Bakı Metropoliteninin yeni stansiyası – “20 Sentyabr”.
Bakı Metropoliteni hər zaman paytaxt sakinlərinin rahatlığını təmin edən, şəhərin nəqliyyat sisteminin şah damarı olan strateji əhəmiyyətli bir qurum kimi inkişaf edib və bu gün şəhərsalma mədəniyyətinin ayrılmaz hissəsinə çevrilib. Ölkəmizin ümumi tərəqqisi fonunda paytaxtın nəqliyyat infrastrukturunun modernləşdirilməsi, yeni xətlərin və stansiyaların inşası istiqamətində ardıcıl və məqsədyönlü addımlar atılır ki, bu da şəhər sakinlərinin gündəlik həyatını xeyli asanlaşdırır. Yeni yeraltı xətlərin çəkilməsi, mövcud stansiyaların müasir standartlara uyğun yenidən qurulması və sərnişin axınının optimallaşdırılması dövlətin diqqət mərkəzində olan əsas məsələlərdəndir.
Bu ardıcıl inkişaf prosesinin növbəti mühüm mərhələsi isə xalqımızın yaddaşına əbədi həkk olunan tarixi bir hadisənin Bakı metrosunun xəritəsində əbədiləşdirilməsi ilə nəticələndi. Xalqımızın illərlə gözlədiyi, dövlətçilik tariximizin ən parlaq səhifələrindən biri olan milli suverenliyimizin bərpasının paytaxtın yeraltı yollarında simvollaşdırılması həm mənəvi, həm də ictimai baxımdan müstəsna əhəmiyyət daşıyır.
2023-cü il sentyabrın 20-də Azərbaycan Respublikasının bütün ərazisində dövlət suverenliyinin bərpa olunduğunu nəzərə alaraq, cənab Prezident İlham Əliyevin təşəbbüsünə əsasən Azərbaycan Respublikası Nazirlər Kabinetinin Qərarı ilə Bakı Metropoliteninin Nəsimi rayonu, Cəlil Məmmədquluzadə küçəsi, 194 ünvanında yerləşən yeni stansiyası “20 Sentyabr” adlandırılmışdır. Bu qərar cəmiyyətdə böyük ruh yüksəkliyi ilə qarşılandı və hər bir vətəndaşda qürur hissi doğurdu, çünki bu adlandırma təkcə coğrafi oriyentir deyil, həm də xalqımızın azadlıq mübarizəsinin və qələbəsinin əbədi yadigarıdır. Yeni stansiyanın məhz bu şərəfli adla fəaliyyətə başlaması gələcək nəsillərin yaddaşında Dövlət Suverenliyi Gününün dərin iz buraxmasına və hərbi-siyasi zəfərimizin hər an xatırlanmasına xidmət edəcək. Şəhərin intensiv inkişaf edən bu hissəsində açılan müasir infrastruktur obyekti yüksək texnoloji standartları, sərnişinlər üçün yaradılan təhlükəsiz və rahat şəraiti ilə seçiləcək, eyni zamanda paytaxtımızın memarlıq simasına xüsusi yaraşıq verəcəkdir. Hər dəfə bu stansiyadan istifadə edən sərnişinlər təkcə rahat səyahət imkanı əldə etməyəcək, eyni zamanda 20 sentyabr tarixinin tariximizdəki əvəzsiz yerini bir daha qəlblərində hiss edəcəklər. Bakı Metropoliteninin “20 Sentyabr” stansiyası ölkəmizin qazanılmış hüquqlarının, ərazi bütövlüyünün və sarsılmaz suverenliyinin yeraltı dünyamızdakı əbədi təntənəsi kimi hər zaman qürurla xatırlanacaqdır.
Rüxsarə Eminova – Zərdab rayonu Körpükənd kənd tam orta ümumtəhsil məktəbinin direktoru
