Azərbaycan–Avropa İttifaqı münasibətlərində yüksələn dinamika
Avropa Komissiyasının Prezidenti Ursula fon der Lyayenin Azərbaycana səfəri və Prezident İlham Əliyevlə keçirdiyi görüş Azərbaycan–Avropa İttifaqı münasibətlərinin inkişafında mühüm siyasi hadisə kimi qiymətləndirilir. Bu səfər göstərdi ki, Azərbaycan Avropa üçün yalnız etibarlı enerji təchizatçısı deyil, eyni zamanda regional təhlükəsizliyin, iqtisadi əməkdaşlığın və nəqliyyat-kommunikasiya əlaqələrinin inkişafında mühüm rol oynayan strateji tərəfdaşdır.
Müasir dövrdə beynəlxalq münasibətlər sistemində baş verən geosiyasi dəyişikliklər, enerji təhlükəsizliyi və alternativ nəqliyyat marşrutlarına artan tələbat Azərbaycan ilə Avropa İttifaqı arasında əməkdaşlığın əhəmiyyətini daha da artırır. Qarşılıqlı hörmət və etibara əsaslanan münasibətlər son illərdə yeni məzmun qazanaraq siyasi, iqtisadi və strateji tərəfdaşlıq səviyyəsinə yüksəlib.
Prezident İlham Əliyevin həyata keçirdiyi müstəqil və milli maraqlara əsaslanan xarici siyasət nəticəsində Azərbaycan Avropa İttifaqının etibarlı tərəfdaşlarından birinə çevrilib. Xüsusilə enerji sahəsində reallaşdırılan irimiqyaslı layihələr ölkəmizin beynəlxalq mövqeyini əhəmiyyətli dərəcədə gücləndirib. Cənub Qaz Dəhlizi, TANAP və TAP layihələrinin uğurla icrası Azərbaycanın təşəbbüskarlığını və qlobal enerji təhlükəsizliyinə verdiyi töhfəni bir daha nümayiş etdirib.
Ursula fon der Lyayenin Bakıya səfəri zamanı keçirilən görüşlərdə də bu məsələlər xüsusi diqqət mərkəzində olub. Avropa Komissiyasının rəhbərliyi Azərbaycanın Avropa üçün strateji əhəmiyyətini yüksək qiymətləndirərək, əməkdaşlığın gələcəkdə daha da genişləndirilməsində maraqlı olduqlarını ifadə edib. Bu yanaşma Azərbaycan ilə Avropa İttifaqı arasında uzunmüddətli tərəfdaşlıq münasibətlərinin daha da möhkəmləndiyini göstərir.
Görüş zamanı enerji sahəsi ilə yanaşı, iqtisadi əməkdaşlıq, nəqliyyat-kommunikasiya layihələri, Orta Dəhlizin inkişafı və regional əməkdaşlıq məsələləri də geniş müzakirə olunub. Bu gün Azərbaycanın əlverişli coğrafi mövqeyi və müasir nəqliyyat infrastrukturu ölkəmizi Avropa ilə Asiyanı birləşdirən əsas tranzit mərkəzlərindən birinə çevirib. Bu reallıq Avropa İttifaqının ölkəmizə marağını daha da artırır və gələcək əməkdaşlıq üçün yeni imkanlar yaradır.
Prezident İlham Əliyevin rəhbərliyi ilə həyata keçirilən uğurlu daxili və xarici siyasət Azərbaycanın beynəlxalq nüfuzunu davamlı şəkildə yüksəldir. Ölkəmiz müxtəlif beynəlxalq tərəfdaşlarla qarşılıqlı faydalı əməkdaşlıq əlaqələri qurmaqla yanaşı, milli maraqlarını qətiyyətlə müdafiə edən etibarlı dövlət kimi tanınır. Avropa İttifaqı ilə münasibətlərin yeni inkişaf mərhələsi də məhz bu uğurlu siyasətin nəticəsidir.
Azərbaycan–Avropa İttifaqı əməkdaşlığının perspektivləri göstərir ki, tərəflər arasında qarşılıqlı etimada əsaslanan münasibətlər bundan sonra da inkişaf edəcək, enerji, iqtisadiyyat, nəqliyyat və digər strateji sahələrdə əməkdaşlıq daha da genişlənəcək. Bu isə həm ölkəmizin beynəlxalq mövqeyinin möhkəmlənməsinə, həm də regionda sabitliyin və davamlı inkişafın təmin olunmasına mühüm töhfə verəcəkdir.
Rasim Hüseynov – Zərdab Rayon Ağsaqqallar Şurasının sədri
