Azərbaycan Respublikasının Prezidenti cənab İlham Əliyev Bakıda keçirilən Türk Dövlətləri Təşkilatının Müsəlman Dini Rəhbərləri Şurasının 7-ci toplantısı və böyük sufi mütəfəkkiri Seyid Yəhya Bakuviyə həsr olunmuş beynəlxalq konfransın iştirakçılarını Azərbaycanın paytaxtında səmimiyyətlə salamlamış, tədbirin həm mənəvi, həm də geosiyasi baxımdan mühüm əhəmiyyət daşıdığını vurğulamışdır. Dövlətimizin başçısı qeyd etmişdir ki, belə mötəbər tədbirlər Türk və İslam dünyasının, eləcə də Qafqaz xalqlarının dini-mənəvi həmrəyliyinin möhkəmləndirilməsinə, ortaq tarixi-mədəni irsin qorunmasına və gələcək nəsillərə çatdırılmasına mühüm töhfə verir. Seyid Yəhya Bakuvinin zəngin irsinin öyrənilməsi və təbliği xalqlarımızı birləşdirən ortaq mənəvi dəyərlərin daha dərindən dərk olunmasına xidmət edir. Bu baxımdan Bakıda belə bir beynəlxalq konfransın keçirilməsi Azərbaycanın tarixən Şərq mədəniyyətlərinin qovuşduğu məkan kimi rolunu bir daha nümayiş etdirir. Tədbir eyni zamanda ölkəmizin Türk və İslam dünyası arasında dini-mənəvi dialoqun və qarşılıqlı əməkdaşlığın inkişafına verdiyi töhfənin göstəricisidir. Prezident İlham Əliyev çıxışında Azərbaycanın tarixi Zəfərinə və ölkənin ərazi bütövlüyü ilə suverenliyinin tam bərpa olunmasına da toxunmuşdur. Dövlətimizin başçısı bildirmişdir ki, Azərbaycan xalqı birlik və həmrəylik nümayiş etdirərək öz ərazi bütövlüyünü və suverenliyini bərpa etmiş, bununla da uzun illər davam edən işğala son qoymuşdur. Azərbaycan Ordusunun rəşadəti, xalqımızın milli birliyi və dövlətimizin qətiyyətli siyasəti nəticəsində əldə edilən Zəfər ölkəmizin beynəlxalq hüquqla təsbit olunmuş hüquqlarının təmin edilməsinə imkan yaratmışdır. Bu baxımdan Azərbaycanın ərazi bütövlüyünün və suverenliyinin bərpası yalnız hərbi-siyasi nəticə deyil, həm də milli iradənin və dövlət-xalq birliyinin təcəssümüdür. Dövlət başçısının qeyd etdiyi kimi, Azərbaycan xalqının bir yumruq kimi birləşməsi qarşıya qoyulan məqsədlərə nail olunmasında mühüm rol oynamışdır. Qarabağda separatizmin aradan qaldırılması və ölkənin bütün ərazisində dövlət suverenliyinin təmin edilməsi regionda yeni reallıqlar formalaşdırmışdır. Prezident İlham Əliyev çıxışında Azərbaycanın regionda üzləşdiyi siyasi təzyiqlər və bəzi Qərb təsisatlarının ölkəmizə münasibətdə nümayiş etdirdiyi ikili standartlarla bağlı mövqeyini də ifadə etmişdir. Dövlətimizin başçısı Avropa Parlamentinin Azərbaycana qarşı qəbul etdiyi qərəzli yanaşmaları tənqid edərək, korrupsiya və rüşvət qalmaqalları ilə bağlı həmin qurumda baş vermiş hadisələrin onun Azərbaycanı insan hüquqları və demokratiya məsələləri üzrə ittiham etməsinin obyektivliyinə dair ciddi suallar yaratdığını bildirmişdir. Prezident bu cür yanaşmaların beynəlxalq münasibətlərdə ədalətlilik və obyektivlik prinsipləri ilə uzlaşmadığını vurğulamışdır. Çıxışının sonunda Prezident İlham Əliyev regional və qlobal təhlükəsizlik məsələlərinə diqqət çəkərək Türk dünyasının və Qafqaz regionunun sülh və sabitlik məkanı kimi qorunmasının vacibliyini vurğulamışdır. Dövlət başçısı qeyd etmişdir ki, davamlı sülhün təmin olunması üçün dövlətlər arasında qarşılıqlı etimadın, əməkdaşlığın və həmrəyliyin gücləndirilməsi mühüm əhəmiyyət daşıyır. Azərbaycanın təşəbbüsləri də göstərir ki, regionda uzunmüddətli sabitliyin və təhlükəsizliyin təmin olunması üçün ölkələr öz aralarında əməkdaşlığı genişləndirməli, qarşılıqlı hörmət və etimad prinsiplərinə əsaslanan münasibətlər qurmalıdırlar. Türk və İslam dünyasının mənəvi birliyi, Qafqaz xalqları arasında dialoq və əməkdaşlığın inkişafı bu prosesə mühüm töhfə verə bilər. Beləliklə, Bakıda keçirilən mötəbər tədbir yalnız dini liderlərin görüşü kimi deyil, həm də ortaq mənəvi dəyərlərin, tarixi irsin və sülh ideallarının təşviqi baxımından mühüm platforma kimi diqqəti cəlb edir. Prezident İlham Əliyevin çıxışında səsləndirdiyi fikirlər Türk və İslam dünyasının həmrəyliyinin gücləndirilməsi, Qafqazda davamlı sülhün və təhlükəsizliyin təmin olunması, eləcə də xalqlar arasında qarşılıqlı anlaşmanın inkişaf etdirilməsinin vacibliyini bir daha önə çıxarmışdır.
İlkin Əliyev,
YAP Zərdab rayon təşkilatının sədri
