Azərbaycanın üçrəngli bayrağının tarixi xalqımızın müstəqillik uğrunda apardığı mübarizə ilə sıx bağlıdır
Hər bir xalqın tarixində onun kimliyini, milli dəyərlərini, azadlıq istəyini və dövlətçilik ənənələrini özündə əks etdirən müqəddəs rəmzlər vardır. Bu rəmzlərin ən başlıcası isə dövlət bayrağıdır. Bayraq bir xalqın müstəqilliyinin, suverenliyinin, milli birliyinin və gələcəyə olan inamının ifadəsidir. Azərbaycan xalqı üçün də üçrəngli Dövlət Bayrağımız xüsusi məna və əhəmiyyət daşıyır. Bu bayraq xalqımızın azadlıq uğrunda apardığı mübarizənin, tarixi keçmişinin, milli kimliyinin və müstəqil dövlət qurmaq arzusunun rəmzidir. Hər il noyabrın 9-da ölkəmizdə Dövlət Bayrağı Günü qeyd olunur. Bu əlamətdar gün hər bir azərbaycanlı üçün böyük qürur və sevinc mənbəyidir.
Azərbaycanın üçrəngli bayrağının tarixi xalqımızın müstəqillik uğrunda apardığı mübarizə ilə sıx bağlıdır. XX əsrin əvvəllərində dünyada baş verən siyasi proseslər, milli azadlıq hərəkatlarının güclənməsi Azərbaycan xalqının da öz dövlətini qurmaq istəyini daha da artırmışdı. Uzun illər azadlıq və müstəqillik arzusu ilə yaşayan xalqımız nəhayət, 1918-ci il mayın 28-də Azərbaycan Xalq Cümhuriyyətini yaratdı. Bu, xalqımızın dövlətçilik tarixində son dərəcə mühüm hadisə idi. Azərbaycan Xalq Cümhuriyyəti müsəlman Şərqində ilk demokratik respublika kimi tarixə düşdü.
1918-ci il noyabrın 9-da Azərbaycan Xalq Cümhuriyyətinin hökuməti tərəfindən üçrəngli Dövlət Bayrağımız qəbul edildi. Bayrağımızın üzərindəki mavi, qırmızı və yaşıl rənglər xalqımızın milli düşüncəsini, mənəvi dəyərlərini və gələcək inkişaf istiqamətlərini ifadə edirdi. Bu bayraq müstəqil Azərbaycanın dünyaya təqdim etdiyi milli kimlik və dövlətçilik nişanəsinə çevrildi.
Lakin Azərbaycan Xalq Cümhuriyyətinin ömrü uzun olmadı. 1920-ci ilin aprelində ölkəmiz bolşevik Rusiyası tərəfindən işğal edildi və müstəqil dövlətçiliyimizə son qoyuldu. Üçrəngli bayrağımız dövlət rəmzi kimi istifadədən çıxarıldı. Buna baxmayaraq, xalqımız öz milli bayrağını, müstəqillik arzularını və dövlətçilik ənənələrini heç vaxt unutmadı. Bayraq xalqımızın yaddaşında azadlığın və müstəqilliyin müqəddəs rəmzi kimi yaşamaqda davam etdi.
Uzun illər sovet hakimiyyəti dövründə üçrəngli bayrağımız rəsmi şəkildə dalğalanmasa da, xalqımızın qəlbində ona olan sevgi və bağlılıq qorunub saxlanıldı. Xüsusilə ötən əsrin 80-ci illərinin sonlarında Azərbaycanda milli azadlıq hərəkatı geniş vüsət aldıqca üçrəngli bayrağımız yenidən meydanlarda görünməyə başladı. İnsanlar bu bayrağı əllərində qaldıraraq müstəqillik, azadlıq və milli suverenlik tələblərini bütün dünyaya bəyan edirdilər.
1990-cı il noyabrın 17-də ümummilli lider Heydər Əliyevin rəhbərliyi ilə Naxçıvan Muxtar Respublikası Ali Məclisinin sessiyasında üçrəngli bayrağımız yenidən dövlət bayrağı kimi qəbul edildi. Bu qərar xalqımızın milli dövlətçilik tarixində mühüm dönüş nöqtəsi oldu. Eyni zamanda, Naxçıvan Muxtar Respublikasının Ali Məclisi Azərbaycan SSR Ali Soveti qarşısında üçrəngli bayrağın Azərbaycanın rəsmi dövlət bayrağı kimi qəbul edilməsi məsələsini qaldırdı.
1991-ci il oktyabrın 18-də Azərbaycan dövlət müstəqilliyini bərpa etdikdən sonra üçrəngli bayrağımız ölkəmizin Dövlət Bayrağı statusunu aldı. Beləliklə, xalqımızın illərlə həsrətində olduğu milli bayrağımız yenidən müstəqil Azərbaycanın səmasında dalğalanmağa başladı. 1991-ci il dekabrın 29-da keçirilmiş ümumxalq səsverməsi ilə dövlət müstəqilliyimiz təsdiqləndi.
Kəmalə Əliyeva – Zərdab rayonu, Qaravəlli kənd tam ümumtəhsil məktəbinin direktoru
