Mətbuat azadlığı prinsipləri.
Azərbaycan dili xalqımızın milli kimliyini, tarixini və mədəniyyətini yaşadan ən böyük mənəvi sərvətlərdən biridir. Bu dilin qorunmasında və inkişafında anadilli mətbuatın əvəzsiz rolu var. Ana dilində nəşr olunan qəzet və jurnallar cəmiyyətin maariflənməsinə, milli şüurun formalaşmasına və düzgün informasiya əldə edilməsinə uzun illərdir mühüm töhfə verir. Bu baxımdan, anadilli mətbuat Azərbaycan xalqının ictimai və mədəni həyatının ayrılmaz hissəsidir. Azərbaycan dilində ilk qəzet olan “Əkinçi”-nin nəşri ana dilində mətbuatın əsasını qoydu. Həsən bəy Zərdabi xalqın öz dilində oxumasını və məlumatlanmasını vacib hesab edirdi. O dövrdə ana dilində qəzet nəşr etmək böyük cəsarət tələb etsə də, bu addım milli oyanışa və maarifçiliyin inkişafına mühüm töhfə verdi.
Anadilli mətbuat insanların xəbərləri öz doğma dilində oxumasına, ölkədə baş verən hadisələri daha düzgün dərk etməsinə kömək edir. Eyni zamanda, Azərbaycan dilinin zənginliyini qoruyur, düzgün nitq və yazı mədəniyyətinin formalaşmasına xidmət göstərir. Mətbuat vasitəsilə milli-mənəvi dəyərlər, adət-ənənələr və tariximiz geniş oxucu kütləsinə çatdırılır. Müasir dövrdə internet mediasının inkişafı anadilli mətbuatın imkanlarını daha da artırıb. Xəbər portalları, elektron qəzetlər və sosial media platformaları Azərbaycan dilində hazırlanan materialların daha geniş auditoriyaya çatmasına şərait yaradır. Bu isə ana dilimizin informasiya məkanında mövqeyini daha da möhkəmləndirir. Lakin sürətli informasiya axını şəraitində jurnalistlərin məsuliyyəti də artır. Mətbuatda Azərbaycan ədəbi dilinin normalarına riayət olunması, məlumatların dəqiq və obyektiv təqdim edilməsi cəmiyyətin düzgün məlumatlandırılması baxımından böyük əhəmiyyət daşıyır.
22 İyul – Milli Mətbuat Günü münasibətilə anadilli mətbuatımızın keçdiyi inkişaf yoluna hörmətlə yanaşır, bu sahədə əməyi olan bütün media nümayəndələrini təbrik edirik. Ana dilimizi yaşadan, qoruyan və gələcək nəsillərə sevdirən mətbuatımızın fəaliyyəti bundan sonra da milli dəyərlərimizin inkişafına xidmət edəcəkdir.
Zərdab rayon Hüseynxanlı kənd ümumi orta ümumtəhsil məktəbinin müəllimi-Əfsun Nuriyev
