Füzuli rayonunun işğaldan azad olunması tarixi Zəfərimizin mühüm səhifəsidir
17 Oktyabr – Füzuli şəhəri günü Azərbaycan xalqının yaddaşında xüsusi yer tutan əlamətdar tarixlərdən biridir. Bu gün Füzulinin işğaldan azad olunmasının, xalqımızın iradəsinin, Azərbaycan Ordusunun qəhrəmanlığının və Vətən sevgisinin təcəssümüdür. Füzuli rayonu 1993-cü il avqustun 23-də Ermənistan silahlı qüvvələri tərəfindən işğal edilmişdi. İşğal nəticəsində rayonun yaşayış məntəqələri dağıdılmış, evlər, məktəblər, mədəniyyət və digər sosial obyektlər yararsız vəziyyətə salınmışdı. Minlərlə insan doğma yurdunu tərk etməyə məcbur olmuş, uzun illər ərzində öz evlərinə qayıtmaq həsrəti ilə yaşamışdı. Lakin Azərbaycan xalqı doğma torpaqlarını heç vaxt unutmadı. Füzulililərin qəlbində bir gün öz yurdlarına qayıtmaq ümidi yaşayırdı. Dövlətimizin apardığı siyasət, ordumuzun güclənməsi və xalqımızın birliyi bu arzunun gerçəkləşməsi üçün mühüm zəmin yaratdı.
2020-ci il sentyabrın 27-də başlayan Vətən müharibəsi Azərbaycan tarixində yeni bir mərhələnin başlanğıcı oldu. Azərbaycan Ordusu işğal altında olan torpaqlarımızın azad edilməsi uğrunda əks-hücuma keçdi. Döyüşlər zamanı hərbçilərimiz böyük qəhrəmanlıq və peşəkarlıq nümayiş etdirdilər. Onlar çətin relyef və güclü müqavimət şəraitində irəliləyərək düşmənin müdafiə mövqelərini yarıb keçdilər. 2020-ci il oktyabrın 17-də Füzuli şəhəri Ermənistanın işğalından azad edildi. Bu qələbə Azərbaycan xalqının böyük sevincinə səbəb oldu. Füzulinin azad edilməsi Vətən müharibəsinin gedişində mühüm hərbi-strateji əhəmiyyət daşıyırdı. Şəhərin azad olunması sonrakı hərbi əməliyyatların uğurla davam etdirilməsi üçün də vacib imkanlar yaratdı.
Füzuli şəhərinin azad edilməsi Azərbaycan əsgərinin gücünü, əzmini və Vətənə bağlılığını bir daha göstərdi. Bu qələbə uğrunda canından keçən şəhidlərimizin, sağlamlığını itirən qazilərimizin və döyüşlərdə iştirak edən bütün hərbçilərimizin qəhrəmanlığı heç vaxt unudulmayacaq. Onların fədakarlığı xalqımızın tarixinə qızıl hərflərlə yazılıb.
Bu gün Füzuli şəhərində və rayonun digər ərazilərində geniş bərpa və quruculuq işləri həyata keçirilir. Yeni yollar, yaşayış binaları, məktəblər və digər infrastruktur obyektləri tikilir. Müasir Füzuli Beynəlxalq Hava Limanının istifadəyə verilməsi də bölgənin inkişafı baxımından mühüm hadisədir. Bütün bunlar azad edilmiş torpaqlarımızın yenidən qurulmasına və insanların doğma yurdlarına qayıdışına xidmət edir. Füzulinin dirçəldilməsi yalnız binaların və yolların yenidən qurulması demək deyil. Bu, uzun illər yurd həsrəti çəkmiş insanların öz torpaqlarına qayıtması, doğma evlərində yeni həyata başlaması, bölgənin iqtisadi və mədəni həyatının bərpası deməkdir. Füzulidə aparılan quruculuq işləri gələcəyə olan inamı daha da gücləndirir. 17 Oktyabr – Füzuli şəhəri günü hər bir azərbaycanlıya Vətən sevgisinin, milli birliyin və mübarizə əzminin əhəmiyyətini xatırladır. Bu tarix bizə göstərir ki, xalq öz torpağına bağlı olduqda, dövlət və ordu bir məqsəd uğrunda birləşdikdə ən çətin hədəflərə belə nail olmaq mümkündür.
Füzulinin işğaldan azad olunması Azərbaycanın ərazi bütövlüyünün bərpası yolunda mühüm qələbələrdən biri kimi tarixdə qalacaq. Bu gün biz Füzulinin qəhrəman müdafiəçilərini, şəhidlərimizi ehtiramla anır, qazilərimizə minnətdarlığımızı bildiririk.
Zərdab rayon Gəlmə kənd tam orta ümumtəhsil məktəbinin direktoru-Rasif Qaçayev
