Su infrastrukturunun bərpası Füzulidə həyatın bütün sahələrinin inkişafına təsir göstərir
İşğaldan azad edilmiş ərazilərdə həyatın bərpası üçün ilk növbədə etibarlı enerji və su təchizatının təmin edilməsi vacibdir. Elektrik enerjisi yaşayış binalarının, dövlət müəssisələrinin, sosial obyektlərin və istehsal sahələrinin normal fəaliyyətinin əsas şərtlərindən biridir. Su ehtiyatlarından səmərəli istifadə isə həm əhalinin gündəlik tələbatının ödənilməsi, həm də kənd təsərrüfatının inkişafı baxımından mühüm əhəmiyyət daşıyır.
Prezident İlham Əliyevin diqqət və qayğısı nəticəsində Füzuli rayonunda enerji infrastrukturunun yaradılması istiqamətində mühüm layihələr həyata keçirilib. “Füzuli” yarımstansiyasının və Füzuli Rəqəmsal Yarımstansiya və İdarəetmə Mərkəzinin istifadəyə verilməsi rayonun elektrik təchizatı sisteminin qurulması baxımından əhəmiyyətli hadisələrdəndir.
Müasir yarımstansiyaların yaradılması elektrik enerjisinin etibarlı ötürülməsinə, şəbəkənin idarə olunmasının təkmilləşdirilməsinə və yeni yaşayış məntəqələrinin enerji tələbatının qarşılanmasına kömək edir. Rəqəmsal idarəetmə imkanları isə enerji sisteminin fəaliyyətinə nəzarəti asanlaşdırır, nasazlıqların daha operativ müəyyənləşdirilməsinə və texniki proseslərin səmərəli idarə edilməsinə şərait yaradır.
Bu cür infrastruktur layihələrinin əhəmiyyəti yalnız bugünkü ehtiyaclarla məhdudlaşmır. Füzulidə yeni yaşayış sahələrinin genişlənməsi, sosial obyektlərin fəaliyyətə başlaması və iqtisadi fəaliyyətin artması gələcəkdə elektrik enerjisinə tələbatı da yüksəldəcək. Buna görə də enerji infrastrukturunun əvvəlcədən və müasir tələblərə uyğun qurulması rayonun uzunmüddətli inkişafı üçün mühüm şərtdir.
Rayonda həyata keçirilən mühüm layihələrdən biri də Köndələnçay su anbarları kompleksi ilə bağlıdır. Su anbarları su ehtiyatlarının toplanması və idarə olunması, su təchizatı imkanlarının yaxşılaşdırılması və kənd təsərrüfatının suvarma ehtiyaclarının ödənilməsi baxımından əhəmiyyətlidir. Xüsusilə kənd təsərrüfatı potensialı olan ərazilərdə su ehtiyatlarından düzgün istifadə məhsuldarlığın artırılması və torpaqların səmərəli dövriyyəyə qaytarılması üçün vacibdir.
Su infrastrukturunun bərpası Füzulidə həyatın bütün sahələrinin inkişafına təsir göstərir. Əhalinin məskunlaşması, təsərrüfatların qurulması və istehsal fəaliyyətinin genişləndirilməsi üçün su təchizatı mühüm amildir. Bu baxımdan enerji və su layihələri rayonun yenidən qurulmasının əsas dayaqlarından hesab olunur.
Kəmalə Əliyeva – Zərdab rayonu, Qaravəlli kənd tam ümumtəhsil məktəbinin direktoru
