Suveren dövlət.
Dövlətin ən böyük dayaqlarından biri onun suverenliyidir. Suveren dövlət öz ərazisində qanunlarını tətbiq edən, daxili və xarici siyasətini müstəqil müəyyənləşdirən, milli maraqlarını qoruyan dövlətdir. Azərbaycan üçün dövlət suverenliyi müstəqilliyimizin əsas göstəricilərindən biridir. Azərbaycan xalqının dövlətçilik tarixi qədim və zəngindir. Müxtəlif dövrlərdə xalqımız öz dövlətini qurub, milli dəyərlərini və dövlətçilik ənənələrini qoruyub. Müasir Azərbaycan Respublikası isə 1991-ci ildə dövlət müstəqilliyini bərpa edərək öz inkişaf yolunu müəyyənləşdirib.
Müstəqilliyin qorunması və dövlət suverenliyinin möhkəmləndirilməsi asan olmayıb. Ölkəmiz müstəqilliyinin ilk illərində bir sıra ciddi problemlərlə qarşılaşıb. Ərazi bütövlüyünün pozulması, işğal və digər çətinliklər dövlətimizin qarşısında mühüm vəzifələr yaradıb. Azərbaycan dövləti bu məsələlərin həlli istiqamətində ardıcıl fəaliyyət göstərib. 2020-ci ildə baş vermiş Vətən müharibəsi Azərbaycanın ərazi bütövlüyünün bərpası istiqamətində mühüm tarixi mərhələ oldu. 2023-cü ilin sentyabrında həyata keçirilən tədbirlərdən sonra Azərbaycanın bütün ərazisində dövlət suverenliyi bərpa edildi. Bu hadisə ölkəmizin müasir tarixində mühüm yer tutur. 20 Sentyabrın Dövlət Suverenliyi Günü kimi qeyd olunması da məhz bu tarixi hadisələrin əhəmiyyətini ifadə edir. Bu gün dövlətimizin ərazi bütövlüyünün və suverenliyinin dəyərini bir daha xatırlamaq, müstəqil dövlətçiliyin əhəmiyyətini gələcək nəsillərə çatdırmaq baxımından əlamətdardır.
Suveren dövlət yalnız öz sərhədlərini qoruyan dövlət deyil. Güclü iqtisadiyyat, sabit dövlət institutları, qanunun aliliyi, təhlükəsizlik, təhsil və sosial inkişaf da dövlətin möhkəmliyini təmin edən əsas amillərdəndir. Dövlətin inkişafı və onun institutlarının davamlı fəaliyyəti ölkənin gələcəyi üçün böyük əhəmiyyət daşıyır. Suverenliyin qorunmasında vətəndaşların da üzərinə mühüm məsuliyyət düşür. Ölkənin qanunlarına hörmət etmək, dövlətə və cəmiyyətə faydalı olmaq, milli dəyərləri qorumaq və gənc nəslin düzgün tərbiyəsinə töhfə vermək hər bir vətəndaşın cəmiyyət qarşısında məsuliyyətidir.
20 Sentyabr – Dövlət Suverenliyi Günü Azərbaycanın keçdiyi tarixi yolu xatırlamaq və gələcəyə inamla baxmaq üçün mühüm gündür. Suverenliyimiz dövlətimizin müstəqilliyinin, xalqımızın birliyinin və Azərbaycanın gələcək inkişafının əsas şərtlərindən biridir. Suveren dövlət – müstəqil qərar verən, öz gələcəyini müəyyən edən və milli maraqlarını qoruyan dövlətdir. Azərbaycanın dövlət suverenliyinin möhkəmləndirilməsi isə hər birimizin ümumi məsuliyyətidir.
Zərdab rayon Gəlmə kənd tam orta ümumtəhsil məktəbinin direktoru-Rasif Qaçayev
