Sabit iqtisadiyyat – gələcək inkişafın möhkəm təməli
Azərbaycanın son illərdə əldə etdiyi iqtisadi nailiyyətlər ölkənin yalnız mövcud imkanlarını genişləndirməyib, həm də gələcək inkişaf üçün etibarlı və dayanıqlı baza formalaşdırıb. Prezident İlham Əliyevin II Azərbaycan Beynəlxalq İnvestisiya Forumu çərçivəsində keçirilən tədbirdə səsləndirdiyi fikirlər də məhz bu reallığın mahiyyətini ortaya qoyur. Dövlət başçısı vurğulayıb ki, görülmüş işlər, sabit iqtisadiyyat və müstəqil maliyyə-iqtisadi sistem formalaşdırılmasaydı, Azərbaycanın gələcək perspektivləri haqqında danışmaq çətin olardı.
Bu yanaşma təsadüfi deyil. İqtisadi sabitlik hər bir ölkənin investisiya cəlbediciliyinin əsas göstəricilərindən biridir. İnvestor üçün yalnız mövcud resurslar deyil, həm də iqtisadi və maliyyə siyasətinin ardıcıllığı, biznes mühitinin proqnozlaşdırıla bilməsi və uzunmüddətli əməkdaşlıq imkanları mühüm əhəmiyyət daşıyır. Azərbaycanın son 20 ildə 350 milyard ABŞ dollarından çox investisiya cəlb etməsi, bunun təxminən yarısının birbaşa xarici investisiyaların payına düşməsi ölkəyə beynəlxalq investorların marağının miqyasını göstərən mühüm göstəricidir.
Formalaşdırılmış investisiya mühiti iqtisadiyyatın müxtəlif istiqamətlərinin inkişafına da imkan yaradıb. Artıq məqsəd yalnız kapital cəlb etmək deyil, həmin kapitalı yeni texnologiyaların, müasir istehsal sahələrinin və yüksək əlavə dəyər yaradan sektorların inkişafına yönəltməkdir. Prezident İlham Əliyevin çıxışında bərpaolunan enerji, logistika, nəqliyyat və regional bağlantılar gələcək iqtisadi artımın əsas istiqamətləri sırasında qeyd olunub.
Azərbaycanın investisiya siyasətində mühüm məqam iqtisadiyyatın şaxələndirilməsidir. Neft-qaz sektorundan əldə olunan gəlirlərin digər sahələrə yönəldilməsi qeyri-neft sektorunun inkişafını sürətləndirən amillərdən biri kimi çıxış edir. Bununla yanaşı, Azərbaycanın nəqliyyat-logistika imkanlarının genişləndirilməsi ölkəni beynəlxalq ticarət və təchizat zəncirlərində daha fəal mövqeyə çıxarmaq məqsədi daşıyır. Dəmir yolları, limanlar, avtomobil yolları və digər infrastruktur layihələri bu strategiyanın mühüm tərkib hissəsidir.
II Azərbaycan Beynəlxalq İnvestisiya Forumunun özü də bu siyasətin beynəlxalq platformada təqdimatı baxımından əhəmiyyətlidir. Forumun əsas mövzusu qlobal iqtisadi münasibətlərin dəyişdiyi bir şəraitdə etimad, bağlantı və investisiya sabitliyi məsələlərinə həsr olunub. Forum çərçivəsində yeni investisiya sənədlərinin imzalanması və iri layihələrlə bağlı qərarların rəsmiləşdirilməsi Azərbaycanın beynəlxalq biznes tərəfdaşları ilə əməkdaşlığının davam etdiyini göstərir.
Sabit iqtisadiyyat və müstəqil maliyyə sistemi Azərbaycanın gələcək inkişaf strategiyasının başlanğıc nöqtəsi kimi çıxış edir. Qarşıdakı mərhələdə əsas vəzifə əldə edilmiş nəticələri qorumaqla yanaşı, investisiya imkanlarını genişləndirmək, iqtisadiyyatın şaxələndirilməsini sürətləndirmək və qeyri-neft sektorunun potensialından daha səmərəli istifadə etməkdir. Bu baxımdan, Azərbaycanın son iki onillikdə yaratdığı iqtisadi baza ölkənin yeni inkişaf mərhələsinə daha hazırlıqlı şəkildə daxil olmasına imkan verən mühüm amil kimi qiymətləndirilir.
Talıb Talıbov – Zərdab rayonu Alıcanlı kənd sakini
