Qələbə böyük qürur hissi yaratmaqla yanaşı, hər birimiz üçün məsuliyyət də yaradır
Vətən müharibəsinin ən mühüm nəticələrindən biri də gənc nəslin Vətən anlayışına münasibətinin daha da möhkəmlənməsi oldu. Vətən sevgisi yalnız sözlə ifadə olunan anlayış deyil. Vətən sevgisi öz ölkəsinə vicdanla xidmət etmək, dövlət əmlakını qorumaq, qanunlara hörmət etmək, təhsilə və əməyə ciddi yanaşmaq, cəmiyyət üçün faydalı insan olmaqdır. Şəhid və qazilərimizin qəhrəmanlığını gələcək nəsillərə çatdırmaqla biz milli yaddaşımızı qoruyuruq.
Məktəblərdə, ali təhsil müəssisələrində, dövlət və ictimai təşkilatlarda Vətən müharibəsinin tarixi, şəhidlərimizin həyat yolu və qazilərimizin qəhrəmanlığı barədə maarifləndirici tədbirlərin keçirilməsi bu baxımdan böyük əhəmiyyət daşıyır. Gənclər bilməlidirlər ki, Vətən yalnız yaşadığımız ərazi deyil. Vətən bizim tariximiz, dilimiz, mədəniyyətimiz, milli dəyərlərimiz və gələcəyimizdir.
Qələbədən sonra qarşıda yeni və mühüm vəzifələr yarandı. İşğaldan azad edilmiş ərazilərin bərpası və yenidən qurulması böyük əhəmiyyət daşıyan prosesə çevrildi.
Uzun illər doğma yurdlarından ayrı düşmüş insanların öz torpaqlarına qayıtması xalqımız üçün böyük tarixi hadisədir. Dağıdılmış şəhər və kəndlərin yenidən qurulması, yolların, məktəblərin, xəstəxanaların və digər infrastruktur obyektlərinin yaradılması azad edilmiş ərazilərdə yeni həyatın formalaşmasına xidmət edir.
Bu proses yalnız tikinti və quruculuq işi deyil. Bu, həm də insanların öz doğma torpaqlarına qayıtması, ata-baba yurdlarında yenidən yaşaması deməkdir. Azad edilmiş ərazilərin bərpası gələcək nəsillər üçün mühüm tarixi miras yaradacaqdır.
Qələbə böyük qürur hissi yaratmaqla yanaşı, hər birimiz üçün məsuliyyət də yaradır. Şəhidlərimizin və qazilərimizin qarşısında bizim borcumuz yalnız onların adını yad etməkdən ibarət deyil. Biz onların uğrunda mübarizə apardıqları Azərbaycanın daha da inkişaf etməsinə öz töhfəmizi verməliyik.
Hər bir vətəndaş öz vəzifəsini vicdanla yerinə yetirməli, dövlətə və cəmiyyətə faydalı olmalıdır. Müəllim yaxşı müəllim, həkim vicdanlı həkim, dövlət qulluqçusu məsuliyyətli dövlət qulluqçusu, fəhlə və fermer öz işinin peşəkarı olmaqla Vətənə xidmət edir. Vətənə xidmət yalnız silahla cəbhədə olmur. Sülh dövründə də hər bir insan öz əməyilə ölkəsinin inkişafına töhfə verə bilər.
Şəhidlərimizin xatirəsi daim əziz tutulmalıdır. Onların adlarının məktəblərə, küçələrə və digər obyektlərə verilməsi, xatirə guşələrinin yaradılması, həyat və döyüş yollarının öyrənilməsi gələcək nəsillər üçün mühüm tərbiyə vasitəsidir. Lakin ən böyük ehtiram onların bizə miras qoyduğu Vətənə sahib çıxmaqdır. Şəhidlərin ailələrinə hörmət və diqqət göstərmək, qazilərimizin yanında olmaq, onların həyatında qarşılaşdıqları çətinliklərə həssas yanaşmaq cəmiyyətimizin mənəvi göstəricilərindən biridir. Onların qəhrəmanlığı heç vaxt unudulmamalıdır.
İsmayıl Müseyibli- Böyük Dəkkə kənd sakini, fəal gənc
