Azərbaycan ilə Özbəkistan arasında münasibətlər son illərdə yeni inkişaf mərhələsinə qədəm qoyub
İki qardaş ölkə arasında siyasi, iqtisadi, mədəni və humanitar əlaqələr möhkəmləndikcə, qarşılıqlı investisiya qoyuluşları da artır. Bu gün Azərbaycan şirkətləri təkcə ölkə daxilində deyil, xarici ölkələrdə də müxtəlif layihələr həyata keçirir. Bu baxımdan Özbəkistan Azərbaycan investorlarının maraq göstərdiyi əsas ölkələrdən birinə çevrilir. Azərbaycan və Özbəkistanı bir-birinə yaxınlaşdıran əsas amillərdən biri xalqlarımızın ortaq tarixi, dili, dini və mədəni dəyərləridir. Lakin müasir dövrdə bu yaxınlıq yalnız mənəvi münasibətlərlə məhdudlaşmır. İki ölkə arasında iqtisadi əməkdaşlıq da sürətlə genişlənir. Qarşılıqlı investisiyalar, birgə müəssisələr, sənaye layihələri, energetika sahəsində əməkdaşlıq, turizm və daşınmaz əmlak layihələri bu münasibətlərin əsas istiqamətlərindən biridir. Azərbaycan da Özbəkistanda investisiya layihələri həyata keçirir. Bu layihələr göstərir ki, Azərbaycan biznesi artıq region ölkələrində fəal şəkildə iştirak edir və öz təcrübəsini yeni bazarlara çıxarır. Azərbaycanın Özbəkistanda həyata keçirdiyi diqqətçəkən layihələrdən biri Daşkənddə inşa olunan hotel və yaşayış kompleksidir. Bu layihə “PASHA Holding” tərəfindən dünyaca məşhur “The Ritz-Carlton” brendi ilə həyata keçirilir. Belə layihələr həm müasir şəhərsalma baxımından, həm də turizm və xidmət sektorunun inkişafı üçün böyük əhəmiyyət daşıyır. Daşkənd sürətlə inkişaf edən böyük şəhərlərdən biridir. Əhalinin sayının artması, biznes fəallığının genişlənməsi və ölkəyə gələn turistlərin çoxalması müasir hotellərə və yaşayış komplekslərinə tələbat yaradır. Azərbaycan şirkətlərinin bu sahəyə sərmayə yatırması həm iqtisadi, həm də qarşılıqlı əməkdaşlıq baxımından mühüm əhəmiyyət kəsb edir.
Azərbaycanın Özbəkistanda həyata keçirdiyi digər böyük layihələrdən biri Daşkənd vilayətində yaradılması nəzərdə tutulan “Sea Breeze Uzbekistan” turizm və yaşayış kompleksidir. Bu layihə Azərbaycanın turizm və istirahət sahəsində topladığı təcrübənin Özbəkistanda da tətbiq olunmasına imkan yaradır. Belə layihələr yalnız binaların tikilməsi demək deyil. Böyük turizm kompleksləri ətrafında restoranlar, mağazalar, xidmət obyektləri, əyləncə mərkəzləri və digər biznes sahələri də inkişaf edir. Nəticədə yeni iş yerləri yaranır, yerli sahibkarlar üçün əlavə imkanlar açılır və bölgələrin iqtisadi fəallığı artır. Azərbaycanın Özbəkistanda investisiya və əməkdaşlıq imkanlarının genişləndiyi mühüm sahələrdən biri energetikadır. Azərbaycan uzun illərdir neft-qaz sektorunda böyük təcrübə qazanıb. Bu təcrübənin qardaş Özbəkistanda tətbiqi hər iki ölkə üçün faydalıdır. 2025-ci ildə SOCAR və Özbəkistanın “Uzbekneftegaz” şirkəti arasında Üstyurt regionundakı investisiya bloklarında geoloji-kəşfiyyat işlərinin aparılması və gələcəkdə karbohidrogen ehtiyatlarının işlənməsi ilə bağlı mühüm razılaşmalar əldə olunub. Bu layihə Azərbaycanın enerji şirkətlərinin Özbəkistanın enerji sektorunda daha fəal iştirak etməsi baxımından xüsusi əhəmiyyət daşıyır. Bu cür layihələr sadə dillə desək, yeraltı sərvətlərin araşdırılması, neft və qaz ehtiyatlarının müəyyən edilməsi və gələcəkdə onların hasilata cəlb olunması məqsədini daşıyır. Bu işlərdə Azərbaycan öz uzun illər ərzində qazandığı təcrübəni, müasir texnologiyalarını və mütəxəssis potensialını ortaya qoyur. Enerji sahəsində əməkdaşlıq təkcə neft və qazla məhdudlaşmır. Azərbaycan, Özbəkistan və Qazaxıstan arasında yaşıl enerji sahəsində də əməkdaşlıq genişlənir. Üç ölkənin enerji sistemlərinin daha sıx əlaqələndirilməsi və gələcəkdə bərpa olunan enerji imkanlarından istifadə edilməsi regional əməkdaşlıq üçün yeni perspektivlər yaradır.
Rasim Hüseynov – Rayon Ağsaqqallar Şurasının sədri
