Zərifə Əliyevanın elmi fəaliyyəti.
Akademik Zərifə Əliyeva Azərbaycan tibb elminin inkişafında mühüm rol oynamış görkəmli alimlərdən biridir. Onun elmi fəaliyyəti xüsusilə oftalmologiya sahəsində yenilikçi yanaşmaları və insan sağlamlığına verdiyi töhfələrlə seçilir. 15 aprel – onun anım günü – yalnız bir alim kimi deyil, həm də humanist və vətənpərvər bir şəxsiyyət kimi xatirəsinin ehtiramla yad edildiyi əlamətdar tarixdir.
Zərifə Əliyevanın elmi yaradıcılığı əsasən göz xəstəliklərinin öyrənilməsi və onların müalicə üsullarının təkmilləşdirilməsinə həsr olunmuşdur. O, xüsusilə istehsalat mühitində çalışan insanların görmə orqanına təsir edən zərərli amilləri araşdırmış, peşə xəstəliklərinin qarşısının alınması istiqamətində mühüm elmi nəticələr əldə etmişdir. Alimin bu sahədə apardığı tədqiqatlar nəticəsində bir çox yeni diaqnostika və müalicə üsulları tətbiq edilmişdir ki, bu da minlərlə insanın sağlamlığının qorunmasına xidmət etmişdir. Onun elmi fəaliyyətində diqqət çəkən əsas məqamlardan biri də oftalmologiyada profilaktikanın ön plana çəkilməsidir. Zərifə Əliyeva hesab edirdi ki, xəstəliklərin qarşısını almaq onları müalicə etməkdən daha effektivdir. Bu yanaşma onun apardığı elmi araşdırmaların əsas istiqamətini təşkil etmiş və bu gün də öz aktuallığını qoruyub saxlayır.
Akademik Zərifə Əliyeva yalnız tədqiqatçı alim deyil, həm də yüksək səviyyəli pedaqoq idi. O, uzun illər ərzində gənc həkimlərin hazırlanmasında, onların elmi dünyagörüşünün formalaşmasında böyük zəhmət sərf etmişdir. Onun tələbələri bu gün Azərbaycanın müxtəlif tibb müəssisələrində uğurla fəaliyyət göstərərək müəllimlərinin elmi irsini davam etdirirlər.
Alimin elmi irsi çoxsaylı monoqrafiya, dərslik və elmi məqalələrdə öz əksini tapmışdır. Bu əsərlər yalnız Azərbaycan üçün deyil, beynəlxalq tibb ictimaiyyəti üçün də dəyərli mənbə hesab olunur. Zərifə Əliyevanın oftalmologiya sahəsində qazandığı uğurlar onun adını dünya elminin tanınmış simaları sırasında möhkəmləndirmişdir. Bu gün onun xatirəsi dərin hörmət və ehtiramla yad edilir. Zərifə Əliyevanın həyat və fəaliyyəti gənc nəsil üçün bir nümunədir. Onun elmi irsi, insanlara olan sevgisi və peşəsinə sədaqəti Azərbaycan elminin inkişafında daim yaşayacaq və gələcək nəsillərə ilham verəcəkdir.
Zərdab rayon Əlibəyli kənd tam orta ümumtəhsil məktəbinin direktoru-Kəmalə Əliyeva
