməkdaşlığın güclənməsinə mühüm töhfə verir.
2026-cı il iyunun 22-də Türkmənistan Prezidenti Sərdar Berdiməhəmmədovun Azərbaycana səfəri çərçivəsində keçirilən görüşlər iki ölkə arasında strateji tərəfdaşlığın dərinləşdirilməsi baxımından əlamətdar hadisə kimi qiymətləndirilir. Səfər zamanı tərəflər əməkdaşlığın müxtəlif istiqamətləri üzrə fikir mübadiləsi aparıb, qarşılıqlı maraq doğuran məsələləri müzakirə ediblər. Görüşlərdə iqtisadi əlaqələrin genişləndirilməsi, nəqliyyat-logistika imkanlarının artırılması və birgə layihələrin həyata keçirilməsi əsas müzakirə mövzuları sırasında olub.
Cənab Prezident İlham Əliyev mətbuata bəyanatında Azərbaycan–Türkmənistan münasibətlərinin inkişafına verilən töhfələri yüksək qiymətləndirərək bildirib: “Qarabağın bərpasında köməyə görə Türkmənistana, əziz qardaşım Arkadağ Qurbanqulu Məlikquliyeviç Berdiməhəmmədova bir daha təşəkkürümü bildirmək istərdim. O, ötən ilin iyulunda ölkəmizə səfər edərkən Füzuli şəhərində məscidin tikintisi təşəbbüsünü irəli sürdü və artıq tikintiyə başlanılıb. Bu, Türkmənistanın, onun Ümummilli Liderinin və bütün qardaş Türkmənistan xalqının Azərbaycana səmimi, dostcasına münasibətinin daha bir göstəricisi idi. Mən, həmçinin Sərdar Qurbanquluyeviçə əməkdaşlığa görə minnətdaram. Bu gün, artıq qeyd etdiyim kimi, bir çox məsələlər üzrə ətraflı fikir mübadiləsi apardıq. Konkret tapşırıqlar verildi. Əminəm ki, gələn ay Türkmənistanda keçiriləcək Hökumətlərarası Komissiya çərçivəsində bu gün verdiyimiz tapşırıqlar həmin vaxta qədər hərtərəfli işlənib hazırlanacaq və biz yeni birgə problemlərin həlli, yeni layihələrin reallaşdırılması mərhələsinə keçəcəyik.”
Qarabağın bərpası istiqamətində Türkmənistanın göstərdiyi dəstək iki ölkə arasında qardaşlıq münasibətlərinin praktik təzahürüdür. Füzuli şəhərində inşa edilən məscid layihəsi həm mənəvi dəyərə malik olmaqla yanaşı, həm də Azərbaycan–Türkmənistan dostluğunun rəmzi kimi xüsusi əhəmiyyət daşıyır.
Ekspertlər hesab edirlər ki, səfər zamanı əldə olunan razılaşmalar və verilən tapşırıqlar yaxın dövrdə ikitərəfli əməkdaşlığın daha da genişlənməsinə şərait yaradacaq. Xüsusilə Hökumətlərarası Komissiyanın növbəti iclasında müzakirə olunacaq məsələlər yeni iqtisadi təşəbbüslərin və birgə layihələrin həyata keçirilməsinə təkan verəcək. Bütün bunlar Azərbaycan və Türkmənistan arasında strateji tərəfdaşlığın gələcək illərdə daha da möhkəmlənəcəyini göstərir.
Rüxsarə Eminova – Zərdab rayonu Körpükənd kənd tam orta ümumtəhsil məktəbinin direktoru
