Şuşa – doğma yurdun yenidən doğuluşu
Şuşa Azərbaycan xalqının tarixində və yaddaşında xüsusi yeri olan qədim şəhərlərimizdən biridir. Bu şəhər öz gözəl təbiəti, zəngin mədəniyyəti və tarixi abidələri ilə hər zaman diqqət çəkib. Şuşa həm də xalqımızın milli ruhunu, birlik və vətənpərvərlik hisslərini özündə yaşadan müqəddəs bir məkandır. Şuşanın hər küçəsi, hər binası tariximizin bir parçasıdır. Burada Azərbaycan musiqisinin və ədəbiyyatının görkəmli nümayəndələri yetişib. Şuşa muğam sənətinin inkişafında mühüm rol oynayıb. Şəhərin mədəni irsi bu gün də xalqımız tərəfindən qorunur və yaşadılır.
Uzun illər işğal altında qalan Şuşa 2020-ci il noyabrın 8-də Azərbaycan Ordusunun qəhrəmanlığı ilə azad edildi. Bu tarixi qələbə xalqımıza böyük sevinc yaşatdı. Şuşanın azad olunması Vətən müharibəsində əldə etdiyimiz Zəfərin ən mühüm hadisələrindən biri kimi tarixə düşdü. Şuşanın azadlığı uğrunda mübarizə aparan qəhrəmanlarımızın fədakarlığı heç vaxt unudulmayacaq. Onların göstərdiyi şücaət nəticəsində bu gün Azərbaycan bayrağı Şuşada dalğalanır. Bu, xalqımızın gücünün və birliyinin ən parlaq nümunəsidir. Hazırda Şuşada böyük quruculuq işləri görülür. Şəhərin tarixi görkəmi qorunmaqla yeni yollar, yaşayış binaları və sosial obyektlər inşa edilir. Mədəniyyət tədbirləri keçirilir, şəhər yenidən Azərbaycanın mühüm turizm məkanlarından birinə çevrilir. Şuşaya qayıdan sakinlər doğma torpaqlarında yeni həyata başlayırlar.
8 Noyabr – Şuşa Şəhəri Günü bizə azadlığın qiymətini, Vətən sevgisinin gücünü və birlikdə əldə etdiyimiz uğurları xatırladır. Bu gün həm keçmişimizə hörmət, həm də gələcəyimizə inam günüdür. Şuşa yenidən dirçəlir, öz tarixi şöhrətinə qovuşur. Qoy bu gözəl şəhərdə həmişə sevinc, sülh və əmin-amanlıq hökm sürsün. Şuşamız daim Azərbaycanın qürur mənbəyi olaraq yaşasın!
Zərdab rayon Şəftəhal kənd tam orta ümumtəhsil məktəbinin direktoru- Sədiyar Xəlilov
