Qələbə diplomatiyası
İkinci Qarabağ müharibəsi dövründə Azərbaycanın hərbi əməliyyatlarla yanaşı, beynəlxalq informasiya və diplomatiya müstəvisində də fəal mübarizə aparması qələbənin mühüm tərkib hissələrindən biri olmuşdur. Cənab Prezident İlham Əliyevin müharibə müddətində həyata keçirdiyi diplomatik fəaliyyət, beynəlxalq media qurumlarına verdiyi çoxsaylı müsahibələr və xarici jurnalistlərlə birbaşa ünsiyyəti Azərbaycanın mövqeyinin dünya ictimaiyyətinə çatdırılması baxımından xüsusi əhəmiyyət daşımışdır.
Müharibə dövründə Cənab Prezident İlham Əliyev dünyanın aparıcı televiziya kanallarına, informasiya agentliklərinə və nüfuzlu media qurumlarına 30-dan çox müsahibə vermişdir. Müxtəlif ölkələri və media platformalarını əhatə edən bu çıxışlar Azərbaycanın informasiya strategiyasının əsas istiqamətlərindən birini təşkil etmişdir. Müsahibələrdə beynəlxalq ictimaiyyətin diqqəti münaqişənin mahiyyətinə, BMT Təhlükəsizlik Şurasının qəbul etdiyi qətnamələrin icra olunmamasına, Azərbaycanın ərazi bütövlüyünün pozulmasına və regionda yaranmış vəziyyətin hüquqi-siyasi əsaslarına yönəldilmişdir. Müsahibələrinin əsas xüsusiyyətlərindən biri konkret faktlara, tarixi hadisələrə, beynəlxalq hüququn norma və prinsiplərinə istinad edilməsi olmuşdur. Sualların məzmunundan və müsahibə aparan jurnalistlərin mövqeyindən asılı olmayaraq, Azərbaycanın dövlət maraqları ardıcıl şəkildə müdafiə edilmiş, ölkəmizə qarşı səsləndirilən əsassız iddialara arqumentlərlə cavab verilmişdir. Bu yanaşma informasiya məkanında Azərbaycanın mövqeyinin sistemli və ardıcıl təqdim olunmasına imkan yaratmışdır.
Qələbə diplomatiyasının digər mühüm istiqaməti beynəlxalq təşkilatlarla aparılan siyasi dialoq və ölkəmizə qarşı yönəlmiş təzyiq cəhdlərinin diplomatik vasitələrlə neytrallaşdırılması olmuşdur. Azərbaycan öz mövqeyini beynəlxalq hüquqa, dövlətlərin suverenliyi və ərazi bütövlüyü prinsiplərinə əsaslandıraraq müdafiə etmiş, münaqişənin həlli ilə bağlı beynəlxalq platformalarda fəal iştirakını davam etdirmişdir. Bu prosesdə diplomatik təmaslar, rəsmi bəyanatlar və beynəlxalq media ilə əlaqələr bir-birini tamamlayan vasitələr kimi çıxış etmişdir. Müxtəlif ölkələrin media nümayəndələri ilə aparılan müsahibələrdə eyni prinsipial mövqenin qorunması, faktların sistemli şəkildə təqdim edilməsi və verilən suallara birbaşa cavabların səsləndirilməsi Azərbaycanın beynəlxalq informasiya fəaliyyətinin xarakterik xüsusiyyətlərinə çevrilmişdir. Bu baxımdan həmin müsahibələr müasir diplomatik kommunikasiya və siyasi nitq strategiyasının öyrənilməsi üçün də əhəmiyyətli nümunə hesab oluna bilər.
Qələbə diplomatiyası müharibədən sonrakı mərhələdə də öz aktuallığını qorumuşdur. Azərbaycanın yeni geosiyasi reallıqların beynəlxalq səviyyədə qəbul etdirilməsi, regionda sülh gündəliyinin irəli sürülməsi, nəqliyyat-kommunikasiya əlaqələrinin bərpası və regional əməkdaşlıq imkanlarının genişləndirilməsi istiqamətində diplomatik fəaliyyəti davam etdirilmişdir. Bu diplomatiya Azərbaycanın milli maraqlarının müdafiəsi, beynəlxalq nüfuzunun artırılması və müharibədən sonrakı siyasi reallıqların formalaşdırılması prosesində mühüm istiqamət kimi çıxış etmişdir.
Mətanət Ağayeva- Zərdab rayon Əlibəyli kənd körpələr evi-uşaq bağçasının müdiri
