Füzuli azad edilmiş rayonlar arasında minaların sayına görə ən çox çirkləndirilmiş rayondur
Azərbaycanın işğaldan azad edilmiş ərazilərində mina və partlamamış hərbi sursatlarla çirklənmə müharibədən sonrakı dövrdə təhlükəsizlik, bərpa və yenidənqurma prosesinə ciddi təsir göstərən əsas problemlərdən biridir. Bu baxımdan Füzuli rayonunda mövcud olan mina təhlükəsi xüsusi diqqət tələb edir. İlkin hesablamalara görə, rayon ərazisində yüz mindən çox mina basdırılmışdır. Bu vəziyyət əhalinin təhlükəsizliyinin təmin olunmasını, ərazilərin təsərrüfat dövriyyəsinə qaytarılmasını və sosial-iqtisadi inkişafın sürətləndirilməsini çətinləşdirən mühüm amillərdəndir. Mina təhlükəsi, ilk növbədə, insanların həyat və sağlamlığı üçün ciddi risk yaradır. İşğaldan azad edilmiş ərazilərdə təhlükəsiz yaşayış mühitinin formalaşdırılması üçün minaların və partlamamış hərbi sursatların aşkar edilərək zərərsizləşdirilməsi, ərazilərin hərtərəfli yoxlanılması və müvafiq təhlükəsizlik tədbirlərinin həyata keçirilməsi vacibdir. Füzulidə bu istiqamətdə görülən işlər yalnız humanitar vəzifə deyil, həm də əhalinin doğma torpaqlarına təhlükəsiz qayıdışının təmin edilməsi və davamlı inkişaf üçün zəruri şərtdir.
Mina və partlamamış hərbi sursatlarla çirklənmiş ərazilər kənd təsərrüfatının inkişafına, yolların və kommunikasiya xətlərinin çəkilməsinə, yaşayış məntəqələrinin qurulmasına, eləcə də digər infrastruktur layihələrinin həyata keçirilməsinə maneələr yaradır. Bu səbəbdən minatəmizləmə tədbirləri azad edilmiş ərazilərin bərpası və yenidən qurulması prosesinin ayrılmaz tərkib hissəsidir. Ərazilərin təhlükəsizliyinin təmin olunması həm iqtisadi fəaliyyətin bərpası, həm də keçmiş məcburi köçkünlərin doğma yurdlarında normal həyat şəraitinin yaradılması baxımından mühüm əhəmiyyət daşıyır. Azərbaycanın işğaldan azad edilmiş ərazilərində mülki əhaliyə, dövlət əmlakına, infrastruktur obyektlərinə və sahibkarlıq subyektlərinə dəymiş ziyanın qiymətləndirilməsi mühüm istiqamətlərdən biridir. Ermənistana aid hərbi birləşmələrin törətdiyi təxribatlar nəticəsində yaranmış zərərin müəyyən edilməsi məqsədilə bütün zəruri tədbirlər görülür.
Füzuli rayonunda mina təhlükəsinin aradan qaldırılması Azərbaycanın azad edilmiş ərazilərdə həyata keçirdiyi bərpa və yenidənqurma siyasətinin əsas prioritetlərindəndir. Ərazilərin minalardan təmizlənməsi, mülki əhalinin təhlükəsizliyinin qorunması və dəymiş ziyanın hüquqi əsaslarla qiymətləndirilməsi Füzulinin dayanıqlı inkişafı, əhalinin doğma torpaqlarına qayıdışı və müharibənin nəticələrinin aradan qaldırılması baxımından mühüm əhəmiyyət kəsb edir.
Mətanət Ağayeva- Zərdab rayon Əlibəyli kənd körpələr evi-uşaq bağçasının müdiri
