Sülh şəraitində təhlükəsizliyin təmin edilməsi Azərbaycanın əsas vəzifələrindəndir
Bu gün Azərbaycan yeni siyasi və geosiyasi reallıqların formalaşdığı bir dövrü yaşayır. Azərbaycan ilə Ermənistan arasında uzun illər davam etmiş münaqişənin başa çatdırılması və sülh prosesində əldə olunan nəticələr region üçün yeni imkanlar yaradıb. 2025-ci il avqustun 8-də Vaşinqtonda Azərbaycan və Ermənistan liderlərinin iştirakı ilə Birgə Bəyannamə imzalanıb, sülh sazişinin razılaşdırılmış mətni isə paraflanıb. 2026-cı ildə tərəflər arasında siyasi təmaslar və iqtisadi əlaqələr də davam etdirilir. Azərbaycan neft məhsullarının Ermənistana ixracına başlayıb, üçüncü ölkələrdən Ermənistana yüklərin Azərbaycan ərazisi ilə tranziti həyata keçirilir və iki ölkə arasında ticarət əlaqələri qurulur.
Sülhün əldə olunması regionun gələcəyi baxımından mühüm əhəmiyyət daşıyır. Müharibədən sonra əsas məqsədlərdən biri yeni qarşıdurmaların qarşısını almaq, münasibətləri normallaşdırmaq və regionda iqtisadi əməkdaşlıq imkanlarını genişləndirməkdir. Lakin sülhün olması təhlükəsizlik məsələlərinin əhəmiyyətini azaltmır. Əksinə, davamlı sülh üçün dövlətlərin öz təhlükəsizliyini təmin edə biləcək gücə malik olması vacibdir.
Azərbaycanın yaxın tarixində baş verən hadisələr göstərib ki, ölkənin müdafiə qabiliyyəti daim yüksək səviyyədə olmalıdır. 2020-ci ildə Vətən müharibəsində qazanılan Zəfər və 2023-cü ildə dövlət suverenliyinin tam bərpası Azərbaycanın hərbi gücünün və siyasi iradəsinin mühüm nəticələridir. Bu gün əsas vəzifələrdən biri əldə edilmiş nəticələri qorumaq və ölkənin təhlükəsizliyini gələcəkdə də etibarlı şəkildə təmin etməkdir.
Dünyada baş verən proseslər də bu məsələnin aktuallığını artırır. Müxtəlif regionlarda müharibələr və silahlı qarşıdurmalar davam edir, beynəlxalq münasibətlər sistemində ciddi dəyişikliklər baş verir. Belə bir şəraitdə Azərbaycan öz təhlükəsizliyinə yalnız mövcud vəziyyət baxımından deyil, gələcək riskləri nəzərə alaraq yanaşmalıdır.
Bu baxımdan güclü və müasir ordu quruculuğu dövlət siyasətinin mühüm istiqamətlərindən biridir. Prezident İlham Əliyev Yeni Azərbaycan Partiyasının VIII Qurultayında da hərbi gücün artırılmasını qarşıda duran əsas vəzifələrdən biri kimi qeyd edib və hərbi və təhlükəsizlik sahəsinə böyük maliyyə vəsaitinin ayrılmasının davam etdiriləcəyini bildirib.
Təhlükəsizlik yalnız hərbi sahə ilə məhdudlaşmır. Ölkənin iqtisadi dayanıqlılığı, enerji təhlükəsizliyi, informasiya və kibertəhlükəsizlik, ictimai sabitlik də milli təhlükəsizliyin mühüm hissələridir. Güclü iqtisadiyyat və dayanıqlı dövlət institutları hər hansı xarici təsir və böhran qarşısında ölkənin imkanlarını artırır.
Azərbaycan xalqının bu gün təhlükəsizlik və sabitlik şəraitində yaşaması böyük əhəmiyyət daşıyır. Bu sabitliyin qorunması üçün həm dövlət, həm də cəmiyyət qarşısında məsuliyyət dayanır. Tarixi təcrübə göstərir ki, əldə edilmiş nailiyyətləri qorumaq üçün ayıq-sayıq olmaq, milli birliyi möhkəmləndirmək və dövlətin müdafiə imkanlarını daim inkişaf etdirmək lazımdır.
Sülh və təhlükəsizlik bir-birini tamamlayan anlayışlardır. Azərbaycan regionda sülhün möhkəmlənməsində maraqlıdır, eyni zamanda öz milli maraqlarını və təhlükəsizliyini qorumaq üçün lazımi tədbirləri həyata keçirir. Bu gün qarşıda duran əsas məqsəd əldə olunmuş sülh imkanlarını qorumaq, iqtisadi və sosial inkişafı davam etdirmək və ölkənin təhlükəsizliyini etibarlı şəkildə təmin etməkdir. Azərbaycanın güclü müdafiə qabiliyyətinə malik olması yalnız mümkün təhdidlərə cavab vermək üçün deyil, həm də sülhün qorunması üçün mühüm amildir. Dayanıqlı sülh, güclü iqtisadiyyat, müasir ordu və milli birlik Azərbaycanın gələcək inkişafının əsas dayaqları kimi çıxış edir.
Cavid Nuriyev – Zərdab şəhər sakini, fəal gənc
