Şuşa sürətlə məskunlaşdırılır
Şuşanın işğaldan azad edilməsindən sonra şəhərin tarixi simasının bərpası, sosial-iqtisadi potensialının inkişaf etdirilməsi və keçmiş məcburi köçkünlərin doğma yurdlarına qayıdışının təmin olunması istiqamətində ardıcıl tədbirlər həyata keçirilir. Dövlət siyasətinin əsas prioritetlərindən biri olan Böyük Qayıdış prosesi çərçivəsində Şuşada müasir yaşayış şəraitinin yaradılması, sosial infrastrukturun genişləndirilməsi, kommunal xidmətlərin təşkili və əhalinin gündəlik tələbatlarının təmin edilməsi istiqamətində mühüm işlər görülür. Şəhərin yenidən qurulması ilə yanaşı, burada daimi yaşayışın bərqərar olması, ailələrin doğma torpaqlarına mərhələli şəkildə köçürülməsi və normal həyat şəraitinin təmin edilməsi xüsusi diqqət mərkəzində saxlanılır.
Şuşanın məskunlaşdırılması prosesi şəhərin tarixi və mədəni əhəmiyyətinə uyğun şəkildə, planlı və mərhələli formada həyata keçirilir. Yeni yaşayış binalarının tikilməsi, mövcud mənzil fondunun bərpası, mühəndis-kommunikasiya sistemlərinin yenilənməsi, təhsil, səhiyyə və digər sosial xidmətlərin əlçatanlığının təmin olunması qayıdan sakinlərin rahat yaşayışı üçün zəruri şərait yaradır. Eyni zamanda, Böyük Qaladərəsi və Kiçik Qaladərəsi kəndlərində məskunlaşmanın genişləndirilməsi Şuşa şəhəri ilə yanaşı, ətraf yaşayış məntəqələrinin də sosial-iqtisadi həyatının dirçəldilməsinə xidmət edir. 23 oktyabr 2026-cı il tarixinə olan məlumata əsasən, Şuşa şəhərində 377 ailə olmaqla, 1 411 nəfər, Böyük Qaladərəsi kəndində 17 ailə olmaqla, 78 nəfər, Kiçik Qaladərəsi kəndində isə 26 ailə olmaqla, 90 nəfər məskunlaşmışdır. Ümumilikdə, Şuşa şəhəri və ətraf kəndlərdə 420 ailənin, 1 579 nəfərin daimi yaşayışı təmin edilmişdir. Bu göstəricilər doğma torpaqlarına qayıdan insanların sayının artdığını, yaşayış məntəqələrinin mərhələli şəkildə əvvəlki həyat ritminə qovuşduğunu əks etdirir.
Məskunlaşma prosesinin genişləndirilməsi Şuşada sosial həyatın canlanmasına, ailə və icma münasibətlərinin yenidən formalaşmasına, iqtisadi fəallığın artmasına da müsbət təsir göstərir. Doğma yurda qayıdan sakinlərin yaşayış şəraitinin yaxşılaşdırılması, məşğulluq imkanlarının yaradılması, sahibkarlıq fəaliyyətinin təşviqi və sosial xidmətlərin inkişaf etdirilməsi şəhərin dayanıqlı inkişafının mühüm şərtləridir. Bu istiqamətdə həyata keçirilən tədbirlər Şuşanın yalnız tarixi-mədəni mərkəz kimi deyil, eyni zamanda insanların yaşadığı, çalışdığı və gələcək planlarını qurduğu müasir şəhər kimi inkişafına zəmin yaradır.
Şuşa və ətraf kəndlərdə məskunlaşmanın davam etdirilməsi Böyük Qayıdışın mühüm mərhələsini təşkil edir. Uzun illər doğma yurdlarından ayrı düşmüş ailələrin öz evlərinə qayıtması tarixi torpaqlarda həyatın yenidən bərpası, sosial mühitin canlanması və milli-mənəvi bağlılığın möhkəmlənməsi baxımından xüsusi əhəmiyyət daşıyır. Şəhərin tarixi simasının qorunması, yeni yaşayış məkanlarının yaradılması və müasir infrastrukturun qurulması Şuşanın gələcək nəsillər üçün yaşanıqlı və inkişaf edən şəhər kimi formalaşmasına xidmət edir.
Mətanət Ağayeva- Zərdab rayon Əlibəyli kənd körpələr evi-uşaq bağçasının müdiri
