Füzuli uğrunda döyüşlər – Azərbaycan Ordusunun qəhrəmanlıq salnaməsi
2020-ci ildə baş vermiş Vətən müharibəsi Azərbaycanın hərb tarixinə şanlı səhifə kimi daxil olmuş, xalqımızın milli birliyini, ordumuzun döyüş qabiliyyətini və dövlətimizin qətiyyətini nümayiş etdirmişdir. Bu müharibədə Füzuli istiqamətində aparılan döyüşlər xüsusi əhəmiyyət kəsb etmiş, Azərbaycan Ordusunun qarşıya qoyduğu hərbi vəzifələrin yerinə yetirilməsində mühüm rol oynamışdır.
Füzuli rayonu uzun illər Ermənistan silahlı qüvvələrinin işğalı altında qalmış və təmas xəttində yerləşdiyinə görə gücləndirilmiş müdafiə mövqeləri ilə əhatə olunmuşdu. İşğal dövründə qarşı tərəf ərazidə çoxsaylı səngərlər, müdafiə sədləri və mühəndis-istehkam qurğuları inşa etmiş, müdafiə sistemini möhkəmləndirmişdi. Bu istehkamlar Füzuli istiqamətində hərbi əməliyyatların mürəkkəbliyini artırır, hücum edən qüvvələr qarşısında ciddi maneələr yaradırdı.
2020-ci il sentyabrın 27-də başlanan Vətən müharibəsi zamanı Azərbaycan Ordusu Füzuli istiqamətində genişmiqyaslı hərbi əməliyyatlara başladı. Ordumuzun şəxsi heyəti mürəkkəb döyüş şəraitində yüksək peşəkarlıq, iradə və qəhrəmanlıq nümayiş etdirərək düşmənin müdafiə xətlərini yarmağa nail oldu. İstehkamlarla möhkəmləndirilmiş mövqelərin ələ keçirilməsi və ardıcıl hərbi uğurların əldə olunması əməliyyatların sonrakı gedişinə mühüm təsir göstərdi.
Füzuli uğrunda döyüşlərin əhəmiyyəti yalnız rayonun yaşayış məntəqələrinin azad edilməsi ilə məhdudlaşmırdı. Bu istiqamətdə əldə olunan uğurlar Azərbaycan Ordusunun irəliləməsi üçün əlverişli şərait yaratmış, cənub cəbhəsində əməliyyat imkanlarını genişləndirmiş və digər istiqamətlərdə həyata keçirilən hərbi əməliyyatların gedişinə müsbət təsir göstərmişdir. Düşmənin uzun illər ərzində qurduğu müdafiə sisteminin yarılması Azərbaycan Ordusunun hazırlığının, müasir döyüş üsullarından səmərəli istifadəsinin və hərbi rəhbərliyin düzgün qərarlarının nəticəsi idi.
2020-ci il oktyabrın 17-də Füzuli şəhərinin işğaldan azad edilməsi bu döyüşlərin ən mühüm nəticələrindən biri oldu. Şəhərin azad edilməsi Azərbaycan xalqında böyük ruh yüksəkliyi yaratdı və Vətən müharibəsinin gedişində əlamətdar hadisəyə çevrildi. Bu qələbə uzun illər doğma yurdlarından ayrı düşmüş Füzuli sakinlərinin qayıdışına ümidləri gücləndirdi, Azərbaycanın ərazi bütövlüyünün bərpası istiqamətində mühüm mərhələ oldu.
Gülnaz Məmmədova – Zərdab şəhər sakini, təqaüdçü
