Xəzər dənizinin Azərbaycan sektorunda biz 157 giqavatlıq enerji potensialına malikik.
Azərbaycanın enerji siyasətində yeni mərhələ başlayıb. Bu mərhələnin əsas istiqamətlərindən biri bərpaolunan enerji mənbələrindən geniş istifadə, enerji təhlükəsizliyinin daha da möhkəmləndirilməsi və mövcud təbii resurslardan səmərəli istifadə edilməsidir. II Azərbaycan Beynəlxalq İnvestisiya Forumu çərçivəsində keçirilən tədbirdə cənab Prezident İlham Əliyevin çıxışı Azərbaycanın enerji sektorunun qarşıdakı illərdə inkişaf istiqamətlərinə diqqəti bir daha artırıb.
Azərbaycanın malik olduğu zəngin enerji ehtiyatları ölkənin iqtisadi inkişafında mühüm rol oynayıb. Bu gün isə ənənəvi enerji resursları ilə yanaşı, bərpaolunan enerji mənbələri də ölkənin enerji strategiyasının əsas istiqamətlərindən birinə çevrilir. Xüsusilə Xəzər dənizinin Azərbaycan sektorunda mövcud olan böyük külək enerjisi potensialı bu sahədə yeni imkanlar açır.
Cənab Prezident İlham Əliyev çıxışı zamanı bu potensiala xüsusi diqqət yetirərək deyib: “Xəzər dənizinin Azərbaycan sektorunda biz 157 giqavatlıq enerji potensialına malikik. Bundan əlavə, quruda Günəş və külək elektrik stansiyaları artıq fəaliyyətdədir. Beləliklə, bizim hədəfimiz elektrik enerjisi istehsal etmək üçün təbii qaz istehlakını minimuma endirmək və həmin ehtiyatdan ixrac məqsədilə istifadə etməkdir. Qarşıdakı beş il ərzində Azərbaycanın hər yerində bərpaolunan enerji mənbələri olacaq”.
Bu fikirlər Azərbaycanın enerji siyasətində qarşıya qoyulan əsas məqsədlərdən birini aydın şəkildə ortaya qoyur. Ölkədə elektrik enerjisinin istehsalında bərpaolunan mənbələrin payının artırılması həm təbii qazdan daxili istehlak üçün istifadənin azalmasına, həm də qaz ehtiyatlarının ixrac imkanlarının genişləndirilməsinə şərait yaradacaqdır.
Artıq Azərbaycanda günəş və külək elektrik stansiyalarının fəaliyyət göstərməsi bu istiqamətdə atılan addımların praktik nəticələrini nümayiş etdirir. Qarşıdakı illərdə yeni layihələrin həyata keçirilməsi ilə bərpaolunan enerjinin ölkənin enerji sistemində çəkisinin daha da artması gözlənilir.
Xəzər dənizinin Azərbaycan sektorunda 157 giqavatlıq enerji potensialının mövcudluğu ölkənin yaşıl enerji sahəsində geniş imkanlara malik olduğunu göstərir. Bu potensialın mərhələli şəkildə reallaşdırılması yeni investisiyaların cəlb edilməsinə, müasir enerji infrastrukturunun yaradılmasına və elektrik enerjisinin ixrac imkanlarının genişləndirilməsinə imkan verəcəkdir.
Azərbaycanın qarşısında duran əsas vəzifələrdən biri mövcud enerji potensialından səmərəli istifadə etməklə həm daxili tələbatı etibarlı şəkildə təmin etmək, həm də ölkənin enerji ixracatçısı kimi mövqeyini daha da gücləndirməkdir. Bərpaolunan enerji layihələrinin genişləndirilməsi bu baxımdan xüsusi əhəmiyyət daşıyır.
Xəzər dənizinin Azərbaycan sektorunda olan böyük külək enerjisi potensialı, quruda yaradılan günəş və külək elektrik stansiyaları və yeni enerji layihələri Azərbaycanın gələcək enerji mənzərəsinin əsasını təşkil edir. Qarşıdakı beş il ərzində bərpaolunan enerji mənbələrinin ölkənin bütün ərazisində geniş yayılması ilə bağlı qarşıya qoyulan hədəf isə Azərbaycanın enerji sektorunda yeni inkişaf mərhələsinin başlanğıcını göstərir.
Rüxsarə Eminova – Zərdab rayonu Körpükənd kənd tam orta ümumtəhsil məktəbinin direktoru
