Azərbaycan milli mətbuatı 1875-ci il iyulun 22-də Həsən bəy Zərdabinin nəşr etdirdiyi “Əkinçi” qəzeti ilə öz inkişaf yoluna qədəm qoymuşdur. Həmin tarixdən etibarən milli mətbuat xalqımızın maariflənməsində, milli-mənəvi dəyərlərin qorunmasında, azərbaycançılıq ideyasının təbliğində və ictimai fikrin formalaşmasında mühüm rol oynamışdır. Müstəqillik illərində isə Azərbaycan mətbuatı yeni inkişaf mərhələsinə qədəm qoyaraq söz və fikir azadlığının təmin edilməsində, dövlət quruculuğu prosesinin işıqlandırılmasında və cəmiyyətin obyektiv məlumatlandırılmasında əhəmiyyətli mövqe qazanmışdır.
Azərbaycan Respublikasının Prezidenti cənab İlham Əliyevin qeyd etdiyi kimi, mətbuat hər bir insanın əsas informasiya mənbəyidir. Bu baxımdan mətbuatın qərəzsiz, operativ və peşəkar fəaliyyət göstərməsi cəmiyyətin düzgün məlumatlandırılması üçün əsas şərtlərdən biridir. İnformasiya texnologiyalarının sürətlə inkişaf etdiyi müasir dövrdə xəbərin vaxtında, dəqiq və obyektiv şəkildə ictimaiyyətə çatdırılması media nümayəndələrinin ən vacib vəzifələrindən hesab olunur. Xüsusilə milli maraqların qorunması, dövlətin mövqeyinin beynəlxalq ictimaiyyətə düzgün çatdırılması və dezinformasiyaya qarşı mübarizə sahəsində Azərbaycan mediası üzərinə düşən məsuliyyəti uğurla yerinə yetirir.
Son illərdə ölkəmizdə media sahəsində həyata keçirilən islahatlar jurnalistikanın peşəkarlığının yüksəldilməsinə, informasiya təhlükəsizliyinin möhkəmləndirilməsinə və media subyektlərinin fəaliyyətinin müasir tələblərə uyğun qurulmasına geniş imkanlar yaratmışdır. Rəqəmsal medianın inkişafı, yeni kommunikasiya vasitələrinin tətbiqi və jurnalistlərin peşə hazırlığının artırılması informasiya məkanının daha da zənginləşməsinə şərait yaradıb. Bunun nəticəsində Azərbaycan mediası həm ölkə daxilində, həm də beynəlxalq informasiya məkanında daha fəal və təsirli mövqe nümayiş etdirir.
Milli mətbuatın əsas missiyası cəmiyyətə doğru və etibarlı informasiya təqdim etməklə yanaşı, vətəndaşların milli həmrəylik ruhunda formalaşmasına, dövlətçilik ənənələrinin möhkəmlənməsinə və milli maraqların müdafiəsinə xidmət etməkdir. Jurnalistlər öz peşə fəaliyyətlərində obyektivlik, məsuliyyət və etik prinsiplərə sadiq qalmaqla ictimai etimadın qorunmasına mühüm töhfə verirlər. Bu gün Azərbaycan mətbuatı dövlətin inkişafını, xalqın nailiyyətlərini və ölkənin beynəlxalq uğurlarını dolğun şəkildə işıqlandıraraq cəmiyyətin etibarlı informasiya platforması kimi fəaliyyətini uğurla davam etdirir.
22 İyul – Milli Mətbuat Günü münasibətilə bütün media nümayəndələrini təbrik edir, onlara peşə fəaliyyətlərində uğurlar, yeni yaradıcılıq nailiyyətləri və daim obyektiv, operativ fəaliyyət arzulayırıq. Milli mətbuatımızın zəngin ənənələrinin gələcək nəsillər tərəfindən uğurla davam etdirilməsi Azərbaycanın informasiya məkanının daha da güclənməsinə və dövlətimizin inkişafına mühüm töhfələr verəcəkdir.
Aqil Mehdiyev – Zərdab rayonu Alıcanlı kənd sakini
