ZƏNGİLAN ŞƏHƏRİ GÜNÜ – BÖYÜK QAYIDIŞIN VƏ MİLLİ QÜRURUMUZUN TƏNTƏNƏSİ
Zəngilan Şəhəri Günü xalqımızın tarixi yaddaşında xüsusi yer tutan, milli qürurumuzu, Vətən sevgimizi və doğma torpaqlarımıza bağlılığımızı özündə əks etdirən əlamətdar günlərdən biridir. Hər il oktyabrın 20-də qeyd olunan Zəngilan Şəhəri Günü Azərbaycanın ərazi bütövlüyünün bərpasının, xalqımızın iradəsinin və tarixi ədalətin təntənəsinin rəmzidir. Zəngilan şəhəri və rayonu Azərbaycanın qədim yaşayış məskənlərindən biri olmaqla, zəngin tarixi, mədəniyyəti, füsunkar təbiəti və əlverişli coğrafi mövqeyi ilə seçilir. Bu torpaq əsrlər boyu xalqımızın milli-mənəvi dəyərlərinin qorunub saxlanıldığı, nəsillərin yetişdiyi və zəngin mədəni irsin formalaşdığı məkanlardan biri olmuşdur. Zəngilanın gözəlliyi, təbii sərvətləri və tarixi abidələri onu Azərbaycanın qiymətli bölgələrindən birinə çevirir. 1993-cü ildə Ermənistan silahlı qüvvələri tərəfindən işğal edilən Zəngilan uzun illər doğma sakinlərinin həsrəti ilə yaşadı. İşğal dövründə şəhər və rayonun yaşayış məntəqələri dağıntılara məruz qaldı, insanların doğma yurdlarına qayıtmaq arzusu illərlə gerçəkləşmədi. Lakin Azərbaycan xalqı heç vaxt öz torpaqlarından imtina etmədi, tarixi torpaqlarımıza qayıdış inamını qoruyub saxladı. 2020-ci il sentyabrın 27-də başlayan Vətən müharibəsi Azərbaycanın tarixində yeni bir səhifə açdı. Müzəffər Azərbaycan Ordusunun qəhrəmanlığı, əsgər və zabitlərimizin şücaəti, xalqımızın birliyi və həmrəyliyi nəticəsində torpaqlarımızın böyük hissəsi işğaldan azad edildi. Oktyabrın 20-də Zəngilan şəhərinin işğaldan azad olunması isə bu tarixi Qələbənin mühüm hadisələrindən biri oldu. Prezident, Müzəffər Ali Baş Komandan cənab İlham Əliyevin rəhbərliyi ilə qazanılan bu Qələbə xalqımızın doğma torpaqlarına qayıdış yolunu açdı. Zəngilanın azad edilməsi yalnız hərbi uğur deyil, həm də illərlə yurd həsrəti çəkən insanların ümidlərinin gerçəkləşməsi demək idi. Bu Qələbə şəhidlərimizin qanının yerdə qalmadığını, Azərbaycan xalqının öz torpaqlarına sahib çıxmaq əzmini bir daha bütün dünyaya nümayiş etdirdi. Zəngilan uğrunda döyüşlərdə qəhrəmanlıq göstərən hərbçilərimizin xatirəsi daim ehtiramla yad edilir.
Bu gün Zəngilanda genişmiqyaslı bərpa və quruculuq işləri həyata keçirilir. Dağıdılmış infrastruktur yenidən qurulur, yollar salınır, yaşayış məntəqələri bərpa edilir, sosial obyektlər yaradılır. Bölgənin iqtisadi potensialının üzə çıxarılması, kənd təsərrüfatının inkişafı, yeni iş yerlərinin açılması və müasir yaşayış şəraitinin təmin edilməsi istiqamətində mühüm addımlar atılır. Zəngilan rayonunun Ağalı kəndində həyata keçirilən layihələr Böyük Qayıdış proqramının əhəmiyyətli nümunələrindəndir. Müasir yaşayış evləri, sosial xidmətlər və infrastrukturla təmin edilən Ağalı kəndi keçmiş məcburi köçkünlərin doğma torpaqlarında yeni həyata başlamasının rəmzinə çevrilib. Bu layihələr işğaldan azad edilmiş ərazilərin müasir standartlara uyğun inkişaf etdirilməsinin göstəricisidir. Zəngilanın gələcək inkişafında onun əlverişli coğrafi mövqeyi və nəqliyyat imkanları da mühüm rol oynayır. Bölgədə həyata keçirilən infrastruktur layihələri Azərbaycanın iqtisadi və tranzit imkanlarını genişləndirməklə yanaşı, Zəngilanın regionun mühüm nəqliyyat və logistika mərkəzlərindən birinə çevrilməsi üçün geniş imkanlar yaradır. Zəngilan Şəhəri Günü bizə Vətən uğrunda canından keçən şəhidlərimizin fədakarlığını, qazilərimizin qəhrəmanlığını və xalqımızın sarsılmaz birliyini xatırladır. Bu əlamətdar tarix gənc nəslin vətənpərvərlik ruhunda tərbiyə olunması, milli tariximizin öyrənilməsi və azad edilmiş torpaqlarımızın qorunmasının vacibliyinin dərk edilməsi baxımından da böyük əhəmiyyət daşıyır. Bu gün Zəngilan keçmişin ağrı-acısından gələcəyin quruculuğuna doğru inamla irəliləyir. Doğma sakinlərin öz yurdlarına qayıtması, şəhərin və kəndlərin yenidən canlanması Azərbaycanın gücünü, xalqımızın əzmini və dövlətimizin inkişaf strategiyasını nümayiş etdirir. Zəngilan Şəhəri Günü mübariz xalqımızın qələbə əzminin, milli birliyinin və Böyük Qayıdışın təntənəsidir.Bu gün Zəngilanın hər bir küçəsi, hər bir yaşayış məntəqəsi xalqımızın qayıdış iradəsini və quruculuq əzmini ifadə edir.
Vaxtilə doğma yurdlarından ayrı düşmüş insanların yenidən öz torpaqlarında yaşaması tarixi ədalətin bərpasının ən gözəl nümunələrindəndir. Qarşıda görüləcək işlər çox olsa da, həyata keçirilən layihələr Zəngilanın gələcəyinə olan inamı daha da artırır.Zəngilan Şəhəri Günü yalnız bir şəhərin azad olunmasını qeyd etmək deyil, həm də xalqımızın qəhrəmanlıq tarixini, milli birliyini və gələcəyə inamını yaşatmaq deməkdir. Bu tarix bizə xatırladır ki, Vətən sevgisi, birlik və qətiyyət ən çətin maneələri belə aşmağa imkan verir. Zəngilanın yenidən qurulması və sakinlərinin doğma torpaqlarına qayıtması Azərbaycanın güclü gələcəyinin mühüm göstəricilərindən biridir. Zəngilanın azadlığı ilə başlanan yeni tarix bu gün quruculuq, tərəqqi və qayıdış salnaməsi kimi davam edir. Əminik ki, yaxın gələcəkdə Zəngilan daha da gözəlləşəcək, inkişaf etmiş yaşayış məkanına çevriləcək və Azərbaycanımızın tərəqqisinə mühüm töhfələr verəcəkdir. Bu əlamətdar gün münasibətilə bütün Azərbaycan xalqını, xüsusilə zəngilanlıları təbrik edir, doğma torpaqlarımızda qurulan yeni həyatın davamlı inkişafını, bölgəyə qayıdan ailələrə firavanlıq və xoşbəxtlik arzulayırıq. Zəngilanımız daim abad, gözəl və firavan olsun!
Yeni Azərbaycan Partiyası
Saatlı rayon təşkilatının sədri
Elşən Əzizov
