Türk dünyası – Azərbaycanın xarici siyasətində ailə və birlik məkanı
Azərbaycanın xarici siyasətində Türk dünyası xüsusi və strateji yer tutur. Prezident İlham Əliyevin Türk Dövlətləri Təşkilatına üzv ölkələrin təhlükəsizlik üzrə rəhbər şəxsləri ilə görüşündə səsləndirdiyi fikirlər də bu yanaşmanın yalnız siyasi bəyanat deyil, ardıcıl və çoxşaxəli əməkdaşlıq siyasəti olduğunu bir daha nümayiş etdirir. Dövlət başçısının “Türk dünyası bizim ailəmizdir” ifadəsi Azərbaycanın türk dövlətləri ilə münasibətlərinin mahiyyətini qısa və aydın şəkildə ifadə edir.
Son illərdə Türk Dövlətləri Təşkilatının beynəlxalq nüfuzunun və əməkdaşlıq imkanlarının genişlənməsi Azərbaycan üçün də yeni perspektivlər yaradıb. Bu prosesdə Azərbaycanın təşəbbüsləri, ikitərəfli və çoxtərəfli münasibətlərin inkişafına verdiyi töhfələr mühüm rol oynayır. Prezident İlham Əliyevin TDT-yə üzv dövlətlərə çoxsaylı səfərləri, həmin ölkələrin dövlət və hökumət başçılarının Azərbaycana səfərləri əlaqələrin yüksək siyasi səviyyəyə çatdığını göstərir.
Azərbaycanın Türkiyə, Qazaxıstan, Qırğızıstan və Özbəkistanla müttəfiqlik haqqında müqavilə və bəyannamələr imzalaması bu münasibətlərin institusional əsaslarını daha da möhkəmləndirib. Müttəfiqlik sənədlərinin imzalanması ilə yanaşı, onların praktik məzmunla zənginləşdirilməsi və qarşılıqlı öhdəliklərin həyata keçirilməsi Türk dövlətləri arasında etimadın dərinləşməsinə xidmət edir.
Əməkdaşlığın mühüm istiqamətlərindən biri iqtisadi və investisiya əlaqələridir. Azərbaycan Qazaxıstan, Özbəkistan və Qırğızıstanla birgə investisiya fondları yaradaraq qarşılıqlı sərmayələrin təşviqi üçün yeni mexanizmlər formalaşdırıb. Bu fondlar yalnız maliyyə aləti kimi deyil, həm də Türk dövlətlərinin iqtisadi potensialının birləşdirilməsi baxımından əhəmiyyət daşıyır. Qarşılıqlı investisiyaların artırılması nəqliyyat, enerji, sənaye, kənd təsərrüfatı və digər sahələrdə yeni layihələrin reallaşdırılmasına imkan yaradır.
Türk dünyası ilə münasibətlərin başqa mühüm xüsusiyyəti təhlükəsizlik və strateji əməkdaşlığın güclənməsidir. Müasir beynəlxalq münasibətlər sistemində təhlükəsizlik məsələləri artıq yalnız ayrı-ayrı dövlətlərin deyil, regional əməkdaşlıq platformalarının da gündəliyində mühüm yer tutur. Bu baxımdan Türk dövlətlərinin təhlükəsizlik sahəsində təcrübə mübadiləsi və qarşılıqlı əlaqələrin genişləndirilməsi ümumi sabitliyə töhfə verə bilər.
Azərbaycanın Türk dünyasına münasibəti eyni zamanda tarixi, mədəni və mənəvi bağlara söykənir. Ortaq dil, tarix, mədəniyyət və dəyərlər siyasi və iqtisadi əməkdaşlıq üçün möhkəm sosial zəmin yaradır. Lakin müasir mərhələdə bu tarixi yaxınlıq konkret layihələr, institusional mexanizmlər və qarşılıqlı fayda əsasında daha sistemli əməkdaşlığa çevrilir.
Prezident İlham Əliyevin “Türk dünyası bizim ailəmizdir və bizim başqa ailəmiz yoxdur” fikri məhz bu reallığın siyasi ifadəsidir. Burada söhbət yalnız emosional bağlılıqdan deyil, Azərbaycanın xarici siyasətində Türk dünyası ilə əməkdaşlığın uzunmüddətli və strateji istiqamət kimi müəyyənləşdirilməsindən gedir.
Bu gün Türk Dövlətləri Təşkilatı qarşısında duran əsas vəzifələrdən biri mövcud potensialı real nəticələrə çevirməkdir. Azərbaycanın təşəbbüsləri isə siyasi dialoqdan iqtisadi tərəfdaşlığa, təhlükəsizlik əməkdaşlığından humanitar əlaqələrə qədər geniş bir istiqaməti əhatə edir. Beləliklə, Türk dünyası Azərbaycan üçün yalnız ortaq keçmişin deyil, həm də ortaq gələcəyin məkanı kimi çıxış edir.
Rəsul Abbasov – Zərdab rayonu Alıcanlı kənd sakini
