“Öz dilini bilməyən, öz dilini sevməyən adam öz tarixini yaxşı bilə bilməz.”
Ana dili hər bir xalqın milli kimliyini, mənəvi dəyərlərini və tarixi yaddaşını yaşadan ən böyük sərvətdir. Xalqın keçdiyi inkişaf yolunu, yaratdığı mədəni irsi və milli düşüncə tərzini gələcək nəsillərə çatdıran əsas vasitə məhz dildir. Ulu Öndər Heydər Əliyevin “Öz dilini bilməyən, öz dilini sevməyən adam öz tarixini yaxşı bilə bilməz” fikri də ana dilinin xalqın taleyində və dövlətçilik ənənələrinin qorunmasında nə qədər mühüm rol oynadığını aydın şəkildə ifadə edir. Azərbaycan dili əsrlər boyu xalqımızın mənəvi zənginliyini özündə yaşadıb. Folklorumuz, klassik ədəbiyyatımız, tarixi salnamələrimiz və milli-mədəni irsimiz bu dil vasitəsilə qorunaraq bu günə gəlib çatıb. Ana dilini dərindən bilən insan xalqının keçmişini, milli-mənəvi dəyərlərini və dövlətçilik ənənələrini daha yaxşı anlayır. Dilini sevən şəxs öz milli kimliyinə bağlı olur, vətəninə sədaqətlə xidmət etməyə çalışır. Azərbaycan dilinin inkişafı və qorunması dövlət siyasətinin mühüm istiqamətlərindən biridir. Bu sahədə həyata keçirilən tədbirlər nəticəsində ana dilimizin cəmiyyətdə mövqeyi daha da möhkəmlənib, onun bütün sahələrdə geniş tətbiqi təmin olunub. Təhsil sistemində Azərbaycan dilinin keyfiyyətli tədrisi, zəngin ədəbi irsin öyrənilməsi və dil mədəniyyətinin inkişaf etdirilməsi milli dəyərlərin gələcək nəsillərə ötürülməsində mühüm rol oynayır. Müasir dövrdə informasiya texnologiyalarının sürətli inkişafı dillər qarşısında yeni çağırışlar yaradır. Xarici sözlərin həddindən artıq işlədilməsi, sosial şəbəkələrdə yazı mədəniyyətinə laqeyd yanaşılması və dil normalarına əməl edilməməsi ana dilinin saflığının qorunmasını daha da aktuallaşdırır. Buna görə də hər bir vətəndaş Azərbaycan dilinə hörmətlə yanaşmalı, onu düzgün və səlis şəkildə işlətməyə çalışmalıdır. Ana dilinin zənginliyini qorumaq yalnız alimlərin və müəllimlərin deyil, bütövlükdə cəmiyyətin ümumi məsuliyyətidir. Gənclərin milli ruhda formalaşması da ana dilinə münasibətdən başlayır. Doğma dilini sevən gənc xalqının tarixini öyrənməyə, milli ədəbiyyatını oxumağa və mədəni irsini qorumağa daha çox maraq göstərir. Bu isə vətənpərvərlik hissinin möhkəmlənməsinə, milli birlik və həmrəyliyin güclənməsinə xidmət edir. Ana dili insanın dünyagörüşünü formalaşdıran, onu mənsub olduğu xalqın tarixi və mədəniyyəti ilə birləşdirən ən möhkəm mənəvi bağdır. Bu gün Azərbaycan dilinin inkişafı, saflığının qorunması və beynəlxalq aləmdə tanıdılması istiqamətində ardıcıl tədbirlər həyata keçirilir. Dövlət dilinin nüfuzunun yüksəldilməsi, dil normalarına əməl olunmasının təşviqi və milli-mənəvi dəyərlərin qorunması ölkəmizin uğurlu inkişaf siyasətinin mühüm istiqamətlərindən biri olaraq qalır. Nəticə etibarilə, ana dilini bilmək və onu sevmək təkcə dilə olan münasibət deyil, həm də tarixə, milli kimliyə və dövlətçiliyə hörmətin ifadəsidir. Öz dilinə sahib çıxan xalq öz keçmişini unutmur, milli dəyərlərini qoruyur və gələcəyini daha möhkəm təməllər üzərində qurur. Hər bir Azərbaycan vətəndaşı ana dilimizi yaşatmalı, onu zənginləşdirməli və gələcək nəsillərə ən qiymətli mənəvi irs kimi ötürməlidir.
Azad Kərimli – Zərdab Gənclər evinin dərnək rəhbəri
