Müasir müharibələrin tələblərinə uyğun kadrların hazırlanması
Müasir dövrdə hərbi əməliyyatların xarakteri sürətlə dəyişir, yeni texnologiyaların tətbiqi, informasiya üstünlüyü uğrunda mübarizə və qeyri-ənənəvi təhlükələrin artması silahlı qüvvələrin qarşısında yeni vəzifələr müəyyənləşdirir. Bu baxımdan, müasir müharibələrin tələblərinə cavab verən peşəkar və yüksək hazırlıqlı hərbi kadrların yetişdirilməsi hər bir dövlətin müdafiə qabiliyyətinin əsas amillərindən biridir.
Azərbaycan Respublikasının Prezidenti, Silahlı Qüvvələrin Ali Baş Komandanı tərəfindən müəyyən edilmiş müdafiə siyasətinə uyğun olaraq Azərbaycan Ordusunun yüksək hazırlıqlı zabit, gizir-miçman, müddətdən artıq həqiqi hərbi xidmət hərbi qulluqçuları və mülki heyətlə keyfiyyətli komplektləşdirilməsi istiqamətində ardıcıl tədbirlər həyata keçirilir. Bu sahədə Azərbaycan Ordusunun Təlim və Tədris Mərkəzinin fəaliyyəti xüsusi əhəmiyyət daşıyır. Təlim və Tədris Mərkəzində ehtiyat zabitlərin hazırlanması, gizir hazırlığı və müddətdən artıq həqiqi hərbi xidmət hərbi qulluqçularının peşəkar bilik və bacarıqlarının artırılması məqsədilə mütəmadi olaraq kurslar və toplanışlar təşkil edilir. Tədris prosesində nəzəri biliklərlə yanaşı, praktiki məşğələlərə, taktiki hazırlığa, qərargah fəaliyyətinin təkmilləşdirilməsinə və döyüş şəraitinə yaxınlaşdırılmış təlimlərə xüsusi diqqət yetirilir. Müasir müharibələrdə uğurun əsas şərtlərindən biri sürətlə dəyişən əməliyyat mühitində düzgün və çevik qərar qəbul etmək bacarığıdır. Buna görə də Azərbaycan Ordusunda kadr hazırlığı prosesində liderlik keyfiyyətlərinin inkişaf etdirilməsi, analitik düşüncənin formalaşdırılması və yüksək adaptasiya qabiliyyətinin artırılması prioritet istiqamətlərdən hesab olunur. Hazırlıq proqramları hərbi qulluqçuların müxtəlif döyüş vəziyyətlərində operativ qərar qəbul etmələrini və mürəkkəb tapşırıqları uğurla yerinə yetirmələrini təmin etməyə yönəldilir.
Kadr hazırlığının daha da təkmilləşdirilməsi məqsədilə xarici ölkələrin qabaqcıl hərbi təcrübələri öyrənilir, beynəlxalq standartlara uyğun tədris metodları tətbiq edilir və əldə olunan biliklər Azərbaycanın milli təhlükəsizlik maraqlarına uyğunlaşdırılır. Müxtəlif ölkələrin hərbi təhsil müəssisələri və təlim mərkəzləri ilə əməkdaşlıq çərçivəsində müasir döyüş təcrübələri, yeni texnologiyaların istifadəsi, pilotsuz uçuş aparatlarının tətbiqi, kiber təhlükəsizlik və informasiya müharibəsi sahələrində əldə olunan nailiyyətlər tədris prosesinə inteqrasiya olunur. 44 günlük Vətən müharibəsində qazanılmış şanlı Qələbə Azərbaycan Ordusunun peşəkarlığının, yüksək döyüş hazırlığının və effektiv kadr siyasətinin bariz nümunəsi olmuşdur.
Müharibədən sonra əldə olunan döyüş təcrübəsi ümumiləşdirilərək təlim proqramlarına daxil edilmiş, şəxsi heyətin hazırlıq səviyyəsinin daha da yüksəldilməsi istiqamətində yeni tədbirlər həyata keçirilmişdir. Bu gün Azərbaycan Ordusunda həyata keçirilən kadr hazırlığı siyasəti müasir çağırışlara cavab verən, yüksək peşəkarlığa malik, vətənpərvər və intizamlı hərbi qulluqçuların yetişdirilməsinə xidmət edir. Aparılan məqsədyönlü islahatlar və davamlı təkmilləşdirmə tədbirləri nəticəsində Azərbaycan Ordusu regionun ən güclü ordularından biri kimi öz mövqeyini daha da möhkəmləndirir və ölkəmizin təhlükəsizliyinin etibarlı təminatçısı olaraq fəaliyyətini uğurla davam etdirir.
Talıb Talıbov – Zərdab rayonu Alıcanlı kənd sakini
