Azərbaycanın daxili işlərinə müdaxilə.
Qarabağ və Şərqi Zəngəzurda son illərdə geniş quruculuq prosesi gedir. Dağıdılmış şəhər və kəndlər yenidən salınır, yollar çəkilir, sosial obyektlər tikilir və keçmiş məcburi köçkünlərin öz doğma yurdlarına qayıtması üçün şərait yaradılır. Bu proses Azərbaycan dövlətinin həyata keçirdiyi daxili siyasətin mühüm istiqamətlərindən biridir. Azərbaycanda akkreditə olunmuş diplomatik korpusun nümayəndələrinin Qarabağ və Şərqi Zəngəzura səfəri də bölgədə görülən işlərlə yerində tanış olmaq baxımından diqqət çəkir. Xarici diplomatların ərazilərə səfər etməsi, burada aparılan bərpa-quruculuq işlərini və mövcud vəziyyəti görməsi obyektiv məlumat əldə etmək baxımından əhəmiyyətlidir. Lakin bu səfərə erməni revanşist qüvvələrinin mənfi münasibəti yeni müzakirələrə səbəb olub. Səfəri tənqid edən və Azərbaycanın bölgədəki fəaliyyətinə qarşı çıxan bəyanatlar ölkənin daxili işlərinə müdaxilə cəhdi kimi qiymətləndirilir. Azərbaycan öz suveren ərazisində hansı layihələri həyata keçirəcəyini və hansı tədbirləri təşkil edəcəyini müstəqil şəkildə müəyyən etmək hüququna malikdir.
Qarabağ və Şərqi Zəngəzur Azərbaycanın beynəlxalq səviyyədə tanınmış əraziləridir. Buna görə də həmin ərazilərdə aparılan quruculuq işləri Azərbaycanın daxili məsələsidir. Bu prosesə kənardan siyasi təzyiq göstərmək və ya müxtəlif bəhanələrlə müdaxilə etməyə çalışmaq regionda qarşılıqlı etimadın yaranmasına mane olur. Xüsusilə revanşist fikirlərin səsləndirilməsi diqqət çəkir. Belə mövqelər keçmiş qarşıdurmanın izlərini aradan qaldırmaq əvəzinə, gərginliyi yenidən artırmaq təhlükəsi yaradır. Halbuki regionun gələcəyi üçün əsas məqsəd sülhün möhkəmləndirilməsi, əməkdaşlığın genişləndirilməsi və insanların təhlükəsiz şəraitdə yaşamasıdır.
Diplomatik nümayəndələrin Qarabağ və Şərqi Zəngəzura səfərləri isə bölgə haqqında məlumatların birbaşa mənbədən əldə edilməsi baxımından faydalıdır. Diplomatların gördükləri vəziyyət əsasında öz qiymətləndirmələrini aparması daha obyektiv təsəvvürün formalaşmasına kömək edir. Azərbaycan hazırda azad edilmiş ərazilərdə böyük quruculuq layihələri həyata keçirir. Bu işlərin əsas məqsədi ərazilərin yenidən dirçəldilməsi, müasir infrastrukturun yaradılması və insanların doğma yurdlarına qayıdışının təmin edilməsidir. Bu prosesin qarşısının alınmasına yönələn hər hansı siyasi cəhd isə bölgədə sabitliyə xidmət etmir.
Nəticə etibarilə, Azərbaycan öz ərazisində müstəqil siyasət yürütmək hüququna malikdir. Ermənistan daxilindəki revanşist qüvvələrin və digər dairələrin Azərbaycanın daxili qərarlarına təsir göstərmək cəhdləri əvəzinə, regionda sülh və əməkdaşlığın dəstəklənməsi daha düzgün yanaşma olardı. Davamlı sabitlik yalnız bir-birinin suverenliyinə və ərazi bütövlüyünə hörmət əsasında mümkündür.
Zərdab rayon Əlibəyli kənd tam orta ümumtəhsil məktəbinin müəllimi-Gülşən İsmayılova
