Prezident İlham Əliyevin rəhbərliyi ilə Azərbaycan beynəlxalq hərbi əməkdaşlığın genişləndirilməsinə də böyük önəm verir
Prezident İlham Əliyevin diqqət mərkəzində olan məsələlərdən biri də hərbi qulluqçuların sosial müdafiəsinin gücləndirilməsi olub. Son illərdə yüzlərlə yeni hərbi şəhərcik, qərargah binası, yataqxana, yeməkxana və digər infrastruktur obyektləri tikilib istifadəyə verilib.
Əsgər və zabitlərin məişət şəraitinin yaxşılaşdırılması, onların ailələrinin sosial problemlərinin həlli istiqamətində mühüm addımlar atılıb. Hərbi qulluqçular üçün yaşayış binalarının tikilməsi və mənzil təminatının yaxşılaşdırılması bu siyasətin mühüm tərkib hissəsidir.
Azərbaycan Ordusunun döyüş hazırlığının yüksəldilməsi məqsədilə mütəmadi olaraq genişmiqyaslı hərbi təlimlər keçirilir. Bu təlimlərdə minlərlə hərbi qulluqçu, yüzlərlə texnika və müxtəlif qoşun növləri iştirak edir.
Təlimlər ordunun idarəetmə sisteminin, şəxsi heyətin hazırlıq səviyyəsinin və döyüş qabiliyyətinin daha da artırılmasına xidmət edir. Müasir texnologiyaların tətbiqi və real döyüş şəraitinə uyğun məşqlər Silahlı Qüvvələrin peşəkarlığını əhəmiyyətli dərəcədə yüksəldib.
Prezident İlham Əliyevin rəhbərliyi altında həyata keçirilən ordu quruculuğu siyasətinin ən parlaq nəticəsi 2020-ci ildə baş vermiş 44 günlük Vətən müharibəsində özünü göstərdi.
Azərbaycan Ordusu yüksək peşəkarlıq, müasir silah sistemləri və güclü idarəetmə sayəsində işğal altında olan torpaqlarımızı azad etdi. Bu Qələbə uzun illər ərzində aparılan məqsədyönlü ordu quruculuğu siyasətinin məntiqi nəticəsi oldu.
Müharibə zamanı Azərbaycan Ordusu müasir döyüş taktikasını, pilotsuz uçuş aparatlarının səmərəli tətbiqini və yüksək koordinasiyanı nümayiş etdirərək dünya hərb tarixində yeni təcrübələr formalaşdırdı.
2023-cü ildə həyata keçirilən lokal xarakterli antiterror tədbirləri nəticəsində Azərbaycanın dövlət suverenliyi ölkənin bütün ərazisində tam təmin edildi. Bu uğur da Silahlı Qüvvələrin yüksək hazırlıq səviyyəsinin və dövlət rəhbərliyinin ardıcıl siyasətinin nəticəsi kimi qiymətləndirilir.
Qısa müddət ərzində qarşıya qoyulan vəzifələrin yerinə yetirilməsi Azərbaycan Ordusunun peşəkarlığını və gücünü bir daha nümayiş etdirdi.
Prezident İlham Əliyevin rəhbərliyi ilə Azərbaycan beynəlxalq hərbi əməkdaşlığın genişləndirilməsinə də böyük önəm verir. Müxtəlif ölkələrlə hərbi sahədə əməkdaşlıq müqavilələri bağlanıb, birgə təlimlər keçirilib və təcrübə mübadiləsi həyata keçirilib.
Ordunun idarəetmə sistemində, şəxsi heyətin hazırlığında və logistik təminatda beynəlxalq standartların tətbiqi istiqamətində mühüm işlər görülüb. Bu isə Silahlı Qüvvələrin müasir çağırışlara uyğun inkişafına şərait yaradıb.
Prezident İlham Əliyevin hakimiyyəti dövründə Azərbaycan Ordusunun inkişafı dövlət siyasətinin ən mühüm istiqamətlərindən biri olub. Hərbi büdcənin artırılması, müasir silahların alınması, hərbi sənayenin yaradılması, peşəkar kadr hazırlığı, hərbi qulluqçuların sosial müdafiəsinin gücləndirilməsi və beynəlxalq əməkdaşlığın genişləndirilməsi nəticəsində Azərbaycan Ordusu regionun ən güclü silahlı qüvvələrindən birinə çevrilib.
Cavid Nuriyev – Zərdab şəhər sakini, fəal gənc
